Պուտինը շնորհավորեց, իսկ բալթյան երկրները պերսոնա նոն գրատա հայտարարեցին «Բատկային»

Պուտինը նախօրեին առաջիններից է շնորհավորել Լուկաշենկոյին նախագահական ընտրություններում հաղթանակի կապակցությամբ:

Առաջիկա շաբաթներին Ռուսաստանի նախագահ Վլադիմիր Պուտինի հետ հանդիպելու նպատակով Մոսկվա կմեկնի Բելառուսի գործող նախագահ Ալեքսանդր Լուկաշենկոն: Կողմերը հայտնում են, որ նման պայմանավորվածություն է ձեռք բերվել նախօրեին երկու առաջնորդների միջև տեղի ունեցած հեռախոսազրույցի ընթացքում:

Օգոստոսի 9-ի ընտրությունների արդյունքների դեմ Բելառուսում երրորդ շաբաթը շարունակվող բազմահազարանոց բողոքի ցույցերի ֆոնին Կրեմլի ղեկավարը հայտարարել է, որ Մոսկվան բելառուսական ընտրությունները համարում է կայացած:

Հիշեցնենք, որ Պուտինը հայտարարել էր, որ Լուկաշենկոյի խնդրանքով Ռուսաստանում ուժային պահեստազոր է ձևավորվել, որը կօգտագործվի, եթե «ծայրահեղական տարրերը» Բելառուսում անցնեն սահմանները, և երկրում սկսվեն բախումներ:

Ռուսաստանի նախագահի խոսնակ Դմիտրի Պեսկովն նախօրեին ասել է. «Ներկայումս այդ ռեզերվի օգտագործման մասին խոսք չկա։ Նախագահն ամեն կերպ ընդգծել է, որ խոսքը միայն ծայրահեղ իրավիճակի մասին է, երբ ծայրահեղական տարրերն անցնեն ուղղակի ապակայունացման։ Բայց հիմա մենք տեսնում ենք, որ իրավիճակը վերահսկողության տակ է»։ Նա, ի դեպ, նաև հավելել է, որ ռուսաստանցի մասնագետները կարող են օգնել Բելառուսի իշխանություններին նոր Սահմանադրության նախագծի հարցում։

Ինչ վերաբերում է Մոսկվա կատարելիք Լուկաշենոյի այցին, որի մասին հայտնել էր պաշտոնական Մինսկը, այն, ըստ Պեսկովի, կկայանա առաջիկա շաբաթներին։
Լատվիան, Լիտվան և Էստոնիան երեկ հայտարարեցին 30 բելառուսցի պաշտոնյաների դեմ պատժամիջոցների մասին, որոնք առնչություն ունեն Բելառուսի նախագահական ընտրությունների կեղծմանը և բողոքի խաղաղ ցույցերը ճնշելուն: Պատժամիջոցների ցանկում է նաև Բելառուսի գործող նախագահ Ալեքսանդր Լուկաշենկոյի անունը, նրան կարգելվի մուտք գործել Բալթյան երկրներ, հայտարարել է Լիտվայի նախագահ Գիտանաս Նաուսեդան:

Եվրամիության երկրներն ավելի վաղ սկզբունքորեն պայմանավորվել էին մի շարք բելառուս պաշտոնյաների դեմ պատժամիջոցներ սահմանելու մասին, սակայն ցուցակի կազմի շուրջ տարաձայնություններ էին առաջացել: Մասնավորապես, ոչ բոլոր պետություններն էին համաձայնել ցուցակում ընդգրկել Լուկաշենկոյին։

Բելառուսում արդեն երեք շաբաթ է երկրի անփոփոխ առաջնորդի հրաժարականի պահանջով բողոքի ցույցերը շարունակվում են։ Ցույցերի հազարավոր մասնակիցներ ձերբակալվել և դաժան ծեծի, խոշտանգումների են ենթարկվել կալանավայրերում:
Բողոքի ալիքը Բելառուսում ահագնանում է...

