Նիկոլ Փաշինյանի երևակայությունն այլևս կործանարար է

Հայաստանում 2020թ. հուլիսի տվյալներով աշխատավարձ ստացող աշխատատեղերի քանակը նախորդ ամսվա համեմատ ավելացել է շուրջ 3 հազարով, Ֆեյսբուքի իր էջում գրել է ՀՀ վարչապետ Նիկոլ Փաշինյանը: «2020 թվականի հուլիս ամսվա տվյալներով աշխատավարձ ստացող աշխատատեղերի քանակը Հայաստանում կազմել է 613 հազար, նախորդ ամսվա 610 հազար 300-ի փոխարեն: Նույն ցուցանիշը 2019 թվականի հուլիսին եղել է շուրջ 607 հազար։
Առողջապահական և տնտեսական կարիքների բալանսավորման քաղաքականությունը տալիս է կոնկրետ արդյունք։»,- գրել է Փաշինյանը:
Փաշինյանի երևակայությունն այլևս կարծանարար է, որովհետև պետք չէ տնտեսագետ լինել՝ հասկանալու համար, որ այս տարի համավարակի պատճառով ստացել է լրջագույն հարված։ Աշխատատեղերի ստեղծումն ուղիղ համեմատական է տնտեսության աճի հետ, իսկ այս տարի պաշտոնական տվյալները, մեղմ ասած ողբերգական են։
Ազգային վիճակագրական ծառայության հրապարակած պաշտոնական տվյելների համաձայն՝ այս տարվա առաջին կիսամյակում (2020 հունվար-հունիս) Հայաստանն աշխարհի հետ 3.1 մլրդ դոլարի առևտուր է արել։ Ըստ Վիճակագրական կոմիտեի (ՀՀ ՎԿ)՝ 2019 թվականի առաջին կիսամյակի համեմատ Հայաստանի արտաքին առևտրաշրջանառությունը 10.7%-ով նվազել է։ Ընդ որում, այս ընթացքում ներմուծումն ավելի մեծ տեմպերով է նվազել, քան արտահանումը։
Մասնավորապես 2020 թվականի հունվար-հունիսին Հայաստանից արտահանվել է 1.1 մլրդ դոլարի ապրանք, որը, 2019 թվականի նույն կիսամյակի համեմատ, նվազել է 6.5%-ով։
Նույն ժամանակաշրջանում Հայաստան է ներմուծվել 2 մլրդ դոլարի ապրանք, որը, 2019-ի առաջին կիսամյակի համեմատ նվազել է 12.9%-ով։ Հայաստանի տնտեսական ակտիվության ցուցանիշը (ՏԱՑ) 2020 թվականի հունիսին, 2019-ի հունիսի համեմատ, նվազել է 7.5 տոկոսով: Վիճակագրական կոմիտեն ներկայացրել է երկրի սոցիալ-տնտեսական վիճակը բնութագրող ընթացիկ-օպերատիվ ամփոփմամբ ստացված նախնական հիմնական մակրոտնտեսական ցուցանիշները:Ամենամեծ անկումն արձանագրվել է շինարարության ոլորտում։ 2020-ի հունիսին, նախորդ տարվա հունիսի համեմատ, նվազումը կազմել է 23.3 տոկոս:
Ծառայությունների ծավալը (առանց առևտրի) նվազել է 15.9 տոկոսով։
Առևտրի շրջանառությունը նվազել է 12.4 տոկոսով: Արտաքին առևտրաշրջանառության ծավալները 2020-ի հունիսին, նախորդ տարվա նույն ժամանակահատվածի համեմատ, նվազել են 10.2 տոկոսով. արտահանումը նվազել է 0.5 տոկոսով, իսկ ներմուծումը՝ 15.2 տոկոսով:
Էլեկտրաէներգիայի արտադրությունը նվազել է 13.7 տոկոսով, արդյունաբերական արտադրանքի ծավալը՝ 2.4 տոկոսով։ Ընդհանուր առմամբ հունվար-հունիսին, 2019-ի հունվար-հունիսի համեմատ, տնտեսական ակտիվության ցուցանիշը նվազել է 4.7 տոկոսով։

Միայն այս տարվա առաջին կիսամյակում պետական բյուջեի եկամուտները նվազել են 42 մլրդ դրամով, փոխարենը ավելացել են ծախսերը՝ ավելի քան 129 մլրդ դրամով / 20.2 տոկոս/։
Եթե բոլոր ոլորտներում համատարած անկում է գրանցվել, բյուջեի հավաքագրումներն էլ կտրուկ նվազել են, հետաքրքիր է նոր գրանցված աշխատատեղերը որտեղից և ինչի հաշվին են ի հայտ եկել։

Հայկ Դավթյան