Նիկոլ Փաշինյանը հուշում է, որ պետք է իր հրաժարականը պահանջել

Նիկոլ Փաշինյան-Գագիկ Ծառուկյան բախումն անցնում է վտանգավոր եզրագծերը։ Իշխող թիմը, ի դեմս Նիկոլ Փաշինյանի, չի հանդարտվում։ Մեկը մյուսին ուղղված «բռնաբար», «հոգեկան հիվանդ» մեղադրանքներից հետո, Փաշինյանը նոր տողից սկսեց առճակատումը։ Նա ի պատասխան Ծառուկյանի առաջարկի, որ ժամանակն է Սահմանադրությամբ ամրագրել հոգեկան հիվանդների՝ պետական բարձր պաշտոններ չզբաղեցնելու հարցը, հայտարարեց․ «Գագիկ Ծառուկյանը գրել գիտի՞»։

Հետաքրքիր է՝ եթե Գագիկ Ծառուկյանը գրել չգիտի, ով էր Նիկոլ Փաշինյանի հետ թավշյա հեղափոխությունից հետո հուշագիր ստորագրում։ Եթե Ծառուկյանը գրել չգիտի, կամ պարզ ասած՝ անգրագետ է, ինչը վարչապետի հարցադրման տողատակում է, ապա ինչու էր Նիկոլ Փաշինյանը նրան օլիգարխից մաքրում՝ դարձնելով խոշոր սեփականատեր, բա եթե Ծառուկյանն անգրագետ էր, կնշանակի իր ուժի միջոցով վարչապետ դարձած մարդն ու իշխանությունն էլ են անգրագետ, էլ ինչ սպասել «անգրագետների» ձեւավորած իշխանությունից։ Եթե Ծառուկյանը անգրագետ է, դու էլ ինչպես դասականը կասեր՝ «կուլտուրական» մարդ, ինչ գործ ունեիր նրա գործարանների բացմանը։ Եւ վերջապես, ով խոսի անգրագիտությունից, Նիկոլ Փաշինյանը պետք է լռի։ Երկուսուկես տարվա վարչապետը մի քանի օր առաջ Բելառուսին տարավ ու անդամակցեց Եվրոպայի խորհրդին, սա արդեն տգիտություն է, մարտնչող տգիտություն, պարզապես չենք հիշեցնում նախկինում արված անգրագետ հայտարարությունները։

Իսկ ընդհանրապես ամբողջ ազգին Փաշինյանի անգրագետ պատգամավորներն են զվարճացնում, ինքն եկել, ընկել է ուրիշների ետեւից։
Հա, երեւի իր ԿԳՍՄ նախարար Արայիկ Հարությունյանն է գրագետ, ով լինելով կրթական ոլորտի պատասխանատու մեկ քառյակ անգամ անգիր չի կարողանում ասել։
Իրեն այս աստիճան խայտառակելու, շրիշակից ցածր մակարդակի իջնելու եւ Արայիկ Հարությունյանի դեմ ալիքը իր վրա վերցնելու համար մարդն առնվազն լուրջ պատճառներ պետք է ունենար, իսկ Փաշինյանը ցույց տվեց, որ ինքն ունի եւ պատճառն այն է, որ կրթական խայտառակ չափորոշիչների, ապազգային բոլոր ծրագրերի, տրանսգենտերների առջեւ կանաչ լույս վառելու ծրագրերի իդեոլոգն ու դրանք կյանքի կոչելու առաջամարտիկը հենց ինքն է, ոչ թե «պեշկա» նախարարը։

Ուստի Արայիկ Հարությունյանի հրաժարականի փոխարեն, պետք է պահանջել իր հրաժարականը։

Անի Սահակյան