Գաղտնազերծումներ հարևան երկրի մասին. Հաջորդը՝ Հայաստանն է. Ինչպես ԱՊՀ երկրներում կանխել «գունավոր հեղափոխությունները»

«Կրեմլը միլիոնավոր դոլարներ ու քաղաքական տեխնոլոգիաներ է գործի դրել մոտ մեկ ամսից Վրաստանում կայանալիք խորհրդարանական ընտրություններին միջամտելու համար», վստահեցնում է «Դոսյե» կենտրոնը, որը, ըստ «Ազատության»՝ ֆինանսավորում է Ռուսաստանի երբեմնի ամենահարուստ գործարարներից մեկը` Կրեմլի քննադատ, այժմ վտարանդի Միխայիլ Խոդորկովսկին:

Սենսացիոն հետաքննությունը բազմաթիվ փաստաթղթեր, այդ թվում ֆինանսական հաշվետվություններ ու Մոսկվայից Թբիլիսի ուղարկված էլեկտրոնային նամակներ է հրապարակել, որոնք վկայում են այն մասին, որ Կրեմլը փորձում է սեփական շահերն առաջ տանել վրաստանյան ընդդիմադիր «Հայրենասերների դաշինքի» միջոցով:

Կուսակցություն, որի առաջնորդները` Իրմա Ինաշվիլին ու Դավիդ Թարխան-Մոուրավին պայքարում են ՆԱՏՕ-ի անդամակցության դեմ, աղմկոտ հանրահավաքներ կազմակերպում Թբիլիսիում ԱՄՆ դեսպանատան մոտ` պահանջելով փակել Սորոսի գրասենյակն ու Վրաստանում գործող ամերիկյան կազմակերպությունները, իշխանություններին հորդորում են սերտացնել հարաբերությունները Ռուսաստանի հետ:
Ռադիոկայանի մատուցմամբ՝ Վրաստանի նոր խորհրդարանում նրանց տեղն ապահովելու համար, ըստ հետաքննության, Մոսկվան վարձել է քաղաքական տեխնլոգիաներով զբաղվող POLITSECRETS ընկերությանն ու քաղաքագետ Սերգեյ Միխեևին, ով դեռ տարեսկզբին Կրեմլ է ուղարկել առաջարկվող քայլերի բովանդակությունն ու նախահաշիվը: «Նախագծի ընդհանուր արժեքը 700 հազար դոլար:

Դրա մեջ մտնում են բոլոր ծախսերը, այդ թվում`չվերթները, տրանսպորտը, կեցության գումարն ու այլն: Սրա մեջ, սակայն, ներառված չէ մասնակցությունը երկրորդ փուլին, եթե նման անհրաժեշտություն ծագի», - ընդգծել է քաղտեխնոլոգը` փաստելով, որ դրա համար կարիք կլինի հավելյալ վճարել:

Միխեևը, ով ի դեպ, իրեն ներկայացնում է որպես անկախ քաղաքագետ, տարիներ առաջ հեռուստահաղորդում էր վարում հայտնի Վլադիմիր Սոլովյովի հետ, հետո էլ հիմնադրել է Կասպյան համագործակցության ինստիտուտը, որի միակ պատվիրատուն առաջին իսկ օրից եղել և մնում է Կրեմլը: 2014-ից Լիտվայի նախաձեռնությամբ նա պերոսոնա նոն գրատա է հայտարարվել ԵՄ տարածքում:

Վրացական կուսակցության առաջխաղացմանը լծված մյուս կազմակերպությունը` POLITSECRETS-ը, ըստ պաշտոնական կայքի, 1997-ից ընտրարշավներ է կազմակերպել Ռուսաստանում, Ղազախստանում, Ղըղըզստանում և Ուկրաինայում: Ընկերության ղեկավար Վերա Բլաշենկովան Թբիլիսի ուղարկված հանձնարարականներում և ուղեցույցներում մանրամասն բացատրել է, թե ինչպես պետք է ռուսամետ ուժն աշխատի «չկողմնորոշված» ընտրազանգվածի հետ, ինչ մեթոդներով պետք է ձայներ խլի իշխող «Վրացական երազանքից» կամ նախկին նախագահ Միխեիլ Սաակաշվիլիի հիմնած «Միացյալ ազգային շարժում» կուսակցությունից:

