Նրանք են առաջնագծում.ով ով է
ՀՀԿ-ն որոշել է, որ խմբակցությունը շարունակելու է ղեկավարել Վահրամ Բաղդասարյանը, քարտուղարը կլինի Գագիկ Մելիքյանը։ ՀՀԿ-ն նաև առաջարկելու է այժմ գործող 12 մշտական հանձնաժողովները կրճատել և դարձնել 9-ը։ ՀՀԿ-ն կունենա վեց հանձնաժողով։ Շարմազանովի խոսքով՝ Ֆինանասաբյուջետային հանձնաժողովը կգլխավորի Գագիկ Մինասյանը, Արտաքին հարաբերությունների հանձնաժողովը՝ Արմեն Աշոտյանը, Տնտեսական հարցերի հանձնաժողովը՝ Խոսրով Հարությունյանը, Պետաիրավական հարցերի հանձնաժողովը՝ Հրայր Թովմասյանը, Ներքին գործերի և պաշտպանության հանձնաժողովը՝ Կորյուն Նահապետյանը: Վահրամ Բաղդասարյանի վերանշանակումը միանշանակ հասկանալի է: Խմբակցության ղեկավարի պաշտոնը զբաղեցնող անձնավորությունը պետք է լինի ինչպես սեփական, այլ գործընկեր թիմերի կողմից ընդունելի, միեւնույն ժամանակ թիմի ներսում ազդեցիկ անձնավորությունը, որը կարող է ցանկացած պահի կազմակերպել թիմակիցներին, հավաքել խորհրդարանում ու ապահովել քվեարկությունների ընթացքը: Այս առումով Բաղդասարյանը արդարացրել է իրեն տված վստահությունը եւ պետք է ասել, որ վատ չի արել այդ գործը, ինչի արդյունքում վերանշանակվեց: Նշենք, որ ՀՀԿ խմբակցության ղեկավարի պաշտոնում շրջանառվում էր նաեւ Արմեն Աշոտյանի թեկնածությունը, նա թեեւ խիստ գրագետ եւ կազմակերպչական ձիրք ունի, բայց միանշանակ չի ընկալվում թե հարազատ կուսակցության ներսում, առավել եւս խորհրդարանում ամենամեծ ընդդիմադիր ուժի ներսում: Հետեւաբար առավել քան ճիշտ որոշում է կայացվել՝ նրան նշանակելով արտաքին հարաբերությունների հանձնաժողովի ղեկավար: Կարելի է ասել, որ Աշոտյանի երազանքն ի կատար է ածվել, ՀՀԿ-ում արտաքին կապերի գծով պատասխանատու Աշոտյանը տարին տասներկու ամիս կշրջագայի ու առաջ կտանի Հայաստանի արտաքին քաղաքականությունը: Գագիկ Մինասյանը վերանշանակվել է իր ղեկավարած հանձնաժողովի նախագահի պաշտոնում, հակառակը սպասել, պարզապես անմտություն կլիներ: Քանի որ ՀՀԿ-ի այս ճահիճը մի քանի գումարման ԱԺ-ում պատգամավորության ընթացքում երբեւէ հանդես չի եկել ինքնուրույն, էլ չասած համարձակ կարծիքով, մշտապես առաջ է տարել կուսակցական ղեկավարների տեսակետը, նրանց դամն է պահել: Եւ ուրեմն ինչու նորից չպահպանել կայուն ճահիճը: Տնտեսական հարցերի հանձնաժողովը կարեւոր նշանակություն ունի տնտեսական քաղաքականության հաստատման առումով, այս հանձնաժողովի նախագահը մշտապես եղել է Սերժ Սարգսյանի «մարդը», որը հարկ եղած դեպքում կանխել է որեւէ նախագիծ «սղղացնելու» կառավարության փորձերը։ Այդ գործը անցած խորհրդարանում փայլուն կատարում էր Վարդան Այվազյանը: Հատկապես հիմա, երբ Սերժ Սարգսյանի ու վարչապետ Կարեն Կարապետյանի միջեւ 2018-ից հետո իշխանություն վերցնելու աչ բացահայտ պայքար է ընթանում, շատ կարեւոր է, թե ով է լինելու այդ պաշտոնում: Խոսրով Հարությունյանը, որը մշտապես ջրի վրա է կարողացել մնալ ու Սերժ Սարգսյանի միջոցով անձնական ու ընտանեկան հարցեր է լուծել, որդուն, փեսային պաշտոնների նշանակել, ըստ ամենայնի խոստացել է կյանքի գնով անառիկ պահել այդ դարպասը: Բնականաբար Հրայր Թովմասյանին պետք է հանձնեին Պետաիրավականի ղեկավարումը, ով նոր Սահմանադրության եւ Ընտրական օրենսգրքի հեղինակներից է ու թերեւս փայլուն տիրապետում է ոլորտը: Նույնը կարելի է ասել Կորյուն Նահապետյանի մասին, որի միակ թերությունը խիստ զգուշավորությունն է, ինչպես նաեւ Սամվել Ալեքսանյանի փեսան լինելու փաստը: Նա այդուհանդերձ օրինաստեղծ եւ գիտակ պատգամավոր է, որը սակայն ընտրություններին 1000 ձայն հավաքեց, բայց Ալեքսանյանի փեսան լինելու արժանիքի համար վերանշանակվեց իր պաշտոնում: Անի Սահակյան