Բեյրութի պայթյունի պատճառով հարյուրավոր երեխաներ հոգեկան խանգարումներ են ստացել
Օգոստոսի 4-ին Բեյրութում տեղի ունեցած ողբերգական պայթյունի հետևանքով բազմաթիվ մարդկանց մոտ հետտրավմատիկ սթրեսային խանգարման ախտանշաններ են ի հայտ եկել, այդ թվում՝ երեխաների: Այս մասին հայտնում է «Ալ-Արաբիան»՝ մեջբերելով փորձագետների կարծիքները:
«Խանգարման ախտանշաններն են մեկուսացումը, ագրեսիան, վախը ձայներից, մղձավանջները, ինչպես նաև զարգացման մակարդակի հետընթաց երեխաների մոտ»,-ասել է հոգեբանության և մանկական խնամքի մասնագետ Լոյալ Տաբասկոն:
Հաղորդվում է նաև, որ նախնական հաշվարկների համաձայն Բեյրութում պայթյունի հետևանքով անօթևան դարձած 300,000 անձանց մեկ երրորդը երեխաներ են: Տներն ու շինություններն ավերվել են կամկիսով չափ քանդվել, շատ շենքերում չկա ջուր և էլեկտրականություն:
ՄԱԿ-ի երեխաների հիմնադրամը հայտնել է, որ ծննդի և մանկաբուժության պետական Կարանտինա հիվանդանոցն ավերվել է: Այս հիվանդանոցը բժշկական օգնություն էր ցուցաբերում ծայրահեղ վիճակում գտնվող նորածիններին: Ավերվել կամ տուժել են նաև այլ հիվանդանոցներ, որոնք սպասարկում էին մոտ 160,000 հիվանդների:
Հետևեք մեզ Viber-ում
