ՄԻԵԴ-ի վրա թքած ունենալու նուրբ արվեստը

Երևանի ընդհանուր իրավասության դատարանը՝ դատավոր Արթուր Մկրտչյանի նախագահությամբ, հրապարակեց ՀՀ ՊԵԿ ներքին անվտանգության վարչության նախկին ղեկավար Կարեն Խաչատրյանի նկատմամբ ընտրված խափանման միջոցի վերաբերայլ որոշումը։ Ըստ այդմ՝ Խաչատրյանը կմնա կալանքի տակ։
Արդեն 12 ամիս ապօրինի կարգով կալանքի մեջ գտնվող Կարեն Խաչատրյանի նկատմամբ դատարանը որոշեց դատաքննության ընթացքում ևս կիրառել կալանավորումը որպես խափանման միջոց։ Այս մասին հայտնել են Խաչատրյանների փաստաբանական խմբից։
«Երևակայությունս չի ներում հասկանալու համար, թե դատական ակտում ինչպես պետք է պատճառաբանվի, թե Կարեն Խաչատրյանը ինչու է շարունակաբար պահվում կալանքի տակ այն դեպքում, երբ որ նրան կալանքի տակ պահելու որևէ հիմք չկա», – նշել է Խաչատրյանների փաստաբանական խմբի անդամ Ամրամ Մակինյանը։
Փաստաբանը հիշեցրել է, որ նախաքննության ընթացքում Կարեն Խաչատրյանը երկու անգամ գտնվել է ազատության մեջ, թաքնվելու փորձ չի կատարել։ Բացի այդ, այնպիսի գործողություն չի կատարվել, որը կարող էր վկայել այն մասին, որ վարույթ իրականացնող մարմինները ռիսկեր են տեսնում այն մասով, որ դատավարության մասնակիցների վրա նա կարող է անօրինական ազդեցություն գործադրվել։
Մակինյանի խոսքով՝ կատարվածը խտրական վերաբերմունք է Խաչատրյանների նկատմամբ, որը պարունակում է Կարեն Խաչատրյանի գործի մասով պատժի տարրեր, իսկ Գագիկ Խաչատրյանի՝ խոշտանգման։ Գագիկ Խաչատրյանը ևս այս գործով այժմ կալանքի տակ է գտնվում։
Դատական նիստի ընթացքում, որին մասնակցել է նաև Կարեն Խաչատրյանը, փաստաբանը նշել է, որ Կարեն Խաչատրյանը 1 տարի է արդեն՝ դատախազության դեպոզիտ հաշվին վճարվել է առերևույթ պետությանը պատճառած վնասը՝ 236 միլիոն դրամ։ Ըստ Մակինյանի, չկա դատական պրակտիկայում երկրորդ նման դեպք, որտեղ անձին կմեղսագրվի 179-րդ հոդվածի 3-րդ մասի 1-ին կետով նախատեսված արարք, ով այդ չափով վնաս հատուցած կլինի և շարունակաբար դատարաններին թյուրիմացության մեջ գցելով կպահվի կալանքի տակ։
Ըստ փաստաբանական խմբի, Կարեն Խաչատրյանի գործով «կարմիր թելը» նրա ազգանունն է, ինչի համար էլ նա պահվում է կալանքի տակ։ Ինչպես հայտնի է, նա ՊԵԿ նախկին նախագահ, ֆինանսների նախկին նախարար Գագիկ Խաչատրյանի եղբորորդին է։
Հիշեցնենք, որ Կարեն Խաչատրյանը մեղադրվում է յուրացման եւ պաշտոնեական կեղծիք կատարելու մեջ և չի ընդունում իրեն առաջադրված մեղադրանքը։ Կարեն Խաչատրյանը կալանավորվել էր 2019-ի օգոսոտսի 30-ին։ Ամիսներ անց` 2020 թ․ հունվարի 22-ին, նա 20 մլն դրամ գրավի դիմաց ազատ է արձակվել։ Սակայն փետրվարի 17-ին Վերաքննիչ քրեական դատարանը բեկանել էր Կարեն Խաչատրյանին 20 մլն դրամ գրավի դիմաց ազատ արձակելու վերաբերյալ առաջին ատյանի դատարանի որոշումը։

Այսինքնք՝ նախաքննության փուլում, երբ փոխվել է  խափանման միջոցը և նա կարճ ժամանակով գտնվել է ազատության մեջ,  ոչ միայն չի թաքնվել քննությունից, այլև վճռի փոփոխությունից հետո համացանցում կարդալով տեղեկությունը, անձամբ ներկայացել է համապատասխան կառույց։

Հիշեցնենք, որ չնայած առողջական լուրջ խնդիրներին՝ ՊԵԿ նախկին նախագահ Գագիկ Խաչատրյանը ևս շարունակում է մնալ կալանքի տակ։ Նրա պաշտպանները միջնորդել էին Գագիկ Խաչատրյանին ազատ արձակել կամ առնվազն գրավ կիրառել։ Նրանք պնդում են, որ Խաչատրյանին կալանքի տակ պահելու հիմք չկա, նրա առողջական վիճակը նույնպես անհամատեղելի է կալանքի հետ։

Խաչատրյանին վերագրված 9 դրվագ հանցագործությունների հետևանքով պետությանը պատճառված վնասը և կաշառքի առարկա հանդիսացած գումարը կազմում է շուրջ 20 միլիարդ ՀՀ դրամ:
ՊԵԿ նախկին նախագահի գործով ուշագրավ է հատկապես այն հանգամանքը, որ անտեսվել է անգամ ՄԻԵԴ վճռի կատարումը։ Խաչատրյանների փաստաբանական խումբը հայտարարել է, որ ՄԻԵԴ-ը վճռի կատարման համար 15-օրյա ժամկետ էր սահմանել, որը լրացել է օգոստոսի 5-ին: Վճռում ՄԻԵԴ-ը ՀՀ Կառավարությունից պահանջել էր ապահովել Գագիկ Խաչատրյանի անհապաղ բուժումը քաղաքացիական հիվանդանոցում, ինչը չի կատարվել:

Հայկ Դավթյան