Ուր են տանում Ջուլֆալակյանի «հրաժարականի» թելերը

«Իմ քայլը» խմբակցության պատգամավոր, աշխարհահռչակ ու նաև սիրված ըմբշամարտիկ Արսեն Ջուլֆալակյանի մանդատը վայր դնելու մասին հայտարարությունը շարունակում է հանրային քննարկումների տիրույթի թոփ հորիզոնականներում մնալ:
Հանրությունը կարծում ենք, որ դեռ երկար կքննարկի՝ որն էր , ի վերջո, Ջուլֆալակյանի հեռանալու իրական պատճառը: Քանզի բերված փաստարկն ամենեւին համոզիչ չէ ու հարցն էլ այն է, թե հատկապես ի՛նչ ու որքա՛ն անհաղթահարելի տարաձայնություններ ունի Արսեն Ջուլֆալակյանը՝ կրթության, գիտության, մշակույլթի, սպորտի նախարար Արայիկ Հարությունյանի հետ, որ նրա պատճառով վայր է դնում մանդատը: Առհասարակ, Արայիկ Հարությունյանի հետ տարաձայնություններ ունեն Հայաստանի բոլոր ազգային մտածելակերպ ունեցող քաղաքացիները:

Արսեն Ջուլֆալակյանի՝ մանդատը վայր դնելու քայլը ինքնին հետաքրքիր է, բայց ոչ միայն դրդապատճառների ու շարժառիթների համատեքստում, այլեւ քաղաքական առկա իրողությունների:

Գրեթե ոչ մեկը չի կասկածում, որ Ջուլֆալակյանը չէ կարող ինչ որ նախարարի հետ ունեցած անհամաձայնության պատճառով վայր դնել մանդատը, նա այդ քայլին գնացել է շատ ավելի լուրջ պատճառներով, ի վերջո  այս փաստարկը ոչ միայն համոզիչ չէ, այլեւ ծիծաղելի: Քանզի հեչ պարտադիր չէ, որ պատգամավորը համաձայն լինի նախարարի հետ, խորհրդարանական կառավարման համակարգ ունեցող երկրներում եթե կուզեք խորհրդարանն ու կառավարությունը միմյանց փոխզսպող, հակակշռող մարմիններ են եւ երկուստեք քննարկումների ու դեբատների արդյունքում է գտնվում պետություն կառավարելու ոսկե միջինը:

Մտածել, որ Նիկոլ Փաշինյանի թիմը քաղաքականապես այն աստիճան տհասներից է ձեւավորված, որ այսքանը չի հասկանոմ, անշուշտ, կարելի է, բայց Արսեն Ջուլֆալակյանի հրապարակային գործունեությունը, հարցազրույցները հանուն արդարության իր մասին նման պատկերացում կազմելու հիմքեր չի տվել: Եւ ուրեմն, խնդիրներն ու հրաժարականի թելերը պետք է փնտրել այլ տեղ:

Կամ Ջուլֆալակյանին ասվե՛լ է, որ մանդատը վայր դնի, իսկ «ասողը» կա՛մ Փաշինյանը պետք է եղած լինի, կա՛մ նրա լիազոր ներկայացուցիչներից մեկը, իսկ նման պահանջ ներկայացնելու հիմքը Արայիկ Հարությունյանի նկատմամբ Ջուլֆալակյանի հրապարակային ըմբոստությունը կարող է լինել, պատգամավորը բազմիցս է քննադատել նախարարին եւ նրա ղեկավարած ոլորտը: Իսկ Նիկոլ Փաշինյանին պետք չեն սեփական կարծիք ունեցող, ինքնուրոյն անձինք, նրան հլու-հնազանդ կամակատարներ են պետք, քանզի իր ձեւավորած միապետական իշխանությունում չի կարող հանդուրժել բազմակարծություն, սա անձիշխանություն է, որտեղ կա միայն Փաշինյանը, իսկ մնացյալը դեկորատիվ ֆոն են ապահովում: Կամ էլ Արսեն Ջուլֆալակյանն, ինքը լինելով սկզբունքային, տեսնելով իշխանության վարքուբարքը որոշել է իր քայլն անել, բայց հասկանալով, որ հետագայում կարող է խնդիրներ ունենալ կուժնուկուլան փորձել է կոտրել ԿԳՍՄ նախարարի վրա:

Պետք է փաստել, որ իշխանության հետ Ջուլֆալակյանն ավելի շատ կորցնում, քան շահում էր, նա չընգրկվել օլիմպիական հավաքականում, մամուլը գրեց, որ զարմանալիորեն թիմը չաջակցեց արժանի մարզիկին այս հարցում:
Լուրեր են տարածվել նաեւ, որ Ջուլֆալակյանը ծանր է տարել Գագիկ Ծառուկյանի նկատմամբ Իմ Քայլի անմարդկային վերաբերմունքը, երբ իրեն պարտադրեցին մի կողմ դնել անցյալի մտերմությունը ու կողմ քվեարկել անձեռմխելիությունից զրկելուն: Եզրափակելով՝ նշենք, որ ըստ էության մարզիկը երկու տարվա ընթացքում ճաշակել է քաղաքականության եւ հատկապես իր թիմի բոլոր ստոր հարվածները եւ որոշել է վերադառնալ արմատներին:

Անի Սահակյան