Սերժ Սարգսյանը առճակատման չի գնա

Մի քանի օրից կմեկնարկի վեցերորդ գումարման Ազգային ժողովի առաջին նստաշրջանը: Ամենաինտրիգային հարցերից մեկը մնում է ԱԺ նախագահի ընտրության հարցը: Այս ընթացքում մամուլում ԱԺ նախագահի թեկնածուների տարբեր անուններ են շրջանառվել, բայց որեւէ մեկի անունը դեռ չի հաստատվել:Հանրապետական կուսակցությունը Սերժ Սարգսյանի գլխավորությամբ թերեւս սպասում էր հորով-մորով անել Երեւանի ավագանու ընտրությունը, որից հետո հանգիստ խղճով կանդրադառնա նոր խորհրդարանի ձեւավորմանը: Ապրիլի 2-ի խորհրդարանի ընտրությունից հետո խորհրդարանի նոր խոսնակի ամենահավանական թեկնածուների ցանկում շրջանառվում է փոխխոսնակ Էդուարդ Շարմազանովի, ՀՀԿ փոխնախագահ Արմեն Աշոտյանի եւ ՀՀԿ-ական պատգամավոր «Տաշիր» ընկերության ղեկավար Կարեն Կարապետյանի անունները: Եւ Արմեն Աշոտյանը, եւ Էդուարդ Շարմազանովը համարվում են Սերժ Սարգսյանի թիմի հավատաիմ ներկայացուցիչներ, եթե չասենք ՀՀ նախագահի <<լյուբիմչիկներն>> են, որոնց վրա նախագահը բոլոր ժամանակներում եւ անվերապահ հույս է դրել, խաղադրույքներ կատարել: Այդուհանդերձ երկուսին էլ չի կարելի է համարել ՀՀԿ-ի ներսում միանշանակ ընկալելի եւ ընդունելի ներկայացուցիչներ բազում հայտնի պատճառներով, դեռ չենք խոսում Ծառուկյան դաշինքի շահերից, որն առանցքային նշանակություն է ունենալու նոր խորհրդարանում ՀՀԿ-ի համար կառուցողական ընդդիմության դիրքը զբաղեցնելու տեսանկյունից: Այսինքն, մեծ հավով ԱԺ նախագահի պաշտոնը զբաղեցնող թեկնածուն պետք է ինչ-որ իմաստներով նաեւ այդ դաշինքի կողմից ընդունելի պերսոնաժ լինի: Դրանից բացի կա առավել կարեւոր հանգամանք, որն անցանկալի ու նույնիսկ անհնարին է դարձնում նշված թեկնածուներից որեւէ մեկի գոնե այս փուլում ԱԺ նախագահի պաշտոնում ներկայացնելու համար: Խոսքը իշխանության ներսում ընթացող խուլ հակամարտության եւ 2018-ից հետո իշխանությունը վերցնելու համար Սերժ Սարգսյանի եւ վարչապետ Կարեն Կարապետյանի ու վերջինիս քաղաքական մեկենաս, «Տաշիր» ընկերության սեփականատեր Սամվել Կարապետյանի միջեւ ընթացող պայքարի մասին է: Հետեւաբար մինչեւ 2018 թվականը Սերժ Սարգսյանը ավելորդ լարվածություն չի մտցնի այդ հարթությունում ու ներկայումս զերծ կմնա յուրայինների միջոցով հստակ իշխանության ձեւավորումից: Հատկապես որ ԱԺ նախագահի պաշտոնի համար անթաքույց պայքար է ընթանում երկու թիմերում էլ: Օրերս վարչապետ Կարեն Կարապետյանը չթաքցրեց, որ ինքը այդ պաշտոնում տեսնում է պատգամավոր Կարեն Կարապետյանին: Սերժ Սարգսյանը, իհարկե, տեղի չի տա նաեւ մրցակիցների ցանկությանը ու Կարեն Կարապետյանին չի նշանակի ԱԺ նախագահը, ինչը կնշանակի, որ օրենսդիր ու գործադիր մարմինների ղեկավարումն ամբողջովին հանձնել Կարապետյաններին: Այս համատեքստում լավագույն ընտրությունը, որ նա կարող է անել, պահպանելն է <<ստատուս քվոն>>, այսինքն՝ ԱԺ նախագահ Գալուստ Սահակյանի թեկնածությունը ներկայացնել նույն պաշտոնին: Հասկանալի է, որ այդ պարագայում Գալուստ Սահակյանը լինելու է ժամանակավոր խոսնակ, 2018-ից հետո Սերժ Սարգսյանը հստակ իր թիմն է ձեւավորելու:Բայցեւայնպես ներկայումս ՀՀԿ-ի հին գվարդիայի ներկայացուցչի նշանակումը հնարավորինս խոցելի չի լինի եւ ոչ մի թիմի համար, անգամ ընդդիմության: Գալուստ Սահակյանի ոչ կոնֆլիկտային տեսակը, համենայն դեպս, անցած տարիներին ընկալելի է եղել քաղաքական գրեթե բոլոր ուժերի համար: «Ինձ մի տեսեք այդ պաշտոնում, ինձ տեսեք՝ որպես Գալուստ Սահակյան: Չեմ սիրում այդ մրցությունը, որ հայ ժողովրդի մեջ կա: Բոլորն ուզում են ամեն ինչ դառնալ: Ցանկացած հայի, որը երրորդ, չորրորդ, հինգերորդ կամ բարձր դասարան է գնացել, մի քիչ որ խորանաք, բոլորն ուզում են թագավոր դառնան եւ նախագահներ»,- օրերս անդրադառնալով ԱԺ նախագահի պաշտոնում իր մնալու հավանականությանը՝ լրագրողների հետ զրույցում հայտարարել էր Գալուստ Սահակյանը, ինչից երեւում է, որ նույնիսկ այդ պաշտոնի համար թեժ մրցակցության պարագայում նա ցուցաբերել է փորձառու քաղաքական գործչի հավասարակշիռ կեցվածք: Ի վերջո, այս ընտրության հավանականությամբ էլ կարելի է բացատրել փաստը, որ իշխող ՀՀԿ-ն կրտսեր Սահակյանի, Գալուստ Սահակյանի որդուն դուրս թողեց նոր խորհրդարանից: Թեեւ Արման Սահակյանը առաջադրվել էր ՀՀԿ-ի ռեյտինգային ցուցակով եւ թիվ 3 ընտրատարածքում ամենաշատ թվով ձայն ստացած ՀՀԿ-ականն է: Անի Սահակյան