Ալիևին մնում է նմանակել հայկական իշխանությանը

Ադրբեջանը կրկին պաշտոնապես մտահոգություն է հայտնել Ռուսաստանից Հայաստանին մատակարարվող զինամթերքի առնչությամբ։

«Մենք դեռևս սպառիչ պատասխան չենք ստացել ռուսական կողմից», նախօրեին Բաքվում հայտարարել է նախագահ Ալիևի օգնական Հիքմեթ Հաջիևը, հիշեցնելով, որ Իլհամ Ալիևը վերջերս անձամբ էր այս հարցը բարձրացրել Ռուսաստանի նախագահ Վլադիմիր Պուտինի հետ հեռախոսազրույցի ժամանակ։

«Մենք բացատրություններ ենք ակնկալում՝ ինչո՞ւ է Ռուսաստանը շարունակում ինտենսիվ զինել Հայաստանը», - հայտարարել է Ադրբեջանի նախագահի խորհրդականը։

Հիշեցնենք, որ շաբաթներ առաջ Իլհամ Ալիևը Պուտինի հետ զրույցում դժգոհել էր, թե հուլիսին հայ-ադրբեջանական սահմանին տեղի ունեցած մարտերից հետո Ռուսաստանը շուրջ 400 տոննա ռազմամթերք է ուղարկել Հայաստան։ Հեռախոսազրույցից հետո Մոսկվան Բաքու էր գործուղել պաշտպանության նախարար Սերգեյ Շոյգուին, ով հավաստիացրել էր, թե Ռուսաստանն ընդամենը Գյումրիում տեղակայված բազայում «սոցիալական օբյեկտների շինարարություն է իրականացնում»։

Ադրբեջանի նախագահի մամուլի ծառայության հաղորդագրության համաձայն, Պուտինի հետ հեռախոսազրույցի ընթացքում Իլհամ Ալիևը պնդել է, թե հուլիսի 17-ից սկսած «Մոսկվան Հայաստանին շուրջ 400 տոննա ռազմական նշանակության բեռ է մատակարարել»։ «Մատակարարումները իրականացվել են Ղազախստանի, Թուրքմենստանի և Իրանի Իսլամական Հանրապետության տարածքներով», - հայտարարել է Ալիևը՝ հավելելով, որ ռազմական նշանակության բեռների մատակարարումները Հայաստան «Ադրբեջանական հանրության մոտ լուրջ մտահոգություն և հարցեր են առաջացնում»։

Անցյալ շաբաթ Ռուսաստանի պաշտպանության նախարար Սերգեյ Շոյգուն, հիշեցնենք, ժամանել էր Բաքու։ Ըստ ամենայնի՝ Շոյգույի արդարացումները Բաքվում այնքան էլ չեն ընդունվել, կամ հավաստի չեն թվացել: Հիմա, պաշտոնական Բաքուն վերստին Կրեմլից պարզաբանում է պահանջում Հայաստանին զենքի մատակարարումների առնչությամբ
«Տրված պատասխանները մեզ չեն գոհացրել», հստակ հայտարարել է Ադրբեջանի նախագահի օգնական Հիքմեթ Հաջիևը: Ադրբեջանի Միլի մեջլիսի պատգամավոր, Եվրախորհրդի Խորհրդարանական վեհաժողովում ադրբեջանական պատվիրակության ղեկավար Ազայ Գուլիևն էլ այս մասին ծավալուն հոդված հրապարակել ռուսական «Ինտերֆաքս»-ում: «Ադրբեջանը մշտապես ձգտել է Ռուսաստանի հետ իր հարաբերությունները զարգացնել այնպես, որպեսզի կողմերից որևէ մեկի շահերը չտուժեն: Աշխարհաքաղաքական կարևորություն ունեցող բազմաթիվ որոշումներ կայացնելիս Ադրբեջանը գործել է առավելագույնս անկեղծ այդ գիծը պահելու համար, մինչդեռ, ցավոք, Ռուսաստանից մեր մի շարք սպասելիքները չարդարացան», - ասել է Միլի մեջլիսի պատգամավորը:

Ազայի Գուլիևը, ով միաժամանակ նշել է՝ Ռուսաստանը ԵԱՀԿ Մինսկի խմբի համանախագահող երկիր է, ինչպե՞ս կարող է միջնորդ պետությունը զբաղվել խնդրի կարգավորմամբ և զուգահեռաբար զենք ուղարկել Հայաստան: Ադրբեջանցի օրենսդիրը, սակայն, չի պարզաբանել՝ ինչու Բաքվում այս մասին չէին մտահոգվում, երբ ադրբեջանական բանակն էր Ռուսաստանից զենք-զինամթերք գնում:

Նկատենք, որ Ստոկհոլմում գործող Միջազգային խաղաղության ուսումնասիրության ինստիտուտի՝ SIPRI-ի տվյալներով, մասնավորապես, 2013-17 թվականներին ադրբեջանական բանակն իր նոր սպառազինությունների կեսից ավելին՝ 65 տոկոսը ձեռք էր բերել հենց Մինսկի խմբի համանախագահ Ռուսաստանից:

Բաքուն այնքան հանդուգն է դարձել, որ որոշել է ՌԴ-ից Հայաստանին մատակարարվող ռազմատեխնիկայի հարցը թեժ պահել:

Բաքուն, անկասկած, այս թեմայից չի նահանջելու՝ առաջ տանելով իր նպատակները: Ադրբեջանի իշխանությունները, փաստորեն, որոշել են նմանակել Հայաստանի իշխանությունների քաղաքականությանը, երբ պարբերաբար պաշտոնական Երևանից դժգոհություն էր հնչում, որ Ադրբեջանի զինվորները կրակում են ռուսական զենքից:

Հիմա Բաքուն, մոռացության տալով մինչ այժմ Ռուսաստանից Ադրբեջանին զենքի մի քանի միլիարդ դոլարի հասնող առևտուրը, որոշել է թմբկահարել ռուսական զենքի թեման:

Մետաքսյա Շալունց