Լավրով-Բայրամով մեկնարկային հանդիպում. Մոսկվան կորոշի Բաքվի դոզան

Այսօր Ադրբեջանի նորանշանակ արտգործնախարար Ջեյհուն Բայրամովը երկրորդ արտասահմանյան այցն է կատարում՝ պաշտոնը ստանձնելուց հետո: Նա պաշտոնական այցով մեկնում է Մոսկվա, որտեղ մի շարք հանդիպումներ կանցկացնի ռուսաստանցի պաշտոնյաների, այդ թվում` Ռուսաստանի արտաքին գործերի նախարար Սերգեյ Լավրովի հետ:

Ռուսաստանի արտաքին գործերի նախարարության պաշտոնական ներկայացուցիչ Մարիա Զախարովայի խոսքով` Բայրամովի այցը Մոսկվա Լավրովի հրավերով է: «Տեղի կունենան երկու երկրների արտաքին քաղաքական գերատեսչությունների ղեկավարների բանակցությունները, որոնց ընթացքում նախատեսվում է քննարկել երկկողմ հարաբերությունների, տարածաշրջանային և միջազգային օրակարգի հարցերի լայն շրջանակ», - անցած շաբաթ հայտարարել է Զախարովան` հավելելով, որ նախատեսված են նաև Ադրբեջանի արտաքին քաղաքական գերատեսչության ղեկավարի հանդիպումները Ռուսաստանի կառավարությունում և Դաշնային խորհրդում:

Լավրովն ու Բայրամովն այսօր առաջին անգամ կքննարկեն ղարաբաղյան խնդիրը: Նախօրեին` օգոստոսի 21-ին, Труд թերթին տված հարցազրույցում Ռուսաստանի ԱԳ նախարարը հայտարարել էր, թե Ռուսաստանը Մինսկի խմբի իր գործընկերների հետ աշխատում է ղարաբաղյան կարգավորման շուրջ բանակցությունների շուտափույթ վերսկսման ուղղությամբ: Լավրովն անդրադարձել էր նաև Հայաստանի և Ադրբեջանի սահմանին հուլիսին սկսված բախումներին` պնդելով, թե դրան նպաստել են մի շարք պատճառներ։

«Առանցքայինը բնականաբար այն է, որ հակամարտությունը կարգավորված չէ», - ասել էր Ռուսաստանի արտգործնախարարը՝ հավելելով. - «Դրան ավելացավ սահմանի երկու կողմերում հանրության թեժացումը և աշխարհագրությունը»: «Յուրատեսակ ձգան դարձավ հայկական կողմի որոշումը՝ վերագործարկել հին սահմանակետը, որը տեղակայված է ադրբեջանական խողովակաշարերից 15 կմ հեռավորությամբ», - ասել էր Լավրովը:

ՌԴ ԱԳՆ արդեն իսկ հաղորդագրություն է տարածել, որում նշում է, որ Ռուսաստանն ավելի քան երկու տասնամյակ կարևոր միջնորդ է հանդիսանում ղարաբաղյան հակամարտության կարգավորման հարցում, այդ թվում՝ որպես ԵԱՀԿ Մինսկի խմբի համանախագահ: «Հաշվի առնելով մեր ժողովուրդների աշխարհագրական հարևանությունը և ընդհանուր պատմությունը՝ այս հակամարտության լուծումն առաջնային նշանակություն ունի մեզ համար: ՌԴ արտաքին քաղաքականության առաջնահերթությունների թվին է պատկանում աջակցել կողմերին՝ հակամարտությունը լուծելու հարցում»,-ասվում է գերատեսչության հաղորդագրությունում:
Ըստ Ռուսաստանի արտգործնախարարության՝ Ռուսաստան-Ադրբեջան փոխհարաբերություններում կարևոր բաղադրիչը միջտարածաշրջանային համագործակցությունն է:

Մինչ Լավրովն առաջին անգամ Ադրբեջանի ԱԳ նախարարի հետ քննարկում կանցկացնի ԼՂ խնդրով՝ Ջեյհուն Բայրամովը՝ ТАСС-ին տված հարցազրույցում արդեն ներկայացրել է պաշտոնական Բաքվի ակնկալիքները:

ԵԱՀԿ Մինսկի խմբի համանախագահները մտադիր են աշնանը կազմակերպել Ադրբեջանի և Հայաստանի ԱԳՆ ղեկավարների հանդիպում՝ Ղարաբաղյան կարգավորման վերաբերյալ: Այս մասին ասել է Ադրբեջանի արտգործնախարար:

«Համանախագահները ցանկանում են այս աշնանը հանդիպում կազմակերպել Ադրբեջանի և Հայաստանի արտգործնախարարների միջև: Այնուամենայնիվ, Հայաստանի գործողությունները փաստացի միջնորդների ջանքերը հավասարեցնում են զրոյի», - ասել է նա:

Նրա խոսքով՝ «Հայաստանի ղեկավարությունը թուլացնում է բանակցությունները վերսկսելու հնարավորությունները»: «Նման պայմաններում վաղաժամ կլինի խոսել արտգործնախարարների հանդիպման ժամկետների մասին», - նշել է նա՝ դժգոհելով հայկական կողմի դիրքորոշումից:

Ռուսաստանը որպես միջնորդ պետություն՝ Պաշտպանության նախարարի և արտաքին գործերի նախարարի մակարդակով ակնհայտորեն փորձում է կողմերին նստեցնել բանակցությունների սեղանին:

Այստեղ խիստ կարևոր է Լավրով-Բայրամով մեկնարկային հանդիպումը: Դրա հիմքում կձևավորվեն Մոսկվա-Բաքու ակնկալիքները հայկական կողմից:

Մետաքսյա Շալունց