Ռուսական ընկալման վտանգը
Ադրբեջանի, Թուրքիայի և Վրաստանի պաշտպանության նախարարները եռակողմ համագործակցության վերաբերյալ հուշագիր կստորագրեն: Այս մասին հաղորդում է Վրաստանի ՊՆ-ի մամուլի ծառայությունը: Եռակողմ համագործակցության հարցը քննարկվել է Վրաստանի և Թուրքայի ՊՆ նախարարներ Լևան Իզորիայի և Ֆիքրի Ըշըքի հանդիպմանը, որը կայացել է Ստամբուլում՝ պաշտպանական արդյունաբերության միջազգային ցուցահանդեսի շրջանակներում (IDEF): 10 օրից Բաթումում կայանալու է երեք երկրների նախարարների համատեղ հանդիպումը, որում քննարկվելու է եռակողմ համագործակցության ձևաչափը: «Կստորագրվի հուշագիր՝ ուղղված մեր ռազմական համագործակցության ընդլայնմանը»,-ասել է վրացի նախարարը: Տարածաշրջանային տարբեր ծրագրերից Հայաստանն, իհարկե, դուրս է մնացել: ԼՂ խնդրի պատճառով Ադրբեջանն արգելափակում է Հայաստանի մասնակցությունն այս և այլ ծրագրերին: Ալիևը, որևէ առիթ բաց չի թողնում շեփորահարելու Հայաստանը մեկուսացնելու անհրաժեշտությունը: Երեկ էլ Ադրբեջանի նախագահ Իլհամ Ալիևը մուսուլմանական երկրներին կոչ է արել չհամագործակցել Հայաստանի հետ: Ինչպես հաղորդում են ադրբեջանական ԶԼՄ-ները, այս մասին ասվում է Ալիևի՝ «Իսլամական համերաշխության ամրապնդումը ժամանակի մարտահրավեր է» խորագրով հոդվածում, որը հրապարակվել է Իսլամական համագործակցության կազմակերպության ամսագրում: Ալիևն իր հոդվածում նշում է, որ Հայաստանի քաղաքականությունը «հարձակում է ոչ միայն Ադրբեջանի կրոնական և մշակութային օբյեկտների, այլև ամբողջ իսլամական աշխարհի պատմամշակութային ժառանգության վրա»։ Նա նաև ուշադրություն է հրավիրել այն հանգամանքին, որ մուսուլմանական երկրներից Պակիստանը չի ճանաչում Հայաստանը, իսկ Սաուդյան Արաբիան և Թուրքիան հրաժարվել են Հայաստանի հետ դիվանագիտական հարաբերություններ հաստատելուց: Ադրբեջանի նախագահը վերոնշյալ երկրների այս քայլը համարում է «եղբայրական աջակցություն»: Ալիևի կոչը մուսուլմանական երկրներին, իհարկե, էժանագին քարոզչական հնարք է: Ինքն` Ալիևն էլ շատ լավ գիտակցում է, որ Հայաստանը դարավոր բարեկամական հարաբերություններ ունի մուսուլմանական երկրների հետ ու նրա հայտարարությունները որևէ արժեք չեն ներկայացնում: Խնդիրն այն է, որ Հայաստանն իսկապես մեկուսացել է ոչ միայն տարածաշրջանային ծրագրերից, այլ քաղաքական տեսակետից, անվտանգության առումով հայտնվել է ռուսական ազդեցության գոտում: Հայաստանի ռուսական ընկալումը հղի է վտանգներով, քանի որ այն բացառում է Հայաստանի ինքնուրույնության, ինքնիշխանության դրսևորումները` Հայաստանի ու Արցախի համար վճռորոշ պահերին: Թամար Բագրատունի