Մահափորձ Ադրբեջանի համար ահաբեկիչներ հավաքագրող պարագլուխի նկատմամբ

Մեծ Բրիտանիան իր քաղաքացիներին զգուշացրել է Ադրբեջանում խաղաղ բնակչության դեմ ահաբեկչության վտանգի մասին։ Դեսպանատան զգուշացման մեջ ասվում է, որ ահաբեկիչները կարող են հարձակումներ իրականացնել Ադրբեջանում՝ ուղղված քաղաքացիական բնակչության դեմ, օրինակ, օտարերկրացիներով լի հյուրանոցներում, ռեստորաններում և ակումբներում, ինչպես նաև էներգետիկ օբյեկտներում։

Դեսպանատան էջում ասված է, որ սպառնալիքն ուղղված է Բրիտանիայի շահերի դեմ և բխում է Իրաքում ու Սիրիայում հակամարտությունների մեջ շահագրգիռ խմբերից։
Ավելի վաղ նաև Ադրբեջանում ԱՄՆ դեսպանատունն էր իր քաղաքացիներին զգուշացրել ահաբեկչության բարձր մակարդակի և կորոնավիրուսի պատճառով խուսափել Ադրբեջան այցելելուց:

Այսպիսով, Ադրբեջանն, այսպես ասած՝ պաշտոնապես դարձավ ահաբեկչության որջ: ԱՄՆ-ի ու Մեծ Բրիտանիայի դեսպանատները Բաքվում իրենց քաղաքացիներին խորհուրդ են տալիս չայցելել Ադրբեջան՝ ահաբեկչության վտանգի պատճառով:
Գիտակցո՞ւմ է բռնապետ Ալիևը, թե ինչի մեջ ներքաշեց իր երկիրը՝ դժվար է ասել, սակայն այն, որ նա ողջ տարածաշրջանի կայունությանն ու անվտանգությանը հարված հասցրեց՝ դա միանշանակ է:

Այժմ՝ Ադրբեջանն Ալիևի բռնապետական ռեժիմից վերածվեց ահաբեկչության որջի՝ դրանից բխող հետևանքներով: Իսկ հետևանքներն իսկապես կարող են ծանր լինեն հենց առաջին հերթին Ադրբեջանի համար: Այդ երկիրն ինչ-որ պահից կարող է ահաբեկչական խմբավորումների ներքին խնդիրների պարզման կենտրոն դառնալ և իրական սպառնալիք ադրբեջանական հասարակության համար:

Իսկ այդ խմբավորումների վերաբերյալ ժամանակ առ ժամանակ «հետաքրքիր» լուրերի պակաս չի զգացվում:

Հետաքննող լրագրող Լինդսի Սնելը Թվիթերի իր էջում հայտնել է, որ ծանր վիրավորում է ստացել «Համզա» ահաբեկչական խմբավորման պարագլուխներից Աբու Ջաբերը, որին Թուրքիան նշանակել էր գրոհայիններ հավաքագրելու համար։

Պարզվում է՝ «Համզայի» պարագլուխ Աբու Ջաբերը, որին Թուրքիան նշանակել էր զինյալներ հավաքագրելու և Ադրբեջան ուղարկելու համար, ծանր վիրավորվել է Ջաբալ Բարադում մեքենայի մեջ տեղադրված ռումբի պայթյունից։ Համզայի զինակիցը հայտնել է, որ իրենց կարծիքով դա Ադրբեջանում զոհված մի սիրիացու ընտանիքի անդամների կողմից կազմակերպված մահափորձ է եղել»,- գրել է լրագրողը։

Ահա, թե ինչ է նշանակում երկիրը ահաբեկչներով լցնելը... Ալիևի ռեժիմը դրա հետևանքները, վստահաբար, չի մարսելու:

Մետաքսյա Շալունց