Ախալքալացի Նորոն դավանափոխ է եղել. տեսանյութ

ՌԴ-ում հայտնի գործարար, մեծահարուստ Նորայր Թևանյանը, ով հանրությանն առավել հայտնի է որպես Ախալքալաքցի Նորո, դավանափոխ է եղել: Սերժ Սարգսյանի երբեմնի ամենամտերիմ անձանցից մեկը, ում բոլորը համարում էին անգամ երրորդ նախագահի ընկերը, դարձել է հեղափոխական իշխանությունների սրտի գործարարը, հարց լուծողը, օլիգարխը:

Սերժ Սարգսյանի ու Նորիկ Թևանյանի մտերմությունն, իհարկե, դրսեւորվում էր փոխշահավետ գործարքներով, որոնք, որպես կանոն, հայտնվում էին մամուլի էջերում:
Տարիներ շարունակ Ախալքալաքցի Նորոն ունեցել է ներկայացվածություն Հայաստանի խորհրդարանում, որոնք բարձրացրել են ոչ միայն ջավախահայության խնդիրներն ու նրանց հուզող հարցերը, այլեւ բավարարել իրենց հովանավորի քաղաքական եւ տնտեսական շահերը: Կար ժամանակ, երբ Հայաստանի թիվ մեկ ընդդիմության՝ Արտաշես Գեղամյանի պրոեկտը հովանավորվում էր սույն օլիգարխի կողմից, ավելի ճիշտ Սերժ Սարգսյանի «խնդրանքով» էր, որ Նորիկը ժամանակին ֆինանսավորում էր Արտաշես Գեղամյանին:

Նորիկի խնդրանքով էր, որ կալանքից վաղաժամկետ ազատվեց Ռոբերտ Քոչարյանի մտերիմ Հովհաննես Թամամյանը: Նրա շնորհիվ են տարիներ շարունակ մանդատ ստացել Շիրակ Թորոսյանը, Տաճատ Վարդապետյանը, եւ նույնիսկ 2012-ին ԲՀԿ ցուցակով պատգաավոր դարձած Ստեփան Մարգարյանը եւ այլք:

Սերժ Սարգսյանը կարելի է ասել <<պոլնի ֆուլ>> օգտագործում էր այս գործարարին ընտրությունների ժամանակ, նա Սերժ Սարգսյանի քաղաքական գործիքն էր ոչ միայն ձայն բերելու հարցում, այլեւ քաղաքական հակառակորդների դեմ տնտեսական ճնշումներ գործադրելու: Մամուլը տարիներ առաջ գրեց, որ ԲՀԿ առաջնորդ Գագիկ Ծառուկյանին հարվածելու մտադրությամբ Սերժ Սարգսյանի հանձնարարությամբ Նորիկը գազալցակայաններ էր սարքում մայրաքաղաքում ու Հայաստանի մարզերում: Բավական է թերթել անցյալի հրապարակումները եւ կհասկանաք, թե ով է եղել Նորոն Սերժ Սարգսյանի համար: Բայց ինչպես ասում են՝ չկան հավերժ թշնամիներ եւ բարեկամներ, կան քաղաքական շահեր: Հեղափոխությունից շատ չանցած այս գործարարը՝ պարզվում է՝ ապաստան է գտել Նիկոլ Փաշինյանի իշխանության ծածկի տակ եւ հիմա էլ Ռուսաստանում իշխանության համար հարցեր է լուծում: Վերջին օրերին համացանցում է հայտնվել մի տեսանյութ, որտեղ Թեւանյանը ստիպում է ծիրանային պատերազմի օրերին մեր հայրենակիցներին աջակցություն հայտնած հայազգի գործարար Սարիբեկ Գեւորգյանին ներողություն խնդրել իրենից ու Եզրաս արքեպիսկոպոս սրբազանից: Ընդ որում՝ պարզ երեւում է, որ Նորոն միտումնավոր է նկարել այդ ամենը ու հրապարակել՝ հանրությանը ցույց տալով իր ազդեցությունը:

Եւ վերջում ամենակարեւորը, թավշյա հեղափոխությունից հետո Նիկոլ Փաշինյանը շոու սարքեց, թե Սերժ Սսարգսյանն ում հասել, դիվանագիտական անձնագիր է շնորհել ու պետք է բոլորից վերցնել այդ անձնագրերը: Այդ մարդկանց շարքերում էր անգամ Հայաստանի ֆուտբոլի ազգային հավաքականի ավագ Հենրիխ Մխիթարյանը: 

Ախալքալաքցի Նորոն ևս ուներ դիվանագիտական անձնագիր, որից զրկվել էր հեղափոխությունից հետո, սակայն պարզվում է՝ ամիսներ անց նրան նորից դիվանագիտական անձնագիր է տվել թավշյա կառավարությունը, եւ այժմ Նորոն այն կիրառում է հանուն քայլիստների:

Անի Սահակյան