Բատկայի ուշագրավ նվերը Պուտինին
Բելառուսի նախագահ Ալեքսանդր Լուկաշենկոն այսօր մի շարք կադրային փոխատեղումներ է իրականացրել կառավարության կազմում, այդ թվում` դրա ուժային բլոկում։
Պետական անվտանգության կոմիտեի նախագահ Վալերի Վակուլչիկն ազատվել է զբաղեցրած պաշտոնից՝ տեղափոխվելով Անվտանգության խորհրդի պետքարտուղարի պաշտոնին։ ՊԱԿ նոր նախագահ է նշանակվել Իվան Տերտելը, որ մինչ այդ աշխատում էր որպես Պետական վերահսկողության կոմիտեի ղեկավար։ Լուկաշենկոյի մեկ այլ հրամանագրով Մինսկի քաղաքային վարչակազմի ղեկավար Անատոլի Սիվակը ազատվել է զբաղեցրած պաշտոնից՝ տեղափոխվելով կառավարության կենտրոնական ապարատ։ Այսուհետ նա զբաղեցնելու է Բելառուսի փոխվարչապետի պաշտոնը։
Լուկաշենկոն առայժմ դիմադրում է՝ արևմուտքից իր երկրում գունավոր հեղափոխության իրականացման ծրագրերին: Նա վերջերս Ռուսաստանին հավատարմություն ապացուցելու ճանապարհին ուշագրավ քայլեր է իրականացնում:
Ռուսաստանի վարչապետ Միխաիլ Միշուստինը ժամանել էր Բելառուս` նախագահ Ալեքսանդր Լուկաշենկոյի հետ բանակցելու նպատակով, երբ վերջինս իր երկրում կանգնած է հրաժարական ներկայացնելու ուժեղ ճնշման ներքո:
«Ռուսաստանն ամբողջությամբ սատարում է Բելառուսի ինքնիշխանությունը, անկախությունն ու տարածքային ամբողջականությունը», ասել է Միշուսիտինը Լուկաշենկոյի հետ հանդիպման ժամանակ:
Հիշեցնենք, որ երկիրը 26 տարի ղեկավարած Լուկաշենկոյին մեղադրում են նախագահական վերջին ընտրությունների արդյունքը կեղծելու մեջ և արդեն մի քանի շաբաթ ցույցեր են անցկացվում հրաժարական ներկայացնելու և նոր ընտրություններ հրավիրելու կոչերով: Լուկաշենկոն հերքում է կեղծիքներ իրականացվելու մասին մեղադրանքները ու արտաքին ուժերին մեղադրում այս բողոքի ալիքը հրահրելու մեջ: Նա ցույց չի տալիս նահանջելու որևէ նշան, և անտեսում է նույնիսկ պատժամիջոցներ սկսելու մասին Արևմուտքի սպառնալիքները:
Միշուստինի հետ հանդիպմանը Լուկաշենկոն ասել է, թե Բելառուսը գաղտնալսել է Վարշավայի ու Բեռլինի միջև մի խոսակցություն, որը, ըստ նրա, ցույց է տալիս, որ ռուս ընդդիմադիր գործիչ Ալեքսեյ Նավալնիին չեն թունավորել: «Ես կկարդամ այդ սղագրությունը ձեզ համար և պատրաստ ենք այն ուղարկել Ռուսաստանի դաշնային անվտանգության ծառայություն», ասել է Լուկաշենկոն Միշուստինին:
Հիշեցնենք, որ Ռուսաստանը երեկ հայտարարել է, թե Արևմուտքը չպետք է շտապի եզրակացություններ անելու համար և որ չկան Մոսկվային դրա մեջ մեղադրելու հիմքեր:
Այսպես, Լուկաշենկոն նախազգուշացրել է, որ Արևմուտքը ստորություններ է պատրաստում Ռուսաստանի նկատմամբ տարածաշրջանային ընտրություններից առաջ: Հիշեցնենք, որ դրանք պետք է կայանան հաջորդ հանգստյան օրերին։
Նկատենք, որ պաշտոնական Մոսկվան Նավալնիի թունավորման հետ կապված հայտնեց, թե Ռուսաստանի գլխավոր դատախազությունը իրավական հարցում է ուղարկել Բեռլին, սակայն պատասխան չի ստացել։
Իր հերթին ԱՄՆ պետքարտուղարի՝ Եվրոպայի և Եվրասիայի հարցերով օգնականի տեղակալ Ջորջ Կենտը գերմանական Մարշալ հիմնադրամի կողմից կազմակերպված տեսահամաժողովի ընթացքում հայտարարել է, որ ԱՄՆ-ի և Ռուսաստանի հարաբերությունները վատթարանալու են Մոսկվայի կողմից Բելառուսում տիրող իրավիճակին «բաց ուժային միջամտության» դեպքում։
«Եթե նրանք մտածում են, որ մեզ հետ հարաբերությունները, ռուս-ամերիկյան հարաբերությունները վերջին չորս տարում ծանր են եղել, ապա դրանք կարող են էլ ավելի ծանրանալ»,- հայտարարել է քաղաքական գործիչը՝ ընդգծելով, որ ռազմական միջամտությունը վատագույն սցենարը կարող է լինել ինչպես Ռուսաստանի, այնպես էլ Բելառուսի համար։ Նա նաև հավելել է, որ ԵԱՀԿ-ն բելառուսական իշխանությունների և ընդդիմության միակ միջնորդն է, քանի որ այս կառույցը կարող է երկրում որոշ խնդիրների, այդ թվում՝ ընտրական գործընթացի որակին, քաղաքական ազատություններին կամ սոցիալական հարաբերություններին առնչվող հարցերին լուծում տալ։
Մետաքսյա Շալունց
Հետևեք մեզ Viber-ում
