Փաշինյանը Սերժ Սարգսյանի «մեղքերը» քողարկում է դիմակի տակ

Թավշյա հեղափոխությունից երկու տարի եւ 100 օր անց լռությունը խախտած եւ ապրիլյան պատերազմի թեմայով ավելի քան երեք ժամ ասուլիս տված երրոդ նախագահ Սերժ Սարգսյանին իշխանության հուժկու պատասխանը չուշացավ: Նիկոլ Փաշինյանը խոսնակի շուրթերով հայտարարեց՝ Սերժ Սարգսյանը <<օրենք է խախտել>> եւ կպատժվի: Իշխանությունն այնքան է տառապում դիմակացավով, որ դիմակ չկրելն արդեն համարում է օրենքի խախտում:

Իսկ թե այդ երբվանից պարետի որոշումը դարձավ օրենք, կիմանան միայն իրենք՝ իշխանականները: Խնդիրն այստեղ ոչ այնքան խախտումն էր, որքան իշխանության պրիմիտիվությունը, սնանկությունը: Ստացվում է, որ ավելի քան երեք ժամ ասուլիս տված ու բավականին հակասական հայտարարություններ արած, եւ վերջապես իրենց կողմից մերժված, <<թալանչի ու հանցագործ>> Սերժ Սարգսյանի աքիլեսյան գարշապարը դիմակ չկրելն է: Չեղավ գեթ մեկը, ով կհակադարձեր Սերժ Սարգսյանին իր, դիցուք, այն հայտարարության համար, որ հետախուզությունն ապրիլյանի օրերին թերացել է: Եթե թերացել է, ինչու է հարցը փակվել միայն պաշտոնանկությամբ, ինչու քրեական պատասխանատվության չեն ենթարկվել այն արկածախնդիր պաշտոնյաները, ովքեր պետության անվտանգությունն են հարվածի տակ դրել: Ստացվում է, որ իրականում կամ Սերժ Սարգսյանն իրոք ճիշտ էր, եւ Նիկոլենք սխալ, երբ քննադատում էին նրան ապրիլյանի հարցում, կամ էլ իշխանությունը հատուկ է իջնում դիմակի մակարդակի, որպեսզի նման տպավորություն ստեղծի: Ուշագրավ է, որ Սերժ Սարգսյանի թիմում անգամ չթաքցրեցին զարանքը, որ այդ հարցին անդրադարձ է կատարվել վարչապետի խոսնակի մակարդակով: Երրորդ նախագահի փաստաբան Ամրամ Մակինյանը անուղղակի պատասխանեց խոսնակին, նկատելով. «Թեև պարզ չէ, թե վարչապետի մամուլի խոսնակի որ գործառույթի մեջ է ներառված այս կամ այն իրողությանն իրավական որակումներ տալը, սակայն, այնուամենայնիվ, անդրադառնալով ՀՀ երրորդ Նախագահ Սերժ Սարգսյանի կողմից բաց տարածքում դիմակ չկրելու վերաբերյալ հնչեցված` «օրենք է խախտել» գնահատականին, հարկ եմ համարում ընդգծել, որ ասուլիսը կազմակերպվել և անցկացվել է հանգստի համար նախատեսված բաց տարածքում` պահպանելով հակահամաճարակային բոլոր կանոնները, ուստի հիշյալ պայմաններում դիմակ կրելու պահանջ չի նախատեսվում:
Ինչ վերաբերում է այսօր դիմակ կրելու կանոնները խախտելու համար տուգանվելիք քաղաքացիների վիճակագրությունը լրացնելու խնդրին, ապա այս կապակցությամբ նշեմ, որ թեև չի կատարվել որևէ «օրենքի» խախտում, սակայն ինքս պատրաստակամ եմ 10,000 դրամով համալրել տուգանքի ֆոնդը»:

Հատկանշական է, որ Սերժ Սարգսյանի ասուլիսին գրեթե զուգահեռ ընթանում էր Արմեն Սարգսյանի հանդիպումը մի խումբ մտավորականների հետ, որի ընթացքում նախագահը կրկին առանց դիմակ էր, ու եթե նա նախագահական նստավայրի բակում էր, ապա Սերժ Սարգսյանի ասուլիսը հանգստյան գոտում էր:

Հետաքրքիր է՝ ՀՀ նախագահի դիմակ չկրելու վրա ինչու է աչք փակում իշխանությունը: Ինչպես ասում են՝ ամեն ինչ կարելի է գյուղի երեխաներին ու գժերին, բայց մի մոռացեք, որ այս մարդը մեր պետության նախագահն է, պետության գլուխը՝ Սահմանադրությամբ:

Անի Սահակյան