Ինչպե՞ս կվարվի Փաշինյանը իր հոգեեղբոր հետ
Արցախում ռազմական գործողությունները սկսվելու պահից Հայաստանում հայտարարվեց ռազմական դրություն, որի կարեւոր կետերից մեկը մամուլի սահմանափակումներն էին: Արգելվում էր ներկայացնել զոհերի քանակի, զորքի տեղաշարժերի, թվի, մեր կորուստների մասին եթե դա պաշտոնական ինֆորմացիա չէր: Գրում էինք միայն ձեռքբերումների, առաջընթացի մասին՝ հենվելով պաշտոնական հաղորդագրությունների վրա։ Սակայն իշխանությունները կարծում են, որ ցանկացած կարծիք, գնահատական, եթե դա չի ասվել պաշտոնատար անձանց կողմից եւ չի հաստատում պաշտոնյաների ասածները, վնասում է պատերազմական այս վիճակին, պառակտում է ազգը, անկումային տրամադրություններ առաջացնում, խանգարում մեր հաղթանակին, ուստի գնաց Ռազմական դրության մասին որոշման մեջ խստացումների ճանապարհով:
Հիմնական խստացումները, ինչպես հայտնի է, վերաբերվում են մամուլի և խոսքի ազատությանը: Այս տեսանկյունից առանձնահատուկ ուշադրության է արժանի խստացումներից այն ձևակերպումը, ըստ որի՝
արգելվում է քննադատել պետական և տեղական ինքնակառավարման մարմինների և պաշտոնատար անձանց` ռազմական դրության իրավական ռեժիմի ապահովմանը և պետական անվտանգության ապահովմանն առնչվող գործողությունները, այդ թվում` ելույթները, հրապարակումները, հերքել դրանք կամ դրանց արդյունավետությունը կասկածի տակ դնող կամ որևէ այլ կերպ արժեզրկող հրապարակումներով հանդես գալ:
Եթե ավելի պարզ, ապա արգելվում է որևէ կերպ մեկնաբանել կամ որևէ կերպ արձագանքել անխտիր բոլոր պաշտոնյաների ելույթներին, հրապարակումներին, սոցցանցային գրառումներին: Անգամ եթե նրանց՝ անխտիր բոլոր պաշտոնյաների, մեծուփոքր չինովնիկների ասածներում տեղ է գտել վրիպում, թվային անճշտություն, մտքի կամ լեզվաոճական սայթաքում, չի կարելի ոչինչ ասել եւ վերջ: Հակառակ դեպքում լրատվամիջոցը կամ անհատը կտուգանվեն 700 հազար դրամից մինչեւ 1 միլիոն:
Միակ բանը, ինչպես հասկացվում է այս մոտեցումից, այն է, որ նույնությամբ ասվածը (գրառումը, ելույթը, հրապարակումը) պատճենվի և տարածվի: Սա, իհարկե, ոչ միայն գրաքննություն է, այլեւ Սահմանադրությամբ կարծիք եւ տեղեկատվության հայտնելու իրավունքի խախտում:
Նշենք, որ այս որոշման վերաբերյալ Հայաստանի ժուռնալիստների միության նախագահ Սաթիկ Սեյրանյանը դիմել է Հայաստանի Հանրապետության մարդու իրավունքների պաշտպան Արման Թաթոյանին՝ ընդգծելով, որ նշված փոփոխությունը խախտում է Սահմանադրությամբ նախատեսված կարծիքի արտահայտման ազատությունը եւ համաչափ չէ հետապնդվող իրավաչափ նպատակին։
<<Կարծիքի արտահայտման ազատությունը ցանկացած ժողովրդավարական պետության հիմնասյուներից մեկն է, եւ անգամ ռազմական դրության պայմաններում այդ ազատության սահմանափակումները պետք է լինեն օրինական:
Ամփոփելով՝ արձանագրում ենք, որ նշյալ փոփոխությունները ոչ միայն խոչընդոտում են ԶԼՄ-ների աշխատանքը, այլեւ անհամաչափ կերպով սահմանափակում են կարծիքի արտահայտման ազատությունը, զրկում քաղաքացիներին հանրային մեծ հետաքրքրություն ներկայացնող ազգային անվտանգության հարցերի շուրջ կարծիք արտահայտելու եւ տեղեկատվություն ստանալու իրավունքից՝ միաժամանակ, հակասելով պետության ստանձնած միջազգային պարտավորություններին եւ ժողովրդավարական պետությունների մոտեցումներին»նշված է ՄԻՊ-ին ուղարկված գրության մեջ։
Իշխանությունը հիմնավորում է, որ նման քայլի գնում է ազգի միասնականությունը պահպանելու, խուճապ չառաջացնելու եւ նման այլ բաների համար: Սակայն Նիկոլ Փաշինյանի հոգեղեբայր պատգամավոր Արման Բաբաջանյանին պատկանող լրատվամիջոցները շարունակում է այլանդակ հակաքարոզչություն անել նախկինների դեմ, հարցազրույցներ, կարծիքներ ներկայացնել, որոնք, պառակտիչ եւ քայքայիչ նշանակություն ունեն: Իհարկե, դրանք իշխանության գծի մեջ են, նախկինների դեմ, բայց արդյունքը դրանից չի փոխվում: Օրինակ, որ Փաշինյանի ՝ դավաճանների մասին հայտնի գրառման հերոսը՝ ձերբակալված անձը Արցախում հանդիպել է ԱԱԾ նախկին տնօրեն Արթուր Վանեցյանի, նախկին նախագահներ Ռոբերտ Քոչարյանի եւ Սերժ Սարգսյանի հետ: Կամ հենց երեկ հարցազրույց են հրապարակել նախկին ՀՀԿ-ական աբիժիկներից մեկի Բուռնաշ մականունով Աշոտ Աղաբաբյանի հետ, ով հագուրդ է տվել կայքի մարմաջներին եւ մառազմատիկ բարբաջանքներ դուրս տվել, ասելով. «Դավաճանները սպասարկում են Ալիևի զավակների՝ Ռոբերտ Քոչարյանի, Սերժ Սարգսյանի շահերը»: Եթե այսքանից հետո Փաշինյանը իր հոգեղբորը հրապարակավ չգամեց անարգանքի սյունին՝ ակնհայտ պառակտիչ գործողություններով զբաղվելու համար, ապա բոլոր հիմքերն ունենք պնդելու, որ սա ընդդիմադիր մամուլի բերանը փակելու նպատակով է արվում:
Հետևեք մեզ Viber-ում
