«Կրոնափոխները»

Պատերազմի այս օրերին ի թիվս այլ բաների որոշ շրջանակներ հասարակության աչքի առաջ անսպասելի շրջադարձ են ապրում, կարելի է ասել արժեքային հեղափոխություն է տեղի ունենում նրանց մոտ: Մարդիկ, ովքեր տարիներ, տասնամյակներ շարունակ աչքի են ընկել հակառուսական դիրքորոշումներով եւ ոչ միայն Հայաստանի զարգացման տեսլականն են կապել արեւմտյան արժեհամակարգի հետ, այլեւ աչքի են ընկել ընդգծված ռուսատյացությամբ, այսօր «կրոնափոխ» են եղել, Ռուսաստանի գովքն են անում, էկրաններից, եթերներից չեն իջնում ռուսամետության իրենց պրոպագանդայով, ֆեյսբուքյան էջերն են ողողել ռազմավարական դաշնակցի վերաբերյալ տեղեկատվությամբ եւ այլն:
Ահա, երբեմնի մոլի ռուսատյացներից մեկը՝ ԱԺ պատգամավոր Արման Բաբաջանյանը, որը տարիներ շարունակ ոչ միայն ինքն է Ռուսաստանի հասցեին տարբեր հայտարարություններ արել, այլ իր մեդիառեսուրսն է ծառայեցրել այդ նպատակին՝ ակնհայտորեն հարված հասցնելով միջպետական հարաբերություններին, այժմ այդ հարաբերությունները վերանայելու մասին է խոսում, «չհասկացվածության պատերի» քանդելու մասին է խոսում, Հանրայինի եթերում սիրաշահում ռուսական կայսրության ղեկավարներին ու ասում, ողջունում, որ մեր վարչապետը լավ հարաբերություններ ունի Վլադիմիր Պուտինի հետ: Մի քանի օր առաջ Նիկոլ Փաշինյանի հետ արտախորհրդարանական ուժերի շարքում հանդիպումն ամփոփելիս Բաբաջանյանը գրել է.«Ի շարս մյուս ուղղությունների, այս պահին չափազանց կարևոր է Ռուսաստանի հետ տարվող քաղաքական, դիվանագիտական աշխատանքը։ Պատերազմական այս իրավիճակը կարծես առիթ է դառնում մեր ռուս գործընկրենյրեի հետ նախկին բոլոր տարաձայնությունները հարթելու, հայ–ռուսական հարաբերություններում առկա անհասկացվածության պատը վերացնելու համար։ Պատերազմը փորձություն է մեր երկու ժողովրուրդների դաշնակցության համար, վստահաբար հայ և ռուս ժողովւորդներն այս փորձությունը հաղթահարելու են պատվով»։
Մյուս «կրոնափոխը» Ստյոպա Սաֆարյանն է, որը տարիներ շարունակ տարբեր բողոքի ակցիաների է մասնակցել ընդդեմ Ռուսաստանի: Ռուսաստանին Հայաստանի դեմ պատերազմ սանձազերծելու մեջ մեղադրել, ՌԴ-ին Ադրբեջանի դաշնակից անվանել ու մի շարք այլ հակապետական միջոցառումների մասնակցել: Իսկ, ահա, այսօր, երկու օր է նա համառ մարտեր է մղում ֆեյսբուքյան իր տիրույթում եւ լրատվամիջոցներից մեկին մեղադրում «Հայաստանի միջպետական հարաբերությունը վտանգող գործունեութուն ծավալելու մեջ»,- խոսքը հայ-ռուսական հարաբերությունների մասին է: Խնդիրն այն է, որ երկու օր առաջ ՀԽ նախագահ Սաֆարյանն իր ֆեյսբուքյան էջում, անդրադառնալով Թուրքիայի և Ադրբեջանի նկատմամբ պատժամիջոցներ կիրառելու խնդրին, գրել էր․
«ԵՄ-ում համաձայնության են եկել մեկ մարդու՝ Նավալնու թունավորման գործով Ռուսաստանի դեմ պատժամիջոցներ սահմանելու հարցում։ Ալիևի ու Էրդողանի ագրեսիոն պատերազմից Արցախում, Հայաստանում ու Ադրբեջանում հազարավոր մարդիկ են մեռնում, իսկ ԵՄ-ն ու աշխարհն «անկարող են» պատժամիջոցներ սահմանել Թուրքիայի ու Ադրբեջանի դեմ․․․»:
Ստյոպա Սաֆարյանի այս գրառումից հետո ռուս հայտնի հեռուստահաղորդավար, քաղաքական մեկնաբան Վլադիմիր Սոլովյովի Տելեգրամ ալիքում հայտնվել էր մի հրապարակում, որում ասվում էր.«Հայաստանի ամենահայտնի գրանտակերներից մեկը զարմացած է, թե ինչու է Եվրոպան միայն մեկ Նավալնու համար պատժամիջոցներ կիրառում Ռուսաստանի դեմ, իսկ Թուրքիայի ու Ադրբեջանի դեմ ոչինչ չի նախաձեռնում»: Լրատվամիջոցներն այս խոսքերը վերագրել էին Սոլովյովին՝ որպես պատասխան Սաֆարյանին, ավելի ուշ պարզ դարձավ, որ Սոլովյովը չէ հեղինակը.«Իմ ալիքում կա այդ տեքստը: Հեղինակն «Ինֆո Արմենիան» է, իմ խմբագիրները հարմար են գտել դա տեղադրել իմ ալիքում, ո՞րն է խնդիրը: Իմ լրահոսում եղած ինֆորմացիան մենք ֆիլտրում ենք, և որը հարմար ենք գտնում, տեղադրում ենք»,- 168.am-ին ասել էր Վլադիմիր Սոլովյովը, ապա հավելել «Իսկ ի՞նչ է՝ նա գրանտակեր չէ՞, ի՞նչն է վիճարկում Ստյոպա Սաֆարյանը»: Հայաստանում հակառուսական շարասյան շատ ներկայացուցիչներն էլ այս օրերին լռում են, կամ անմիջապես վերանայում իրենց հայտարարությունները: Սեպտեմբերի 30-ին օրինակ Փաշինյանի արտաքին գծով նախկին խորհրդական Արսեն Խառատյանն իր էջում այսպիսի գրառում էր արել, «Путин капут в Карабахе», սակայն քիչ անց ջնջեց այն:
Միգուցե պատերազմ էր պետք, որ այս մարդիկ հասկանային ակնհայտ իրողություններ:

Անի Սահակյան