«Վարչապետը հասկացավ, որ ես կապ չունեմ». Հակոբ Բեգլարյան

«Յուրաքանչյուր պետական հիմնարկի, յուրաքանչյուր նախարարության հիմնական գործառույթների 50%-ից ավելին գնումներն են: Իսկ ես աշխատել եմ Գնումների գործակալությունում և յուրաքանչյուր ոլորտի հետ ես կարող եմ զրուցել, խոսել»,- այսօր ԱԺ-ում լրագրողների հետ զրույցում հայտարարեց ՀՀԿ ԳՄ անդամ Գագիկ Բեգլարյանի եղբայրը՝ ՀՀԿ պատգամավոր Հակոբ Բեգլարյանը: Դիտարկմանը, որ նրան պաշտոնեական դիրքի չարաշահման պատճառով են ազատել գործից, Բեգլարյանը պատասխանեց, թե ինքն է հրաժարական տվել. «Ազատվել եմ իմ դիմումի համաձայն, ես այդ ժամանակ ուղղակի աջակցման կենտրոնի տնօրեն եմ եղել: Ես կապ չեմ ունեցել»: «Վարչապետը հասկացավ, որ ես ոչ մի կապ չունեմ գնումների հետ և մեկ ամիս հետո ինձ ավելի բարձր պաշտոն առաջարկեց, որի համար ես իրենից շատ շնորհակալ եմ», - ասաց պատգամավորը: Հարցին` բարձրացնելո՞ւ է ԱԺ-ում գնումների հետ կապված խնդիրները, Բեգլարյանը պատասխանեց. «Ես միայն իմ գլխի տերը չեմ, ֆրակցիայի անդամ եմ, բոլոր հարցերը կքննարկենք, անպայման առաջ եմ քաշելու ամեն հարց, որը անհանգստացնում է մեր երկրի բնակիչներին»: Դիտարկմանը, որ եթե թույլտվություն լինի՝ կոռուպցիայի մասին կխոսեք, եթե չլինի՝ չեք խոսի, Բեգլարյանը հակադարձեց, թե՝ ոչ, նեգատիվ երևույթների մասին բոլորը միասին իրար հետ պետք է խոսեն: Կոնդում իր կողմից ընտրակաշառք բաժանելու փաստը Բեգլարյանը հերքեց. «Տենց բան չի եղել և չի կարող լինել»: