Ծառուկյան դաշինքի առաջին փորձությունը տապալվեց
Վեցերորդ գումարման առաջին նիստի մեկնարկին պայթեց Ծառուկյան դաշինքի ընդդիմադիր կերպարը: Մինչեւ այն պահը, երբ Ազգային ժողովը ընտրեց խորհրդարանի նոր նախագահին, դաշինքի անդամները եւ անձամբ Գագիկ Ծառուկյանը հասցրեցին հայտարարել, թե քանի որ Ծառուկյան դաշինքը իշխանության հետ չէ, ապա ընդդիմադիր է: Թե ինչին է ընդդիմադիր, հարցից պարոն Ծառուկյանը մի քիչ զայրացավ, բայց ըստ էության չպատասխանեց.«Ոնց՝ ինչի եմ ընդդիմադիր: Հիմա քո վիճակը ես ուզում եմ հասկանամ, տղա ջան, պարտքերի տակ խորացած, վարկերի տակ խեղդված ես, չէ՞, տուն էլ չես կարում առնես, դու ասում ես՝ ինչի՞ ես ընդդիմադիր: Ես ասում եմ… բայց բերանդ խի՞ ես բացում, խի՞ ես խնդում, ուզում եմ հասկանամ»,- ասաց Ծառուկյանը հավելելով, որ Հայաստանում ընտանիքների մեծ մասը վարկառու են, վարկ են վերցնում, որ պարտքը փակեն: «Դու բերանդ բացած առանց հասկանալու խնդում ես»,-բարկացավ նա լրագրողի պահվածի վրա: Դեռեւս երեկ ՀՀԿ-ն հայտարարեց, որ խորհրդարանի խոսնակի պաշտոնում ներկայացնելու է հայտնի բժիշկ Արա Բաբլոյանի թեկնածությունը: Բնական է, որ իշխանության կոալիցիոն գործընկեր Դաշնակցությունը պետք է պաշտպաներ ՀՀԿ-ի թեկնածուին, բայց որ նույնը կաներ Ծառուկյան դաշինքը, որը հանդես է գալիս ընդդիմության դիրքերից, սպասելի չէր: ՀՀԿ-ին կոնտր թեկնածություն առաջարկեց ընդդիմադիր Ելք դաշինքը, այդ թեկնածուն պատգամավոր, Լուսավոր Հայաստան կուսակցության ղեկավար Էդմոն Մարուքյանն է: Երկու թեկնածուներն էլ խորհրդարանում ծրագրային ելույթներով հանդես եկան, երկու թեկնածուների թիմակիցները պաշտպանական ելույթներով, եւ արդարացիորեն ընդդիմադիր թեկնածուն շահեկանորեն լավ ներկայացավ: Սակայն ԱԺ նախագահի ընտրությունը տեղի է ունենում փակ քվեարկությամբ, ինչն էլ Ծառուկյանի թիմակիցների ազատ քվեարկության հնարավորություն տվեց: Նրանք առանձնակի եռանդով ակտիվ մասնակցեցին քվեարկությանը, որի արդյունքները հետեւյալն են՝ Բաբլոյանի օգտին 88 հոգի է քվեարկել, Մարուքյանի օգտին՝ 12: Ելք դաշինքը բաղկացած է 9 պատգամավորից, այսինքն Մարուքյանը ընդամենը 3 ավել ձայն է ստացել, իսկ ՀՀԿ-ն ու ՀՅԴ-ն միասին 65 պատգամավոր են անում եւ կարող էին շատ հանգիստ միասին հաղթական արդյունք ապահովել: Այս պարագայում առնվազն ծիծաղելի է Ծառուկյան ընդդիմադիր դաշինքի ցուցաբերած աջակցությունը: Խորհրդարանում ամենամեծ ընդդիմադիր խմբակցությունը սեփական թեկնածուն առաջադրելու փոխարեն եւ ընդդիմադիր լինելու մասին հայտարարություններն ամրապնդելու նկատառումներից ուղղակի պարտավոր էր սեփական թեկնածուին առաջադրել, բայց եղավ այն, ինչ մեծ հաշվով սպասում էին շատերը: Քաղաքականություն վերադարձած Գագիկ Ծառուկյանը այսպիսով տապալեց իսկական ընդդիմադիրի կերպարը եւ առաջին իսկ փորձության ժամանակ կանխորեշեց դաշինքի տեղն ու դերը, որը կանխատեսելի, կառավարվող ընդդիմությունից ավել չի կարող դառնալ: «Ելք» խմբակցության ղեկավար Նիկոլ Փաշինյանն ընդդիմադիր ԲՀԿ անդամ Միքայել Մելքումյանից հետաքրքրվեց՝ ինչո՞ւ են «Ծառուկյան» դաշինքի 31 պատգամավորներից միայն 3-ը քվեարկել ԱԺ նախագահի պաշտոնում առաջադրված ընդդիմադիր միակ թեկնածու Էդմոն Մարուքյանի օգտին: Միքայել Մելքումյանն ասաց, որ խմբակցությունն ընդունել է քաղաքական որոշում՝ թողնել ազատ. «Յուրաքանչյուր թեկնածու քվեարկել է իր խղճի մտոք, այնպես, ինչպես ինքը գտնում է նպատակահարմար»։ Նիկոլ Փաշինյանն էլ արձագանքեց. «Ցավալի է, որ ձեր անդամների խիղճը նրանց տարել է դեպի Հանրապետական»: Նա նշեց, որ չնայած այն հանգամանքին, որ «Ծառուկյան դաշինք» ընդդիմադիր խմբակցությունը չի քվեարկել իրենց թեկնածուի օգտին, իրենք կողմ կքվեարկեն Միքայել Մելքումյանի թեկնածության օգտին, դեմ կքվեարկեն ՀՀԿ թեկնածուների օգտին՝ անկախ նրանից, թե ինչ վերաբերմունք ունեն անձնապես թեկնածուներ Արփինե Հովհաննիսյանի, Էդուարդ Շարմազանովի նկատմամբ: «Քաղաքականությունը հնարավորինի արվեստ է, բազմաշերտ երևույթ է իրենից ներկայացնում։ Շատ խոր քննարկումներ են եղել, որոշվել է, որ յուրաքանչյուրը քվեարկում է ազատ, խղճի մտոք»,-ասաց Միքայել Մելքումյանը։ Անի Սահակյան