Փաշինյանի տան պատերն այսօրվա իշխանության դեմքն են.Սոնա Աղեկյան. video
Նիկոլ Փաշինյանը Կառավարության նիստին հերթական սուտն ասաց՝ նշելով, որ կորոնավիրուսով պայմանավորված սրացումներ կան ու հնարավոր են նոր սահմանափակումներ։ Այս մասին «Արմնյուզ» ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է «Երևանի այլընտրանք քաղաքապետարան» նախաձեռնության համահիմնադիր Սոնա Աղեկյանը։
Աղեկյանի համոզմամբ՝ Նիկոլ Փաշինյանն այս փուլում դիտավորյալ է նման հայտարարություններ արել, «Քանի որ Նիկոլ Փաշինյանը տեսնում է՝ նախապատրաստում են հանրահավաքներ, այսպիսի հայտարարությամբ փորձում է վախ տարածել, որպեսզի խուսափի իր քաղաքական «վախճանից»»։
Հոգեբան Կարինե Նալչաջյանի դիտարկմամբ էլ կորոնավիրուսի թեման բավականին նուրբ ու զգայուն է․ «Չեմ կարող ժխտել կորոնավիրուսի առկայությունը, բայց լրջության ու հարգանքի խնդիր կա։ Մենք ուզում ենք հասկանալ՝ ի՞նչ հիմքերի վրա է վարչապետը հայտարարում, որ երկրում սրացումներ կան»։
Ըստ հոգեբանի՝ կորոնավիրուսային պատմությունը շատ թաքնված ենթաշերտեր ունի․ «Մենք այդպես էլ չենք հասկանում՝ վարչապետն ի՞նչ մասնագետների հետ է խորհրդակցում ու այսպիսի հայտարարություններ անում։ Մարդուն, եթե ուզում են հոգեբանորեն վնասել, ապա դնում են անորոշության մեջ։ Մենք հիմա այդ անորոշության մեջ ենք»։
Սոնա Աղեկյանը պնդում է, որ ինքը չի հավատացել ու չի հավատում, որ Հայաստանում կորոնավիրուս եղել է ու մարդիկ էլ մահացել են կորոնավիրուսային հիվանդությունից․ «Մենք ստանում ենք ահազանգեր, որ այն մարդիկ, որոնք ասում են՝ մահացել են կորոնավիրուսից, այդ մարդկանց դիերը խոշտանգված են եղել»։
Խոսելով վերջին երկու տարում քաղաքական ու սոցիալական տարբեր առիթներով կանանց՝ մասնավորապես վարչապետի տիկնոջ՝ Աննա Հակոբյանի ակտիվության մասին, հոգեբանը ներկայացրել է դրա հոգեբանական նշանակությունն ու ազդեցությունը․ «Ցանկացած քաղաքակիրթ երկրում երկրի ղեկավարի կինն ունի ֆունկցիաներ, բայց պետք է կատարի առաջին տիկնոջ ֆունկցիաներ, ոչ թե երկիրը ղեկավարելու որոշումներին խառնվի։ Տպավորություն է՝ Նիկոլ Փաշինյանի կինը փորձում է երկրի կառավարման խառնվել»։
Ըստ հոգեբանի՝ անհասկանալի է Աննա Հակոբյանի՝ բանակային հարցերին ներգրավվելը․ «Հիշում ե՞ք Աննա Հակոբյանի վերջին լուսանկարները զինվորական համազգեստով։ Դրանք կարծես հակասում էին իր հայտարարություններին՝ խաղաղասիրական կոչերին։ Պատերազմող երկրում խաղաղասիրություն քարոզելը պացիֆիզմ է»։
Սոնա Աղեկյանի խոսքով էլ՝ մարդիկ, որոնք որևէ կապ չունեն բանակի հետ, իրենց ներկայությունն են փորձում ցուցադրել այդ ոլորտում։
Հետևեք մեզ Viber-ում
