Ալիևը կանխում է իշխանության փլուզումը
Ադրբեջանի նախագահ Իլհամ Ալիևը պաշտոնանկ է արել Վրաստանում երկրի դեսպան Դուրսուն Հասանովին, պաշտոնանկության պատճառների մասին չի հաղորդվում:
Նախագահ Ալիևի մեկ այլ հրամանագրով Վրաստանում դեսպան է նշանակվել Ֆաիգ Գուլիևը: 2016 թվականից Վրաստանում ադրբեջանական դիվանագիտական ներկայացուցչությունը ղեկավարող Դուրսուն Հասանովը Ադրբեջանի արտգործնախարարի տեղակալ Ռամիզ Հասանովի եղբայրն է։
Հիշեցնենք, որ անցած ամիս Ադրբեջանի իրավապահները «ֆինանսական մեքենայությունների» գործի շրջանակներում խուզարկությունների արդյունքում ձերբակալել են ԱԳՆ-ի մի խումբ բարձրաստիճան պաշտոնյաների:
Նախ, անցյալ շաբաթ հայտնի դարձավ, որ Ադրբեջանի նախկին ԱԳ նախարար Էլմար Մամեդյարովին արգելվել է լքել երկիրը: Ըստ ադրբեջանական լրատվամիջոցների տեղեկությունների՝ դա կապված է Ադրբեջանի արտաքին գործերի նախարարությունում հակակոռուպցիոն գործողության հետ կապված քրեական գործի հարուցմամբ, և տեղեկություններ են շրջանառվում, որ Էլմար Մամեդյարովը պետք է պատասխանի քննության բազմաթիվ հարցերին:
Անցյալ շաբաթ նաև տեղեկություն ստացվեց այն մասին, որ Սերբիայում ձերբակալվել է Ադրբեջանի դեսպան Էլդար Հասանովը, որում կասկածում են բյուջետային միջոցները վատնելու և պաշտոնեական լիազորությունները չարաշահելու մեջ։
Նրան էլ կասկածում են խոշոր գումարի յուրացման ու բյուջետային միջոցների վատնման մեջ։ Պետական անվտանգության ծառայությունը տեղեկացնում է, որ ֆինանսական ստուգումների ընթացքում հիմնավոր կասկածներ են առաջացել, որ Սերբիայում, Չեռնոգորիայում, Բոսնիա և Հերցեգովինայում Ադրբեջանի դեսպանը ոչ բուն նպատակով զգալի բյուջետային միջոցներ է ծախսել ու այլ իրավախախտումներ կատարել։ Փաստի առթիվ հարուցվել է քրեական գործ։
Ադրբեջանում հերթական բարձրաստիճան պաշտոնյայի կալանքներն ու ձերբակալություններն, այսպիսով` ողջ թափով շարունակվում են: Այս գործընթացը սկսվել է 2019թ. դեկտեմբերից։
Ալիևը փորձում է ցույց տալ, որ իշխանության ներսում լուրջ բարեփոխումներ է իրականացնում, որպեսզի հասարակական հնարավոր դժգոհությունը մեղմի և իշխանության նկատմամբ եղած դժգոհության սլաքներն ուղղի դեպի կառավարություն:
Ակնհայտ է, որ իշխանական վերնախավում լուրջ պրոցեսներ են ընթանում, Ալիևն ունի բավարար հիմքեր, որոնք կանխում է, որպեսզի իշխանություն չկորցնի:
Մետաքսյա Շալունց
Հետևեք մեզ Viber-ում
