Ովքեր կարող են լինել Քոչարյանի հավանական թիմում և ինչ պահանջով

ՀՀ երկրորդ նախագահ Ռոբերտ Քոչարյանը ռուսական РБК հեռուստաընկերության հետ հարցազրույցում զուգահեռներ է անցկացրել 2018 թվականին Հայաստանում տեղի ունեցած քաղաքական իրադարձությունների և այս օրերին Բելառուսում կատարվողի միջև։
Ռոբերտ Քոչարյանը նշել է, որ Հայաստանում, ի տարբերություն Բելառուսի, 2018 թվականին լրագրողներին չէին ծեծում, իշխանությունն էլ հանդուրժող էր այլակարծության նկատմամբ․ «Արևմտյան երկրների վերաբերմունքը Բելառուսի նկատմամբ ուրիշ էր, Հայաստանի նկատմամբ` ուրիշ։ Հայաստանում իշխանությունն ավելի հանդուրժող էր այլակարծության նկատմամբ», – ասել է Քոչարյանը։ Բացի այդ՝ այն ժամանակվա իշխող ուժը՝ ՀՀԿ–ն ակտիվ համագործակցում էին նաև Արևմուտքի հետ։ Ավելին, Հայաստանում քաղբանտարկյալներ չկային, լրագրողներին չէին ծեծում, ոչ ոք խորհրդավոր կերպով չէր անհետանում։

Այդուամենայնիվ, ըստ Քոչարյանի՝ Բելառուսում տիրող իրավիճակը հիշեցնում է այն իրադարձությունները, որոնք տեղի էին ունենում Հայաստանում 2018 թվականին` «թավշյա հեղափոխության» ժամանակ։ Բելառուսական իրադարձությունների ֆոնին, անշուշտ, հետաքրքիր է Քոչարյանի այն հայտարարությունը, թե ինքն այժմ ակտիվորեն զբաղվում է քաղաքականությամբ, հանդիպումներ ու քննարկումներ է անցկացնում, վերլուծում է գործընթացները։ Զբաղված է «Սիստեմայում» ԲՖԿ-ի իր աշխատանքով, մարզվում է, շատ ժամանակ է հատկացնում ընթերցանությանը և աշխատում է իր հեղինակային երկրորդ գրքի վրա։ Նա շեշտեց, որ առաջին գիրքն ինքնակենսագրություն էր ու յուրահատուկ հրաժեշտ քաղաքականությանը։

«Քաղաքականությունն ինքն է ինձ մոտ վերադարձել, ու կարծում եմ՝ գիրքը կլինի վերադարձ, շարունակություն՝ այն մասին, ինչ տեղի է ունենում այժմ»,- նշել է նա և ավելացրել, թե
հեռացել էր քաղաքականությունից ինչ-որ նոր բան սկսելու վճռականությամբ, սակայն այժմ ստիպված է վերադառնալ։ Այդ ընթացքում նա հասցրել է լուրջ գործիքներ ու գործող թիմ ստեղծել քաղաքական պայքարի համար։ ՀՀ երկրորդ նախագահը չափազանցված համարեց այն լուրերը, որ ընդդիմությունը վերահսկում է երկրի բոլոր լրատվամիջոցները, սակայն վստահություն հայտնեց, որ մտավոր պառակտումն ու մտավոր ներուժը խորհրդարանից դուրս են։

Իրավամբ՝ 2018 թվականի թավշյա հեղափոխությունից հետո տեղի ունեցած զարգացումներն ու անձամբ Նիկոլ Փաշինյանի վարքագիծը՝ ուղղված Քոչարյանին վաղուց վերաճել են իրական քաղաքական պարտադրանքի և Քոչարյանին այլ ելք չեն թողել, քան անհապաղ վերադառնալ քաղաքականություն։
Քոչարյանն աբսուրդային է համարել իր դեմ հարուցված գործն ու ընացող դատավարությունը․ «Ինձ առաջադրված է աբսուրդ մեղադրանք, իմ փաստաբանները դեռ չեն կարողանում հասկանալ՝ ինչի մեջ են ինձ մեղադրում: Իրավական «աբրակադաբրա» է, փորձում ենք դա ապացուցել ոչ թե դատարանին, այլ ժողովրդին»,- նշել է նա և ավելացրել, թե օրացույցում ջնջել է երկուշաբթի օրերը, քանի որ դատական նաիստերն հենց այդ օրեն են տեղի ունենում և այդ օրերը, իր կարծիքով ժամանակի կորուստ են։
Թե ով կամ ովքեր կարող են լինել Քոչարյանի հավանական թիմում, իհարկե ցույց կտա ժամանակը։ Քոչարյանի վերադարձն ակտիվ քաղաքականություն, պետք է ավարտվի ընդդիմադիր բևեռի կոնսոլիդացմամբ։ Նա ստիպված է լինելու վաղ թե ուշ իր դրոշի տակ համախմբել բոլոր քաղաքական ուժերին, ովքեր առաջադրում են Նիկոլ Փաշինյանի հեռացման պահանջը։ Իսկ եթե քաղաքական օրակարգում կա հասունացող գործընթաց, մասնակիցների խնդիրը ակամայից դառնում է տեխնիկական բնույթի հարց։

Հայկ Դավթյան