Նիկոլ Փաշինյան, դու շատ լավ գիտես՝ խաղողագործության մեջ որտեղ է ստվերային տնտեսությունը. Հրաչ Բերբերյան (video)
Ես համաձայն չեմ «իշխանափոխություն» կամ էլ «հեղափոխություն» բառերի հետ։ Երկու տարի առաջ Արևմուտքը Հայաստանում Նիկոլ Փաշինյանի միջոցով հեղաշրջում իրականացրեց, այս մարդկանց բերելով իշխանության՝ մեր երկրի գլխին պատուհաս դարձնելով։ Այս մասին «Արմնյուզ» ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է ֆերմեր Տիգրան Եղոյանը։
Ֆերմերի խոսքով՝ երկիր պահողը գյուղատնտեսությունն ու գյուղացին են, սակայն գործող իշխանությունն ամեն կերպ ոչնչացնում է դրանք․ «Երբ գյուղացին փորձեց խոսել, պարզ, հստակ հասկացրին՝ սսկվեք ու նստեք ձեր տեղը։ Իրենք ցույց տվեցին, որ իրենց նպատակն է գյուղատնտեսությունը քայքայելը»։
Տիգրան Եղոյանը պնդում է, որ ինքը դեռ ամիսներ առաջ է բարձրաձայնել, որ խոշոր եղջերավոր կենդանիների շրջանում տարածված է հիվանդություն, բայց ոչ միայն իրեն չլսեցին, այլև ամեն կերպ լռեցրին․ «Ես խոսել եմ ու շարունակելու եմ խոսել գյուղատնտեսության ոլորտում եղած խնդիրների մասին, բայց ենթարկվում եմ հետապնդումների, սակայն չեմ լռելու»։
աղորդման մյուս հյուրը՝ «Ագրարագյուղացիական» միավորման նախագահ Հրաչ Բերբերյանը կիսում է ֆերմերի մտահոգությունը անասնաբուժական հիվանդությունների հետ կապված․ «Շատ դեպքերում անասնաբուժական հիվանդությունները շատ ավելի վտանգավոր են, քան անգամ կորոնավիրուսը։ Տգետ են, դրա համար էլ չեն հասկանում իրական վտանգների մասին»։
Անդրադառնալով խաղողագործությանը՝ Հրաչ Բերբերյանն ասել է․ «Կա երկու մոտեցում, որոնցից ոչ մեկը չարեց այս կառավարությունը՝ մի կողմից կարող էին սուբսիդավորել գյուղացուն, մյուս կողմից էլ ֆինանսավորել գործարանները։ Բայց մենք տեսնում ենք, որ ոլորտում ստվերային տնտեսությունն է աշխատում»։
Ըստ Հրաչ Բերբերյանի՝ Նիկոլ Փաշինյանը շատ լավ գիտի՝ գինու գործարաններում ստվերային տնտեսությունը որտեղ է։
Հարցին՝ չե՞ն հասկանում, որ չեն կարողանում ոլորտը վերահսկել, թե՞ գործարքների են գնում գործարարների հետ, Բերբերյանը պատասխանել է․ «Բազմիցս ասել եմ՝ կառավարությունում կա՛մ գրագետ մարդիկ չկան, կա՛մ էլ համակերպվել են այս իրողության հետ։ Երբ ֆերմերները այսպես բողոքում են, դա գալիս է նրանից, որ համակարգային փոփոխություններ գյուղատնտեսության ոլորտում չեղան»։
Հետևեք մեզ Viber-ում