Վերջին շաբաթների ընթացքում Բելառուսի զինվորականները թաքստոցներ են հայտնաբերել, որոնցում եղել են սրված ցցեր ու ձողեր, դյուրավառ հեղուկ, անվադողեր, ըստ «Ազատության»՝ հայտարարել է Բելառուսի պաշտպանության նախարարության գաղափարախոսական աշխատանքի գլխավոր վարչության պետը։

Լեոնիդ Կասինսկիի խոսքով, այդ ամենը կարող էր նախատեսված լինել բողոքի ակցիաների համար։ Այլ մանրամասներ պաշտոնյան չի ներկայացրել։

Բելառուսում բողոքի ակցիաները չեն դադարում օգոստոսի 9-ի նախագահական ընտրություններից ի վեր։ Քաղաքացիները դեմ են վեցերորդ անգամ, ըստ պաշտոնական արդյունքների, վերընտրված Ալեքսանդր Լուկաշենկոյի հետագա պաշտոնավարմանը։
Օգոստոսի 30-ին՝ Լուկաշենկոյի ծննդյան օրը, Մինսկում անցկացվել է խաղաղության և անկախության երթ, որին մասնակցել է տարբեր տվյալներով մի քանի հարյուր հազար մարդ: Ցուցարարները հասել էին նախագահական նստավայր՝ վանկարկելով «Ծնունդդ շնորհավոր, առնետ» և «Հեռացիր»։

Ոստիկանությունը հայտնել է 140 ձերբակալվածների մասին: Չնայած այն հանգամանքին, որ Բելառուսի մայրաքաղաքի կենտրոնում հսկայական քանակի իրավապահներ և Պաշտպանության նախարարության ծառայողներ ու մարտական մեքենաներ կային, լուրջ բախումներ չեն եղել:

Լուկաշենկոն ավելի վաղ ասել էր, թե պատրաստ է թողնել իշխանությունը, սակայն միայն նոր Սահմանադրություն ընդունելուց հետո: Իսկ այսօր նա հայտարարել Է նախագահից անկախ պետական համակարգ ստեղծելու անհրաժեշտության մասին։

Բելառուսի գործող նախագահը խոստովանել է, որ երկրում գոյություն ունեցող հասարակական համակարգը մասամբ ավտորիտար բնույթ է կրում, հետևաբար անհրաժեշտ է նախագահի անձի հետ չկապվող համակարգ ստեղծել։ Ինչպես իր Telegram ալիքում հաղորդում է «Բելտա» գործակալությունը, Լուկաշենկոն այս մասին խոսել է Գերագույն դատարանի նախագահ Վալենտին Սուկալոյի հետ հանդիպումից հետո, ում նա խնդրել է միանալ երկրի Սահմանադրության փոփոխության գործընթացին։
Լուկաշենկոն հայտարարել է նաև, որ աշխատում են Սահմանադրության նոր նախագծի վրա, քանի որ համարում է, որ 1994-ի Սահմանադրությունը հնացած է և չի կարելի է դրան վերադառնալ, ինչպես պահանջում է ընդդիմությունը:

Ռուսաստանցի քաղաքագետ Գլեբ Պավլովսկիի կարծիքով, այն բանից հետո, երբ Պուտինը փորձել է միջամտել բելառուսական զարգացումներին, բողոքի ալիքը նոր թափ է ստացել, ինչի մասին վկայում են բազմահազարանոց բողոքի ակցիաները, որ կայացել էին հանգստյան օրերին, հատկապես երեկ. - «Ինչո՞ւ է ավելացել փողոց դուրս եկած մարդկանց թիվը: Սա բելառուսցիների պատասխանն է գործընթացին միջամտելու, երկրի անկախությունը հարցականի տակ դնելու Պուտինի փորձին։ Մարդկանց, բելառուսցիներին սա դուր չի եկել»։

Լիտվայում է գտնվում ընտրություններում Լուկաշենկոյի գլխավոր մրցակիցը՝ Սվետլանա Տիխանովսկայան։ Երկուշաբթի նրա համախոհները հայտնել են, որ սեպտեմբերի 4-ին Տիխանովսկայան ելույթ է ունենալու ՄԱԿ-ի Անվտանգության խորհրդում:

Մետաքսյա Շալունց