«Սրտնեղելու» նոր վտանգ՝ Ադրբեջանի նախագահի ու պաշտպանության նախարարի համար

Ադրբեջանի պաշտպանության նախարար գեներալ-գնդապետ Զաքիր Հասանովը այսօր աշխատանքային այցով մեկնում է Մոսկվա:

Ըստ Ադրբեջանի Պաշտպանության նախարարության տարածած պաշտոնական հաղորդագրության՝ այցի ընթացքում Զաքիր Հասանովը կմասնակցի Անկախ Պետությունների Համագործակցության անդամ երկրների և Շանհայի համագործակցության կազմակերպության անդամ պետությունների պաշտպանության նախարարների հանդիպմանը:

Հասանովի այցը կտևի մինչև սեպտեմբերի 6-ը:

Կասկած չկա, որ Հասանովը կշարունակի Ադրբեջանի իշխանությունների վերջին շաբաթների քննադատությունները՝ հայ-ռուսական ռազմական համագործակցության շուրջ, ու բողոքները՝ Հայաստանին վաճառվող զինտեխնիկայի առիթով:
Բաքուն «սրտնեղելու» մի առիթ էլ վստահաբար ունի...

Օրերս հայտնի դարձավ, որ Հավաքական անվտանգության պայմանագրի կազմակերպությունը (ՀԱՊԿ) Հայաստանում անցկացվող «Փոխգործակցություն 2020» զորավարժությունների շրջանակում կմշակի սահմանային հակամարտության տեղայնացումը՝ զորավարժություններ սկսելով աշնանը:

ՀԱՊԿ միացյալ շտաբի մամուլի ծառայությունից հայտնում էին, որ զորավարժությունների ղեկավարումը հանձնարարված է ՀՀ ԶՈՒ պատրաստության գլխավոր վարչության պետին։ Զորավարժությունները կանցկացվեն Պաշտպանության նախարարության «Բաղրամյան» զորավարժարանում։

ՀԱՊԿ օպերատիվ արձագանքման հավաքական ուժերի հետ անցկացվող «Փոխգործակցություն 2020» հրամանատարաշտաբային զորավարժությունները նախատեսում են Կովկասյան տարածաշրջանում սահմանային զինված հակամարտության տեղայնացմանն ուղղված համատեղ գործողությունների նախապատրաստման և անցկացմանն ուղղված ծրագրի մշակում:
Կմշակվեն նաև ՀԱՊԿ պետությունների հետախուզական ծառայությունների միջոցներով հետախուզումը կազմակերպելու մասին հարցեր:

Հայ-ադրբեջանական հուլիսյան սահմանային բախումներից հետո, երբ Ադրբեջանն ու Թուրքիան համատեղ զորավարժություններ անցկացրեցին օգոստոսին, դրանց Ռուսաստանը պատասխանեց մի քանի մարզերում, այդ թվում նաև Հայաստանում զորավարժություններով:

Ռուսաստանի պատասխան քայլն անմիջապես հասկացան Ադրբեջանում. Մոսկվան հստակ ուղերձ հղեց Թուրքիային ու Ադրբեջանին, որ տարածաշրջանային արհեստական լարվածություն թույլ չի տա:

ՀԱՊԿ զորավարժությունները Հայաստանում, կասկած չկա, որ Ադրբեջանի համար անհանգստության նոր առիթ կդառնան:

Մետաքսյա Շալունց