Ով ինչ է արել հանուն Տարոն Մարգարյանի
ՀՀ Կենտրոնական ընտրական հանձնաժողովն ամփոփել է Երևանի ավագանու ընտրությունների նախնական արդյունքները: Ըստ նախնական արդյունքների ՀՀԿ-ն հավաքել է 70,96 տոկոս, "Ելք" կուսակցությունների դաշինքը՝ 21,21 տոկոս, իսկ "Երկիր Ծիրանի" կուսակցությունը՝ 7, 84 տոկոս: Հետաքրքիր է պարզել, թե Երեւանի վարչական շրջանները ինչպես են մասնակցել ընտրությանը։Ի տարբերություն խորհրդարանականի, ավագանու ընտրությունները բազում շահեր չէր հետապնդում եւ բոլորի աշխատանքի արդյունքում, ի վերջո, ընտրվելու էր ՀՀԿ-ի քաղաքապետը: Այս կոնտեքստում հետաքրքիր է, թե ովքեր են իրենց ազդեցության տակ գտնվող համայնքներում հավատարիմ մնացել կուսակցությանը՝ անկախ անձնական շահի եւ բարձր ցուցանիշներ ապահովել Տարոն Մարգարյանի համար: Նախ մասնակցության պատկերը՝Աջափնյակ վարչական շրջանում քվեարկությանը մասնակցել է 38,279 ընտրող կամ 45.29 տոկոսը: Ավանում՝ 21,021 ընտրող կամ քվեարկելու իրավունք ունեցողների 52.75 տոկոսը, Արաբկիրում ՝ 37,105 ընտրող կամ քվեարկելու իրավունք ունեցողների 38.82 տոկոսը: Դավթաշեն վարչական շրջանում՝ 14,131 ընտրող կամ քվեարկելու իրավունք ունեցողների 43.67 տոկոսը: Էրեբունի վարչական շրջանում 37,916 ընտրող կամ քվեարկելու իրավունք ունեցողների 40.70 տոկոսը: Կենտրոն վարչական շրջանում՝ 36,925 ընտրող կամ քվեարկելու իրավունք ունեցողների 38.52 տոկոսը, Մալաթիա-Սեբաստիա վարչական շրջանում՝ 35,874 ընտրող կամ քվեարկելու իրավունք ունեցողների 33.28 տոկոսը: Նոր Նորքում՝ 41,236 ընտրող կամ քվեարկելու իրավունք ունեցողների 41.04 տոկոսը: Նորք-Մարաշում՝ 5,422 ընտրող կամ քվեարկելու իրավունք ունեցողների 50.67 տոկոսը: Նուբարաշենում՝ 4,283 ընտրող կամ քվեարկելու իրավունք ունեցողների 52.66 տոկոսը: Շենգավիթում ամենաբարձր մասնակցությունն է՝ 53,493 ընտրող կամ քվեարկելու իրավունք ունեցողների 46.54 տոկոսը: Քանաքեռ-Զեյթունում՝ 19,541 ընտրող կամ քվեարկելու իրավունք ունեցողների 33.23 տոկոսը: Ինչպես տեսանք ընտրություններին, ՀՀԿ-ի աջակիցները ողջ օրը զբաղված էին ընտրողին ընտրատեղամաս ուղեկցելու գործին, բերվում էին տարեց տատիկ-պապիկներ, որոնց մի ոտքը այն աշխարհում էր, քանի որ մասնակցությունից էր կախված նաեւ հաղթանակը: Արդյունքներից պարզ է դառնում, որ Երեւանում խորհրդարանական ընտրություններին ամենաշատ ձայն հավաքած Սամվել Ալեքսանյանի տարածքում՝ Մալաթիայում առանձնապես ջանքեր չեն թափվել, սա երկրորդ ամենացածր մասնակցություն ունեցող համայնքն է ու Տարոն Մարգարյանի օգտին կրկնակի պակաս ձայն է ստացվել , քան Ալեքսանյանի խորհրդարանի ընտրության ժամանակ: Մալաթիայում ընդամենը 24 հազար կողմ է գրանցվել ՀՀԿ-ի թեկնածուի համար: Ավելի վատ է եղել վիճակը Միհրան Պողոսյանի տարածքում՝ Քանաքեռ Զեյթունում: Պողոսյանը խորհրդարանական ընտրությունների ժամանակ կատաղի պայքարի մեջ էր Տարոն Մարգարյանի ու հատկապես նույն տարածքում թեկնածու առաջադրված Ռոբերտ Սարսյանի հետ, ով Մարգարյանի բարեկամն է: Բնական է, որ նրա կողմից աջակցություն չէր լինելու: Բավականին լավ է աշխատել Գալուստ Սահակյանի որդին՝ Արման Սահակյանը, ում ՀՀԿ-ն թույլ չտվեց մանդատը վերցնել, չնայած այն բանի, որ Աջափնյակում ապրիլի 2-ի ընտրությունների արդյունքներով ամենաշատ ձայն ստացած թեկնածուն է: Ավագանու դեպքում եւ մասնակցության ցուցանիշն է բարձր, եւ կողմ ձայների, Տարոն Մարգարյանը Աջափնյակում ստացել է 27 հազարից ավելի ձայն, կամ ընտրողների 73 տոկոսի ձայները: Ընդամենը մեկ ամիս առաջ պատգամավորության թեկնածու եղբոր համար Երեւանի Կենտրոն համայնքը ոտքի հանած Գագիկ Բեգլարյանն էլ առանձնապես մեծ ջանք չի գործադրել: Մոտ հարյուր հազար բնակչություն ունեցող համայնքը ընդամենը 25 հազար ձայն է տվել Տարոն Մարգարյանին, սակայն սա չի կարելի վերագրել Բեգլարյանին, որովհետեւ Կենտրոնում քիչ չեն թաղաքյին հեղինակությունները: Դավիթաշենը 32 հազար ընտրող ունի, բայց մասնակցել են 14 հազարը, 9 հազարն է կողմ քվեարկել Տարոն Մարգարյանի օգտին, այս համայնքը գտնվում է Վլադիմիր Գասպարյանի փեսա Արթուր Գգեւորգյանի ազդեցության ներքո, թաղապետը նրա զարմիկն է:Ինչպես խորհրդարանական ընտրություններին Արթուր Գեւորգյանը քիչ ձայն ստացավ, այնպես էլ հիմա ՀՀԿ-ի քաղաքապետի թեկնածուն, ինչը նշանակում է, որ համայնքում այս մարդիկ առանձնապես մեծ հեղինակություն չեն վայելում: Ենթադրվում է, որ կուսակցությունը անհետեւանք չի թողնի այս ամենը եւ բոլորի հետ շատ շուտով հաշիվները կմաքրվեն: Անի Սահակյան