«Ռուսաստանը հեռանա՝ գլուխ կհանե՞ք պատմական թշնամու հետ». Մոսկվայից հարցնում են Փաշինյանին
Մերձավոր Արևելքի և Կենտրոնական Ասիայի ուսումնասիրության կենտրոնի տնօրեն, փորձագետ Սեմյոն Բաղդասարովը, որը հաճախ է ռուսաստանյան թոք-շոուների եթերում անդրադառնում է հայաստանյան իրականությանը, «թավշյա հեղափոխությունից» հետո Փաշինյանի վարած քաղաքականությունը քննադատում է, հերթական անգամ հանդես է եկել կոշտ քննադատությամբ:
Սեմյոն Բաղդասարովն օրինակ, վերջերս մի առիթով հայտարարել էր. «Թող Փաշինյանը և բոլոր սորոսամետ հայաստանցի տականքները հասկանան, որ ղարաբաղցիները պաշտպանում էին ոչ միայն Հայաստանը, այլև ամբողջ Խորհրդային Միությունը»:
Ահա, օրերս Սեմյոն Բաղդասարովը «Սոլովյով լայվ» հաղորդման հյուրն էր: Նա հարցազրույցում անդրադառնում է Բելառուսում վերջին օրերին տեղի ունեցողի և Հայաստանի հետ զուգահեռներ անցկացնելու թեմաներին, երբ հնչում են մեկնաբանություններ, թե «Հայաստանում ստացվեց, Բելառուսում էլ կստացվի»:
Նա նախ Հայաստանի դիրքն է քարտեզի վրա բացատրում՝ ներկայացնելով Թուրքիայի նպատակները՝ կտրել Հայաստանը Զանգեզուրից և միացնել Ադրբեջանին:
Ապա՝ խոսքն ուղղում է Փաշինյանին. «Պարոն Փաշինյան, դու այս ամենից ոչինչ էլ չես հասկանում: Չես հասկանում, որ տարածաշրջանում Թուրքիայի միակ հակակշիռը Ռուսաստանն է: Այնտեղ ասում են՝ Ամերիկան մեզ կօգնի... Ամերիկան ախր թքած ունի...»:
Անդրադառնալով թուրք-ադրբեջանական երկշաբաթյա զորավարժություններին, Բաղդասարովը հիշեցնում է՝ «Այդ ո՞վ ի պատասխան նախիջևանյան զորավարժություններին քայլ արեց... Ռուսաստանը զորավարժություններ անցկացրեց, այդ թվում և Գյումրիի ռուսական ռազմաբազայում: Ու ի՞նչ ենք տեսնում մենք դրան ի պատասխան: Հակառուսական տրամադրություններ»:
Մասնավորապես փորձագետը նկատում է, որ Հայաստանում խոչընդոտելու են ռուսական հեռուստաալիքների հեռարձակումը: «Հայկական հեռուստատեսությամբ Նավալնիին եթեր են տրամադրում, որն էլ պատմում է, թե ինչ են նշանակում սահմանադրական փոփոխությունները... Ասացեք խնդրեմ, սա ի՞նչ է, սա թշնամական գործողությո՞ւն է...»:
Սեմյոն Բաղդասարովը հարց է բարձրացնում՝ «Փաշինյանը չի՞ հասկանում, թե՞ դիտավորյալ է այդպես վարվում», ապա ինքն էլ պատասխանում է իր հարցին՝ «մտածված է այդպես վարվում»:
Այնուհետև հրապարակվում է Փաշինյանի՝ 2005թ. հոդվածը, որտեղ, ըստ փորձագետի. «Նա գրել է, թե ինչպես է ամաչում հայ ժողովրդի պատմությունից: Նա, երկրի գլխավոր պաշտոնյան, պարզվում է, ամաչում է իր ժողովրդի պատմությունից... Հայ ժողովուրդը հայոց ցեղասպանության համար էլ, Փաշինյանի պատկերացմամբ, պետք է ամաչի», ասում է Բաղդասարովը բերում է համաշխարհային պատմությանը ծանոթ ականավոր հայերի մասին տեղեկություններ ու զարմացած հարցնում՝ միթե այսպիսի տաղանդաշատ զավակներ տված ազգի իշխանությունը պետք է ամաչի...
«Ձեզնից պետք է ամաչել», նշում է Բաղդասարովը՝ նկատի ունենալով Փաշինյանին, ապա կարծիք է հայտնում, որ նա կարող է ողբերգության հասցնել իրավիճակ:
«Իրականում սորոսականներ են, նույն Նավալնիի նմաններն են: Աստված մի արասցե, որ Ռուսաստանը հեռանա: Դուք գլուխ կհանե՞ք հետո պատմական թշնամու հետ... Խելքի հետ ո՞նց եք... Էրդողանի կայսերական հավակնություններին նայեք գոնե, որի համար դուք և Հունաստանը մնացել եք թշնամի: Իսկ դուք ինչ ե՞ք անում, պարոն Փաշինյան... Ազատվեց այդ սորոսականներից: Հակառակ դեպքում հայ ժողովուրդը կազատվի ձեզնից...», հուզված հայտարարում է Սեմյոն Բաղդասարովը:
Ամփոփելով ելույթը Բաղդասարովը պնդում է, որ Հայաստանի միակ դաշնակիցը Ռուսաստանն է, որի հետ պետք է շարունակել զարգացնել հարաբերությունները.
«Աստված չանի, Ռուսաստանը հեռան, Էրդողանը 3 օրում այդ միջանցքը կկտրի», նշում է նա:
Մետաքսյա Շալունց
Հետևեք մեզ Viber-ում
