Թուրքական խաղն ընդդեմ Հայաստանի ու Արցախի. Պաշտոնական խոստովանություն՝ Անկարայից

Թուրքիայի Պաշտպանության նախարար Հուլուսի Աքարը թուրքական պետական «Anadolu» լրատվական գործակալության ուղիղ եթերում երեկ պատասխանում էր հաղորդավարի հարցերին։

Ընդհանուր աշխարհաքաղաքական իրավիճակում Թուրքիայի ունեցած դերակատարման մասին իր մտքերն արտահայտող Աքարը, ի թիվս բազմաթիվ այլ խնդիրների, ևս մեկ անգամ անդրադարձել է Հայաստանին՝ Ադրբեջանի հետ հուլիսին տեղի ունեցած բախումների համատեքստում։

Թուրքիայի Պաշտպանության նախարարը դարձյալ կրկնել է «Ադրբեջանի` եղբայր պետություն լինելու, երկու պետություն մի ազգ» լինելու մասին հայտնի թեզերը։
Նա նաև ընդգծել է, որ Թուրքիան նույնպես այս հակամարտության կողմ է հանդիսանում և դատապարտում է Հայաստանի «հարձակողական» պահվածքը։

Հուլուսի Աքարը Հայաստանը ներկայացրել է որպես իրեն սատարող ուժերի հաշվին «իր հասակից բարձր գործերի» խառնվող մի երկիր՝ նշելով որ Հայաստանի պահվածքը ոչ մի արդարացում չունի և բոլորը պետք է հասկանան դա։
Թուրք պաշտոնյան շեշտել է, որ համատեղ զորավարժություններով իրենք ցույց են տալիս, որ Ադրբեջանի կողքին են։

Պաշտոնական Անկարայի արձանագրումներն, իհարկե, բովանդակային առումով ամենևին էլ նորություն չեն:

Սակայն, միակ նորությունն այն է, որ արդեն Թուրքիայի պաշտպանության նախարարի մակարդակով, այսպես ասած՝ պաշտոնապես Անկարան փաստում է, որ հանդիսանում են հակամարտության կողմ են հանդիսանում:

Այլևս կարիք չկա միջազգային հանրությանը բացատրել, թե ինչ ծրագրեր ունի Թուրքիան. բացահայտ Անկարան փաստում է, որ իրեն համարում է ղարաբաղյան հակամարտության կողմ:

Այսինքն՝ 1990-ականներից սկսած ղարաբաղյան պատերազմում Թուրքիան իր թշնամական քաղաքականությունը՝ Հայաստանի ու Արցախի հանդեպ, այսպես ասած՝ «արդարացնում» է:

Սա մի կողմից արձանագրում է, որը ցույց է տալիս Թուրքիայի շահագրգռվածության աստիճանը ղարաբաղյան կարգավորման գործընթացում, նրա կողմնակալ հայտարարությունները, մյուս կողմից հայկական կողմի համար միանգամայն հստակ ուղերձներ են տրվել Անկարայի կողմից:

Պաշտոնական Երևանի միջազգային հանրությանը պետք է բացատրի, թե ինչ նպատակներ ունի Թուրքիան Հարավային Կովկասում և ում շահն է առաջ տանում:

Մետաքսյա Շալունց