Որտե՞ղ է Տաթևիկ Ռևազյանը, ինչո՞ւ պատասխան չի տալիս չեղարկված չվերթի համար

«Քաթար էյրվեյզ» ավիաընկերությունը չեղարկել է ԱՄՆ-ից հոկտեմբերի 15-ին դեպի Հայաստան հումանիտար բեռ տեղափոխող Լոս Անջելես-Երևան չվերթը` չներկայացնելով հիմնավոր պատճառներ։

Հումանիտար բեռը ամերիկահայ համայնքի կողմից է, որն ուղարկվում էր Արցախա-ադրբեջանական պատերազմից տուժած խաղաղ բնակիչների համար։ Հայտնի է, որ չվերթը չեղարկվել է, քանի որ Թուրքիան հրաժարվել է իր օդային տարածքով թույլատրել Հայաստան բերվող հումանիտար օգնության թռիչքը։ «Քաթար էյրվեյզ» ավիաընկերությունը թռիչքի չեղարկման մասին հայտնել է հոկտեմբերի- 14-ին-ին՝ չներկայացնելով լուրջ հիմնավորումներ։ Այս մասին նշվում է Քաղաքացիական ավիացիայի կոմիտեի տարածած հաղորդագրության մեջ․
«Այլ երկրների, օրինակ, Ռուսաստանի Դաշնության կամ Վրաստանի տարածքով օդանավի նոր թռիչքուղու կազմակերպումը ժամերի հարց է, ուստի ավիաընկերությունը պարտավոր է գտնել այլ ճանապարհներ՝ հումանիտար բեռը տեղափոխելու համար: Վստահելի աղբյուրներից ստացվող տեղեկություններն այս պահին հիմք են տալիս ենթադրելու, որ «Քաթար էյրվեյզն» այդ բեռը չի կարողանալու տեղափոխել: Հիմքեր ունենք նաեւ պնդելու, որ Թուրքիան միտումնավոր է փակել օդային ճանապարհը: Առաջին անգամ չէ, որ Թուրքիան խոչընդոտում է դեպի Հայաստան բեռնափոխադրումները: Այդ երկիրը դեռեւս պատերազմից առաջ սկսեց խոչընդոտներ ստեղծել՝ ավիաընկերություններից պահանջելով բեռների մանրամասն ցանկը, իր օդային տարածքով անցնելիս: Չնայած օդային տարածքի տրամադրումը յուրաքանչյուր երկրի սուվերեն իրավունքն է, սակայն միջազգային պրակտիկայի համաձայն, տվյալներ պահանջում են միայն վտանգավոր բեռների մասին՝ արտակարգ իրավիճակներում ճիշտ արձագանքելու համար (Չիկագոյի կոնվենցիա, հոդված 5): Այս բեռն, ընդ որում, զննման փուլն անցել էր»,- նշել է Հայաստանի քաղաքացիական ավիացիայի վարչության պետ Տաթևիկ Ռևազյանը:

Դեպքի առնչությամբ Հայաստանի Քաղաքացիական ավիացիայի կոմիտեն դիմել է աերոնավիգացիոն անվտանգության կազմակերպությանը՝ «EUROCONTROL»-ին:
«Այս օրերին դեպի Հայաստան քանիցս բեռնափոխադրումներ են իրականացվել ԱՄՆ-ից, Ֆրանսիայից և ՌԴ-ից: Բեռների փոխադրումը հիմնականում իրականացվում է Քաղաքացիական ավիացիայի կոմիտեի և հայկական ավիափոխադրողների համագործակցությամբ: Ավիաընկերությունները դա անում են ոչ առևտրային հիմունքներով (առանց շահույթի)»,- նշվում է Քաղաքացիական ավիացիայի կոմիտեի տարածած հաղորդագրության մեջ։

Այսպիսով՝ մենք քաղում ենք ազգային փոխադրողներին չեղարկելու, հայկական ավիաընկերությունների եվրոպական երկրների սև ցուցակներում հայտնվելու և ընդհանրապես վերջին երկու տարում ավիացիայի ոլորտում վարվող անհեռատես քաղաքականության արդյունքը։ Պատերազմական վիճակում գտնվող Հայաստանն այսօր չունի գեթ մեկ տեղական ավիաընկերություն, որը դեպի եվրոպական երկրներ թռիչք կատարելու իրավունք ունի։ Ապրիլից սկսած առ այսօր, այդպես էլ չի տրվել որևէ ողջամիտ բացատրություն, թե ի վերջո ինչու Թռիչքային անվտանգության եվրոպական գործակալությունը հայկական փոխադրողներին զրկեց դեպի Եվրոպա թռիչքներ իրականացնելու լիցենզիայից։ Որևէ մեկն այս խայտառակ տապալման համար այդպես էլ պատասխան չտվեց։ Իսկ տխրահռչակ Տաթևիկ Ռևազյանն առ այսօր շարունակում է զբաղեցնել Քաղաքացիական ավիացիայի կոմիտեի նախագահի պաշտոնը։ Առ այսօր հայտնի չէ, թե անցած 6 ամիսներին ինչ քայլեր են ձեռնարկվել՝ հայկական ավիաընկերությունների թռիչքային իրավունքները վերականգնելու և հայկական ավիացիայի վարկանիշը փրկելու ուղղությամբ։ Եվ հիմա՝ պատերազմի ժամանակ, ստիպված ենք ճաշակել Տաթևիկ Ռևազյանի և նրա հովանավորների վարած անմիտ և կործանարար քաղաքականության դառը պտուղները։

Որտե՞ղ է Տաթևիկ Ռևազյանը, ինչո՞ւ պատասխան չի տալիս չեղարկված չվերթի համար։

 Հայկ  Դավթյան