Դուք արտոնյալ եք, մնացածը կարևոր չի
Երեկ Գյումրիում Հյուսիսային արտաքին տնտեսական գործունեության սպասարկման կենտրոնի բացմանը մասնակցող Պետեկամուտների կոմիտեի նախագահ Էդվարդ Հովհաննիսյանը լրագրողների հետ զրույցում հայտարարել է, թե Հայաստանում արտոնյալ գործարարներ չկան:
«Հատկապես վերջին երկու տարիներին ՊԵԿ-ի համար արտոնյալներ չկան, և դա մենք մեր աշխատանքով ապացուցել և բազմիցս հիմնավորել ենք: ՊԵԿ-ը գործառույթներ է իրականացնում առհասարակ էն տնտեսվարողների նկատմամբ, որոնք վերաբերյալ ունենում է համապատասխան հիմք, համապատասխան առիթներ: Այս կամ այն շարժառիթով կապելով գործարարի անձը և այլն` Պետական եկամուտների կոմիտեում վաղուց միջոցառումներ, ստուգումներ չեն նախաձեռնվում: Դա ես ձեզ վստահեցնում եմ», - ասաց Հովհաննիսյանը:
ՊԵԿ-ը իր կազմում քննչական վարչություն ունի, որը բացահայտում է տնտեսական բնույթի հանցագործություններ։ Հարցին, թե արդյոք առաջիկայում կլինեն նոր բացահայտումներ, Էդվարդ Հովհաննիսյանը հակիրճ պատասխան տվեց. – «Սպասենք»:
Հիշեցնենք, որ ՊԵԿ-ը հայտարարեց «Բարգավաճ Հայաստանի» առաջնորդ Գագիկ Ծառուկյանին առնչվող նոր քրեական գործի մասին, որը վերաբերում է 2012 և 2017թթ. խորհրդարանական ընտրություններին ընտրակաշառք բաժանելուն։
ՊԵԿ-ը քրեական գործ էր հարուցել նաև Վատիկանում Հայաստանի նախկին դեսպան, նախկին նախագահ Սերժ Սարգսյանի փեսա Միքայել Մինասյանի նկատմամբ՝ ապօրինի հարստացման, հայտարարագրում կեղծ տվյալներ ներկայացնելու և հանցավոր ճանապարհով ստացված գույքն օրինականացնելու հատկանիշներով: Այս դեպքում էլ պաշտոնյան միայն նշեց, որ գործը արդեն այլ մարմինների տիրույթում է. – «Միքայել Մինասյանի նկատմամբ խափանման միջոցը կալանավորումն ընտրելու վերաբերյալ նախաքննության մարմնի միջնորդությունը այս պահին դատարանների քննության տիրույթում է գտնվում: Սպասենք, կունենանք գնահատական»:
Փաստորեն, ըստ իշխանության՝ Հայաստանում արտոնյալ գործարարներ չկան...
Հետաքրքիրն այն է, որ իշխանությունը ձգտում է ապացուցել մի բան, որը որևէ տրամաբանության չի դիմանում: Հայաստանում կա իշխանություն, որն իրեն արտոնյալ պայմանների մեջ է դրել: Սա մեկ:
Հաջորդը, Հայաստանում բոլոր նրանք, ովքեր չեն կիսում իշխանության տեսակետ, կամ քննադատում են իշխանության այս, կամ այն քայլը՝ հետապնդվում են իշխանության կողմից:
Հետևաբար, ցանկացած երբեմնի «արտոնյալ», կարող է հայտնվել «հետապնդվողի» կարգավիճակում:
Ու այս պայմաններում իշխանությունը ցանկանում է, որ Հայաստանում ներդրումնե՞ր իրականացվեն...
Երբ իշխանությունը ցանկացած այլախոհ «արտոնյալ» գործարար կարող է հայտնվել հետապնդվողի կարգավիճակում՝ ինչի՞ մասին է խոսքը:
Կարևորը, որ իշխանության ներկայացուցիչները մնան արտոնյալ պայմաններում: Այ, նրանց ոչինչ չի սպառնում. Պարգևավճարները ստանում են ՀՀ քաղաքացիների հարկերի հաշվին, ծախսերն անում են, իսկ մնացածն արդեն կարևոր չի:
Մետաքսյա Շալունց
Հետևեք մեզ Viber-ում
