Մենք թուրքերի համար վերջին ոսկոր ենք. Աննա Աբրահամյան (video)

Ամենայն պատասխանատվությամբ ասում եմ՝ Թուրքիայի ու Ադրբեջանի այս գործողություններն ամբողջությամբ սպասելի էին։ Վերջին երկու տարում, երբ հայկական կողմը խաղաղասիրական կոչեր էր անում, այս պետությունները պատրաստվում էին իրականացնել նման լայնամասշտաբ գործողությունները։ Այս մասին «Արմնյուզ» ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է միջազգայնագետ Աննա Աբրահամյանը։
Ըստ միջազգայնագետի՝ այսօր ռազմական գործողությունների «բեմում» Թուրքիան ու Ադրբեջանը համատեղ ջանքերով Հայաստանը միջազգային բոլոր հարթակներում ներկայացնում են որպես ագրեսոր․ «Կրկնում եմ՝ այս հարձակումը ոչ միայն կանխատեսելի էր, այլև տարբերվում էր մյուս բոլոր հարձակումներից, քանի որ այսօր գործում է թուրք-ադրբեջանական տանդեմը»։
Հարցին՝ ինչպե՞ս եք գնահատում միջազգային արձագանքը՝ մեր տարածաշրջանում ընթացող պատերազմի վերաբերյալ, Աննա Աբրահամյանը նշել է․ «Թուրքադրբեջանական հերթական հաջողությունը, որը տեղի է ունեցել մեր թողտվությամբ այն է, որ նախապատրաստվելով լայնամասշտաբ պատերազմի, այս պետությունները ակտիվ լոբինգ են իրականացրել Վաշինգտոնում, ինչպես նաև Եվրոմիությունը»։
Ըստ Աննա Աբրահամյանի՝ թուրքական երկու պետություններն ունեն հարձակման լեգիտիմ բազա, դա է պատճառը, որ միջազգային հարթակներից չեզոք հայտարարություններով են հանդես գալիս․ «Այսօր կան գեոքաղաքական այնպիսի պայմաններ, որ մենք պետք է օգտվենք «խաղում» փոխվող իրողություններից ու օգտագործել մեր դիվանագիտական ներուժը»։