«Որոշ հիվանդանոցներ և բուժհաստատություններ ուղղակի կվերանան». Լևոն Ալթունյան

Առողջապահության նախարարությունը վերջին մի քանի ամիսներին ձեռնամուխ է եղել մի քանի նախագծերի, որոնց նպատակն է` զարգացնել առողջապահության ոլորտը: Լրագրողների հետ հանդիպմանն ասաց ՀՀ առողջապահության նախարար Լևոն Ալթունյանը:«Մենք սկսում ենք գործընթացներ, որոնց հետևանքով կմիանան բուժհաստատություններ։ Նախատեսվում է որոշ բուժհաստատությունների միացում զինվորական հոսպիտալների հետ, ինչը կբարելավի մարզերում բուժման և առողջապահության որակը։ Կվերազինվեն որոշ հիվանդանոցներ։ Որոշ հիվանդանոցներ և բուժհաստատություններ ուղղակի կվերանան, դրանց փոխարեն կվերապատրաստենք մեր բուժաշխատողներին, և Հայաստանում կզարգացնենք պալեատիվ բուժօգնությունը և մեծահասակների համար ինտերնատները։ Ընդ որում, այս նախագիծն ուղղված է ոչ միայն՝ մեր ներքին շուկան հագեցնելու տվյալ ծառայություններով, այլև զարգացնելու բժշկական տուրիզմը»,- ասաց Լևոն Ալթունյանը։ Նրա տեղակալ Սերգեյ Խաչատրյանն էլ տեղեկացրեց, որ նախարարությունը իր բյուջեից խնայողություններ է արել առաջնահերթ ծախսերի համար: «Մանրամասն գույքագրել ենք բոլոր բյուջետային ծախսերը, և արդեն պատրաստվելով 2018 թվականի համար՝ փորձել ենք զրոյից վերաիմաստավորել մեր ծախսերը: Արդեն իսկ ունենք գրանցված մոտ 2-2,5 մլրդ խնայողություններ, որոնք ուղղելու ենք առաջնային ուղղությունների վրա», - նշեց նա: