Կառավարությունը քաղաքացիների տունը չէ՞, կուզեն դագաղ կդնեն,ինչ կուզեն, կանեն

Կառավարարության շենքի մոտ «Այլընտրանք» ՀԿ-ի անդամները արտասովոր ակցիա են իրականացրել, տեղադրել են դագաղ, տնական օղու մեծ շիշ, պինցետ և պաստառ «Նիկոլ, մարդասպան» գրությամբ: Ակցիայի նախաձեռնության հեղինակները այսպիսով ցանկանում են ցույց տալ իշխանության ապիկարությունը կորոնավիրուսի դեմ պայքարում, իսկ պինցետն ու օղու շշի առկայությամբ խորհրդանշում վարչապետի հայտարարությունը, թե կորոնավիրուսն ում շունն է, պինցետով կքաշենք, տնական ողիով կսպանենք:
Ըստ ամենայնի՝ ակցիան դուր չի եկել իշխանություններին եւ հրահանգել են բեման ենթարկել մասնակիցներին: Ոստիկանության եւ վերջինների միջեւ քաշքշուկի արդյունքում բերման է ենթարկվել «Այլընտրանք» ՀԿ ղեկավար Նարեկ Մանթաշյանը:

Նա ասել է, որ իրեն բերման ենթարկելու որոշում է կայացվել, քանի որ ոստիկանները կասկածներ ունեն, որ դագաղում կարող են լինել պայթուցիկ նյութեր. «Ինձ տանում են հետագա պարզաբանման: Դագաղ ենք տեղադրել, որովհետև այս իշխանությունը մահվան դեպքերին նայում է մատների արանքով: Նրանք մահերին նայում են որպես իրենց հերթական քաղաքական ակցիայի: Եւ մեր ասելիքն ավելի խորհրդավոր դարձնելու համար բերել եմ այս դագաղը, որի վրա կորոնավիրուսից մահացածների թիվն է, որ իրենք հասկանան՝ ամեն դագաղ մարդու կյանք է Ես չեմ բերել այս դագաղը՝ նրանցից որևէ մեկի մահը ցանկանալով, մենք իրենց նման չենք, որ տանենք դագաղը դնենք կենդանի մարդկանց տան մոտ: Սա ընդամենը խորհրդանիշ է»,- ասել է նա իրապես հասկանալով, որ իրեն բերման ենթարկելու պատճառը կառավարության շենքի դիմաց դագաղ տեղադրելն է:
Երբ այսպես կոչված թավշյա հեղափոխության օրերին ներկայիս իշխանականները դագաղներ էին տեղադրում նախկինների բնակարանների, տների առջեւ եւ շենքի բակերում, սեւ ժապավեններ կապում մայթերին՝ վրա գրված օրինակ «Աշոտյան 40», կամ ծաղկեպսակներ էին տեղադրում նախկինների դռների առջեւ, կամ կազմակերպում էին Սերժ Սարգսյանի հուղարկավորթյունը, հասարակության զոմբի հատվածը ցնծության մեջ էր, իսկ սթափները՝ սարսափած հորդորում էի չանցնել կարմիր գծերը, գոնե միայն այն բանի համար, որ այս ատելության ու թշնամանքի մթնոլորտը բումերանգի էֆեկտով մի օր չոքելու է հեղափոխականների դուռը:

Կարծես թե եկել է այդ ժամանակը եւ Նիկոլ Փաշինյանի ու իր կուսակցության դեմ պայքարում են ճիշտ նույն գործիքներով, ինչպես իրենք: Լավ է դա , թե վատ, հարցի մյուս կողմն է, բայց իշխանությունն առնվազն չունի բարոյական իրավունք բերման ենթարկել, պատասխանատվության ենթարկել նման ակցիա իրականացնող քաղաքացիներին: Հատկապես, որ Նիկոլ Փաշինյանը հայտարարել է, թե կառավարությունը բոլոր քաղաքացիների տունն է, կուզեն դռնով կմտնեն, կուզեն պատուհանով, ինչ կուզեն կանեն: Հիմա կա քաղաքացիների մի խումբ, որոնք ուզում են իրենց դռան դեմը դագաղ դնել, դուք ով եք, որ արգելում եք նրանց:

Անի Սահակյան