Արցունքաբեր գազ, ընդդիմադիրների վտարում երկրից. 4 շաբաթ է ցույցերը Բելառուսում չեն դադարում

Մինսկում երեկ դարձյալ հանրահավաք տեղի ունեցավ: Նախօրոք ոստիկանությունը պատնեշներ էր տեղադրել Մինսկի կենտրոնում գտնվող Հոկտեմբերյան հրապարակի շուրջ, սպասվում էր ընդդիմության չարտոնված երթը:

Հիշեցնենք, որ բողոքի ցույցերը Բելառուսում չեն դադարում օգոստոսի 9-ին կայացած նախագահական ընտրություններից ի վեր. ընդդիմադիրներն ու նրանց կողմնակիցներն ամեն օր փողոց են դուրս գալիս՝ բողոքելով ընտրությունների արդյունքներից, որոնց համաձայն՝ հաղթող է ճանաչվել երկրի գործող նախագահ Ալեքսանդր Լուկաշենկոն:

Մասնավորապես, այս հրապարակում է գտնվում Հանրապետության պալատը, ինչպես նաև արհմիությունների տունը, իսկ մի փոքր այն կողմ`Հանրապետության նախագահի վարչակազմի նստավայրը:

Մեքենաների տեղաշարժը Անկախության պողոտայով, որը անցնում է Հոկտեմբերյան հրապարակով, իրականացվում էր առանց սահմանափակումների, գործում են մետրոյի բոլոր կայարանները:

Անկախության հրապարակը, որտեղ տեղակայված են կառավարական տունը, Մինսկի քաղաքային գործադիր կոմիտեն և խորհրդարանի ստորին պալատը, դեռ շրջափակված չէ, բայց ոստիկանությունը պատրաստել էր ժամանակավոր մետաղական արգելապատնեշներ:

Եվ այսպես, Մինսկում, չնայած իրավապահների հարուցած խոչընդոտներին, ցուցարարների խմբերին հաջողվեց միավորվել և միասնական երթով շարժվել դեպի երկրի նախագահ Ալեքսանդր Լուկաշենկոյի նստավայր, սակայն անվտանգության ուժերը փակել էին նրանց ճանապարհը։

Մայրաքաղաքում և մյուս խոշոր քաղաքներում ոստիկանությունը ցուցարարների դեմ կոշտ միջոցների դիմեց, տասնյակ մարդիկ բերման են ենթարկվել։

Իրավապաշտպան «Весна» կազմակերպության տվյալներով` ավելի քան հարյուր ցուցարար բերման է ենթարկվել, կազմակերպության կայքում տեղադրված ցանկը անընդհատ ավելանում է։ Բերման ենթարկվածներ կան նաև Վիտեբսկ, Գրոդնո, Բրեստ և այլ քաղաքներում։

Բերման ենթարկվածերի թվում են ընդդիմության համակարգող խորհրդի անդամ Օլգա Պավլովան, «Ազատություն» Ռ/Կ-ի լրագրող Արտյոմ Սիզինցովը։ Կիրակի օրվա ցույցն անցկացվեց՝ «մեկը բոլորի համար, բոլորը մեկի համար» կարգախոսով։

«Չնայած անձրևին և իշխանությունների բռնաճնշումներին, ավելի շատ մարդ է դուրս եկել փողոցներ, քան անցած կիրակի։ Համոզված եմ, որ բողոքի ակցիաները կշարունակվեն մինչև հաղթանակ»,- «Ազատություն» Ռ/Կ-ի բելառուսական ծառայությանը ասել էր ընդդիմության առաջնորդներից Մարիա Կոլեսնիկովան։

Ցուցարարները հասան Անկախության պալատի մոտ և մի քանի ժամ կանգնած էին այնտեղ, Գրոդնոյում ցուցարարներին ցրեցին արցունքաբեր գազ կիրառելով:

Երեկ անցկացված «Միասնության երթից» առաջ Սվետլանա Տիխանովսկայայի աջակից, Համակարգող խորհրդի անդամ Օլգա Կովալկովան անհետացել է: Ավելի ուշ նա պատմել է, որ Բելառուսի իշխանությունները նրան երկրից դուրս են հանել և այժմ Վարշավայում է գտնվում: Օգոստոսի 24-ին ձերբակալվելուց հետո նա 10 օր մեկուսարանում է անցկացրել: Այդ ընթացքում ձերբակալությունը երկարաձգվել է ևս 15 օրով, և անվտանգության ուժերը խոստացել են կրկին երկարացնել ժամկետը, եթե նա չհամաձայնի լքել երկիրը:

Արդեն չորրորդ շաբաթն է` ողջ Բելառուսով մեկ բողոքի ցույցերը շարունակվում են: Մինսկի կենտրոնում երեկ կրկին լայնածավալ բողոքի ցույց տեղի ունեցավ, որին մասնակցեց առնվազն 100 հազար մարդ, բերման է ենթարկվել շուրջ երկու հարյուր մարդ:

Մետաքսյա Շալունց