Դիմակ չկրելու համար կարող են մեզ ազատազրկել.կարանտինային դաժան օրենքները սկսված են

Այսպիսով՝ այսօր արտակարգ դրությունը կավարտվի, կսահմանվի կարանտին եւ ինչպես երեւում է՝ երանի ենք տալու արտակարգ օրերին : Կարանտինային ռեժիմի համար իշխանությունները այնպիսի սահմանափակկումներ են ամրագրել օրենսդրական փաթեթում եւ այնպիսի կամայական ձեւակերպում տվել, որ օրինակ
բոլոր նրանք, ովքեր չեն հանդուրժի, չեն ենթարկվի դիմակի պարտադիր կրման ապօրինի ու հակասահմանադրական պահանջին, շատ շուտով կհայտնվեն մեղադրյալի աթոռին`ՀՀ քրեական օրենսգրքում մի քանի օր առաջ կատարված խայտառակ հոդված 277.2-ով:
Քրեական օրենսգրքում արված լրացումով քրեականացվել է կարանտինի պայմաններում մեկուսացման (ինքնամեկուսացման) կամ անհատական պաշտպանության միջոցների կիրառման կանոնները խախտելը, որն անզգուշությամբ առաջացրել է անձի վարակում: Դիմակ կրելը եւս համարվում է «անհատական պաշտպանության» միջոց: Բայց վերոնշյալ այս ձեւակերպումն այնքան անորոշ է, որ անձինք կարող են ազատազրկվել դիմակ չկրելու պատճառով, ասենք չի բացառվում, որ դիմակ չկրող անձանց թեստավորեն եւ եթե թեստավորման արդյունքում պարզվի, որ նրանք կրում են վիրուսը, իսկ մենք հաճախ ենք ականատես լինում, երբ թեստերը սխալվում են: Ինչպե՞ս է ապացուցվելու, որ հենց անհատական պաշտպանության միջոցների կիրառման կանոնները խախտելու արդյունքում է անձը վարակվել, դա մեդալի մյուս երեսն է: Դիմակամանիայով տառապող իշխանությունը դրա ճանապարհն էլ կգտնի: Ուստի կարանտինային ժամանակներում չի բացառվում դիմակի գործով ազատազրկվածներ ունենանք: Այն պարագայում, երբ արտակարգ դրության անցած վեց ամիսներին իրավաբաններն ու սահմանադրագետները փորձեցի ապացուցել, որ դիմակ կրելու պարտականության սահմանումը Սահմանադրության 39-րդ հոդվածով երաշխավորված ազատ գործելու իրավունքի սահմանափակում է, իսկ առողջապահական ոլորտի ներկայացուցիչներն էլ մասնագիտական հիմնավորումներով փորձեցին իշխանությունն երին հասկացնել, որ առնվազն բաց տարածքներում դիմակ կրելը խելագարություն է :
Բայց ինչպես պարզ է դառնում՝ օրվա իշխանությունը՝ Նիկոլ Փաշինյանի գլխավորությամբ, «շեղված» է դիմակների վրա: Դիմակն այս իշխանության հակավարակային կամ վարակի դեմ պայքարի միակ «իրեղեն ապացույցն» է, անկյունաքարը, տուգանային եկամտի աղբյուրը (շուրջ 150 հազար մարդ է տուգանվել), չհաշված՝ սեփական երկրի բնակչության դեմ ոստիկանական տեռորը:
Այն, որ դիմակը զուտ մարդկանց ճնշելու և տուգանելու միջոց է, իսկ հակավարակային առումով ընդամենը դետալ, պարզորոշ հիմնավորվում է այն իրողությամբ, որ հազարավոր մարդիկ տուգանքի և ոստիկանական բռնության թիրախ չդառնալու համար, շաբաթներով կրում են միևնույն դիմակը: Սա է ողորմելի իրականությունը:

Անի Սահակյան