«Սպիտակ ագռավի» տեսակը պահելու հաղթական քայլը
Շուրջ մեկ ամիս ու դեռ ավելի է, որ Սերժ Սարգսյանը Հանրապետականներին լարվածության մեջ է պահում՝ չհայտնելով նոր խորհրդարանում պաշտոնների մասին: Ամենաինտրիգայինը , այդուհանդերձ, ԱԺ խոսնակի հարցն է: Այս ընթացքում մամուլում խորհրդարանի խոսնակի թեկնածուների բազում անուններ են շրջանառվել: ՀՀԿ փոխնախագահ Արմեն Աշոտյանի անունը, ԱԺ փոխխոսնակ Էդուարդ Շարմազանովի, Նախագահի վերահսկողական ծառայության պետ Ֆելիքս Ցոլակյանի, Տաշիր գրուպի սեփականատեր, ԱԺ պատգամավոր Կարեն Կարապետյանի, նաեւ գործող խոսնակ Գալուստ Սահակյանի անունները: Այսօր՝ մայիսի 17-ին վերջապես Սերժ Սարգսյանը կհայտարարի, թե ով է զբաղեցնելու նոր խորհրդարանի խոսնակի պաշտոնը: ՀՀԿ կենտրոնական գրասենյակում ԳՄ նիստ է հրավիրված, որին կհաջորդի խորհրդի նիստը, որպեսզի տպավորություն ստեղծեն, թե հարցը որոշում են խմբակային, այլ ոչ թե միայն Սերժ Սարգսյանը: Այս ընթացքում հավանական թեկնածուները սահուն շրջանցել են ԱԺ նախագահ դառնալու իրենց ուղղված հարցերին: Թե Շարմազանովը, թե Գալուստ Սահակյանը պատասխանել են, որ հարցը կուսակցության որոշելիք խնդիրն է: Գալուստ Սահակյանը անգամ ասել է, որ իրեն պետք է որպես Գալուստ Սահակյան ընդունել, որ պաշտոնին էլ ինքը լինի: Բայց, ահա, նախագահի ընտրությունից մեկ օր առաջ իր թեկնածությունը արանքից հանեց Կարեն Կարապետյանը՝ հայտնելով ԱԺ նախագահ դառնալու ցանկության բացակայության մասին: Առաջին լրատվականի-ի հարցին, թե որքանով է հավանական իր` ԱԺ նախագահ ընտրվելը՝ Կարապետյանը պատասխանել է. «Ես ինձ ԱԺ նախագահի պաշտոնի թեկնածու չեմ համարում, ես ինձ տեսնում եմ պատգամավորի կարգավիճակում, -ասել է Կարեն Կարապետյանը և հավելել.« Երեսուն տարի նույն բանն եք գրում, շարունակ ինձ կամ վարչապետ, կամ ԱԺ նախագահ եք նշանակում, միթե չհոգնեցիք: Կարծես մեր երկրում այլ, ավելի կարևոր թեմաներ չկան. բոլորին միայն պաշտոններն են հետաքրքրում: Ես ներկայումս արտերկրում եմ, զբաղված եմ իմ գործերով…»: Տարօրինակ կլիներ, եթե Կարեն Կարապետյանը լռեր ու իր այսպես կոչված դատավճիռը թողեր Սերժ Սարգսյանին, ով Կարապետյանների հետ այս պարտիայում , անշուշտ, գրանցելու է իր օգտին հաղթանակը եւ չի նշանակելու նրանց թեկնածուին: Բանն այն է, որ պատգամավոր Կարեն Կարապետյանը ՀՀԿ-ում <<սպիտակ ագռավի>> կարգավիճակ է կերտել ու բոլոր ժամանակներում եւ իրավիճակներում նա իրեն զատել է ամբոխից, սեփական դիրքորոշումը հայտնել, կուսակցությունից տարբեր եւ հաճախ նաեւ քննադատական կարծիքներ հնչեցրել: Խորհրդարանական ընտրություններից հետո նա բառացիորեն ասաց, որ մի ընտրեք ՀՀԿ-ին, որ այդ կուսակցությունը վնասում է իր հեղինակությանը եւ այլն:Իհարկե, այսպիսի հայտարարություն ՀՀԿ-ում ամենը մեկը չէ, որ կարող է անել, Կարեն Կարապետյանը ամուր թիկունք ունի, եղբայրը Հայաստանի տնտեսության դոնորներից մեկն է ու ֆինանսական կապիտալի ներդրման դիմաց քաղաքական հատուցում է ակնկալում յուրայինների համար: Սպիտակ ագռավի տեսակը պահելու ակնհայտ խնդիրը եւս ցույց է տալիս, որ Կարապետյանը ապագայի հետ կապված, իսկապես, պլաններ ունի, գուցե առավել բարձր պաշտոն զբաղեցնելու ցանկություն, որով էլ պայմանավորված դեռ չի ցանկանում պարտված դուրս գալ խաղից: Խնդիրն այն է, որ շատերը, այդ թվում եւ Կարապետյանները հասկանում են, որ Սերժ Սարգսյանը Կարեն Կարապետյանին չի նշանակի խորհրդարանի խոսնակի պաշտոնում, քանի որ դա կնշանակի, որ իշխանությունը փոխանցում է Կարապետյաններին: Ի դեպ, վերջին ժամանակներս Տաշիր գրուպի սեփականատեր եղբայրների եւ վարչապետ Կարեն Կարապետյանի կոալիցիոն պայքարն ընդդեմ Սերժ Սարգսյանի բացահայտ է դարձել: Վարչապետը նախ հայտարարեց 2018-ից հետո վարչապետ դառնալու իր ցանկության մասին, իսկ մայիսի 14-ին Երևանի ավագանու ընտրություններին էլ , երբ լրագրողները հետաքրքրվել էին, թե արդյոք վարչապետը Կարեն Կարապետյանին տեսնում է ԱԺ նախագահի պաշտոնում, վերջինս նշել էր. «Այո, ինչու ոչ»: Այնպես որ այս թեւում 2018-ից հետո իշխանությունը վերցնելու բացահայտ քայլեր են նկատվում՝ հայտարարությունների տեսքով: Անի Սահակյան