«Մեր շահերից է բխում նպաստել բողոքական տրամադրությունների սաստկացմանը, ուստի անհրաժեշտ է խոսել ապագա պրոբլեմների ու աղետների մասին, որոնք ի հայտ կգան, եթե իշխանությունը չփոխվի, կամ եթե այն վերստին իրենց ձեռք առնեն Սաակաշվիլիի աջակիցները` ամերիկացիների օգնությամբ», - նշել է ռուս քաղտեխնոլոգն ու շարադրել, թե ինչ լեզվով պետք է խոսեն և ինչ բառեր պետք է գործածեն վրացի քաղաքական գործիչները` ընտրողների վրա առավելագույնս ներգործելու համար: «Օրինակ, պետք է հայտարարել` եթե մենք չփոխենք քաղաքական համակարգը, մինչև Նոր տարի մեզ սպասվում է գործազրկության կտրուկ աճ և բնակչության արտագաղթ, վրացիները կրկին կդառնան Եվրոպայում ապօրինի միգրանտ», - գրել է նա:

Ռուսական կազմակերպությունը միայն խորհուրդներով չի բավարարվել, նաև նախընտրական տեսահոլովակներ է պատրաստել, որոնք պետք է հեռարձակվեն հոկտեմբերի 31-ին կայանալիք ընտրություններից առաջ: Տագնապալի երաժշտության հնչյունների ուղեկցությամբ էկրանի թվերը զգուշացնում են աճող գործազրկության կամ օր-օրի ավելացող հանցագործությունների մասին, վերջում էլ ընդգծում, որ այս խնդիրները միայն ռուսամետ ուժը կարող է լուծել: Գաղտնազերծված փաստաթղթերից երևում է, որ տեղեկատվական աջակցությանը լծվել են Մոսկվայի կողմից ֆինանսավորվող «Sputnik Грузия», «EurAsia Daily», REGNUM գործակալություններն ու «Հյուսիս-հարավ» քաղաքագիտական կենտրոնը, որի ղեկավար Անժելիկա Տրապեզնիկովան ամեն օր հանգամանալից հաշվետվություններ է ուղարկում Կրեմլ:

Ընդ որում, կուլիսներում տարվող ողջ այս գործընթացը, ըստ հետաքննության, համակարգվում է մեկ կենտրոնից` Պուտինի աշխատակազմի արտասահմանյան երկրների հետ միջռեգիոնալ և մշակութային գծով վարչությունից, որը, ըստ «Դոսյեի», ստեղծվել է ԱՊՀ երկրներում «գունավոր հեղափոխությունները» կանխելու համար: Պատահական չէ, որ այդ բաժինը ղեկավարում է Ռուսաստանի Դաշնության արտաքին հետախուզական ծառայության գեներալ Վլադիմիր Չեռնովը:

Հրապարակված փաստաթղթերից երևում է, որ ռուս քաղտեխնոլոգները վրացի ընդդիմադիրների հետ իրենց նամակագրությունը հետո հասցեագրել ու իրականացվող քայլերի մասին հաշվետվություն են ուղարկել Կրեմլում աշխատող այդ գեներալի տեղակալներին` Դաշնային անվտանգության ծառայության պահեստի գնդապետ Վալերի Մաքսիմովին և Գլխավոր հետախուզական վարչության սպա Վալերի Չեռնիշովին:

Այսքանը՝ հարևան Վրաստանի մասով: Հիմա՝ ամենահետաքրքրականը...

Պարզվում է, «Դոսյեն» խոստացել է հաջորդ հրապարակումներով բացահայտել, թե ինչպես է Պուտինի վարչակազմը ռուսամետ գործակալների հավաքագրում ու համակարգում նրանց աշխատանքը Կովկասում և Բալթյան երկրներում, ինչու է Կրեմլը «խաչ քաշել» Նուրսուլթան Նազարբաևի վրա և ով է անձամբ «հետևում» Հայաստանի առաջնորդ Նիկոլ Փաշինյանին:

Հայաստանում Փաշինյանի իշխանության հանդեպ Կրեմլի վերաբերմունքի, 2018թ. գարնանը «թավշյա հեղափոխության» իրագործման հարցում Կրեմլի դիրքորոշման հետ կապված հարցերը, համաձայնեք, մինչ օրս մշուշով են պատված:

Ուշագրավ է, թե Կրեմլի քննադատ, վտարանդի Միխայիլ Խոդորկովսկու կենտրոնին ինչ է հաջողվել պարզել այդ թեմաներով:

Մետաքսյա Շալունց