Իշխանության միակ «զենքը» շառ անելն է մնացել
Իշխանությունն ի դեմս ԿԳՍՄ նախարար աշխատող Արայիկ Հարությունյանի այսօր հանրությանը ցույց տվեց իր իրական դեմքը՝ մարտնչող ցինիզմ ու տգիտություն, սա է այն բնորոշումը, որը կարելի է տալ այս անձնավորությանն ու առհասարակ իշխանությանը։ Ինչպես հայտնի է ընդդիմադիր Լուսավոր Հայաստանը նախարարի անվստահության նախագիծ է ներկայացրել, պատճառները բազում են, նրանք այդ համոզմանն են եկել ԿԳՍՄ-ին ուղարկված իրենց հարցապնդման պատասխանը ստանալիս։
«Եթե իմ հրաժարականի հիմքեր լինեն, ես մեկ րոպե ավել չեմ մնա այս պաշտոնին և ինքս դիմում կգրեմ»,- խորհրդարանում ինքնավստահ հայտարարեց սույն նախարարը՝ նշելով, որ ինքը՝ հեղափոխության առաջնորդներից մեկն է եւ չի վախենում նման պահանջներից։ Փաստորեն կրթական ապազգային չափորոշիչները, սեռափոխված Մել Դալուզյանի մասին ֆիլմի ֆինանսավորումը, տրանսվեստիտ Կարաբինայի հետ հանդիպումը, ընդունելության քննությունների խայտառակությունը չեն կարող հրաժարականի հիմք դառնան, քանզի սույն պարոնը հեղափոխության ռահվիրաներից է։ «Այդ բողոքները կապված են այն մեծ ռեֆորմների փաթեթի հետ, որն իրականացվում է: Որոշ քաղաքական շրջանակների մտահոգությունը կապված է այն հանգամանքի հետ, որ այս բարեփոխումների արդյունքում մենք ունենալու ենք մի սերունդ, որն այլևս իրենց հենքը չի հանդիսանալու, լինելու է քննդատող, վերլուծող: Իսկ եթե քննադատող, վերլուծող սերունդը եթե վերլուծի այդ շրջանակների գործունեությունը, ապա միանգամից որոշում կկայացնի, որ երբևէ որևէ առիթով այդ շրջանակներին չի սատարելու: Տարբեր շղարշների տակ, կեղծ արժեքների անվան տակ պայքար իրականացնող խմբերը այլևս զրկվելու են հասարակության մեջ որևէ աջակցությունից: Հիմա էլ առանձնապես շատ քիչ աջակցություն ունեն: Այդ դեպքում ընդհանրապես չեն ունենալու»:
Փաստորեն, ըստ Հարությունյանի՝ իր հրաժարականը պահանջողները վախենում են, որ իր ռեֆորմների արդյունքում այնպիսի մի սերունդ կդաստիարակվի, որ կմերժի նրանց: Իսկ դա նշանակում է, որ իր ռեֆորմների արդյունքում առնվազն արայիկհարությունյաններ կբուծվեն, որոնք կմերժեն նաեւ ազգային արժեհամակարգը։
Բայց քանի որ իր արժեհամակարգն այնքան ընդունելի է ողջ իշխանության համար, սույն պարոնն իրեն թույլ է տալիս նաեւ վիրավորել քաղաքական հակառակորդներին, զրպարտել նրանց, շահարկել Ծառուկյանի առնչությամբ բռնաբարության գործը, որով ի դեպ նա 22 տարի անց արդարացվել է։
«Գիտե՞ք թե չափորոշիչները ինչի մասին են, էս չափորոշիչները ապագայում մի խումբ կոտայքցիների կսովորեցնեն հարգել դիմացինին, ղեկավարել սեփական հորմոնները, սիրել եկեղեցին եւ այլեւս եկեղեցու տարածքում չի լինի օտարի նկատմամբ սեռական բռնություն»:
Արայիկ Հարությունյանը ակնհայտորեն ակնարկեց տարիներ առաջ ԲՀԿ ներկայիս առաջնորդ Գագիկ Ծառուկյանի մասնակցությամբ տեղի ունեցած խմբակային բռնաբարության գործով դատավճիռը։
Հիշեցնենք, որ ըստ դատավճռի՝ Գագիկ Ծառուկյանը եւ մի քանի այլ անձինք դատապարտվել են ազատազրկման՝ ռուս զբոսաշրջիկներին Աբովյանի շրջանի Առինջ գյուղի մոտ գտնվող «Գետարգել» կոչվող եկեղեցուն կից կիսախարխուլ կառույցի սենյակներում բռնաբարելու համար, բայց ինչպես նշեցինք 22 տարի անց Ծառուկյանն արդարացվել է։
Իմքայլականները Հարությունյանին ծափողջյուններով ճանապարհեցին ԱԺ ամբիոնից՝ ցույց տալով, որ զրպարտելը, մարդուն վարկաբեկելը ոչ միայն նախարարի, այլեւ իրենց բոլորի սիրած զբաղմունքն է։ Այս տեսարանը խղճահարության զգացողություններ էր արթնացնում, քանզի Փաշինյանի միակ զենքը մնացել է դիմացինին շառ անելը։
Անի Սահակյան
Հետևեք մեզ Viber-ում
