Վտանգավոր հանգրվան. «Սրբազան պարտք»՝ ընդդեմ Հայաստանի

Ինչպես հայտնի է, հուլիսի 29-ից օգոստոսի 10-ը Բաքվում, Նախիջևանում, Քյուրդամիրում, Գյանջայում և Եվլախում թուրք-ադրբեջանական ռազմաօդային ուժերը պետք է անցկացնեին «Թուրք-ադրբեջանական արծիվ-2020» համատեղ զորավարժությունը։ Սակայն, հաշվի առնելով թուրքական բարձրաստիճան պատվիրակության այցը, զորավարժությունները շարունակվել են մինչև երեկ։ Բացի այդ, օգոստոսի 1-5-ը Նախիջևանում և Բաքվում անցկացվել էին համատեղ ցամաքային վարժանքներ:

Հիշեցնենք, որ զորավարժությունների ավարտին Թուրքիայի ԶՈւ բարձրաստիճան պատվիրակությունը հանդիպեց նաև Ադրբեջանի նախագահ Իլհամ Ալիևի հետ։
Եվ ահա, Թուրքիայի Պաշտպանության նախարար Հուլուսի Աքարը, ԶՈւ ԳՇ պետ Յաշար Գյուլերը, ցամաքային, ռազմաօդային և ռազմածովային ուժերի հրամանատարները մեկնել են Ադրբեջան՝ հետևելու թուրք-ադրբեջանական համատեղ զորավարժության առաջին փուլի վերջին դրվագին։ Ցուցադրական զորավարժությունների ավարտին, Թուրքիայի և Ադրբեջանի պաշտպանության նախարարները հանդես են եկել ուշագրավ հայտարարություններով։

Այս մասին հայտնում է Թուրքիայի պետական «Անադոլու» լրատվական գործակալությունը։ Թուրքիայի ՊՆ Հուլուսի Աքարը Թուրքիայի և Թուրքիայի ԶՈւ անունից դարձյալ աջակցություն է հայտնել Ադրբեջանին։

Ադրբեջանի պաշտպանության նախարար Զաքիր Հասանովն իր ելույթում մասնավորապես նշել է․ «Բարեբախտաբար, մենք փորձի փոխանակում ենք անում աշխարհի ամենաուժեղ բանակներից մեկի հետ։ Թուրքիայի ԶՈւ-ն ամբողջ աշխարհին ցուցադրել է իր ուժը Սիրիայում, Իրաքում, Լիբիայում։ Թուրքիայի զինված ուժերի աջակցությամբ Ադրբեջանի Զինված ուժերը ևս իր սրբազան պարտքը կիրագործի»։
Հուլիսյան ռազմական գործողություններից հետո թերևս առաջին անգամ, պաշտոնական Բաքուն բացահայտ հայտարարում է, որ իր «սրբազան պարտքն» է համարում Թուրքիայի օգնությամբ Ղարաբաղը վերադարձնելը, ընդ որում շեշտում, որ ապավինելու է Թուրքիայի ԶՈւ աջակցությանը։

Այսինքն, մինչ այժմ Ադրբեջանի իշխանություններն էին սովորաբար ղարաբաղյան հակամարտության ռազմական ճանապարհով լուծման օգտին հանդես գալիս: Սակայն հիմա պաշտոնապես Ադրբեջանը, ըստ էության, Անկարային ներքաշում է ղարաբաղյան հնարավոր հաջորդ պատերազմի մեջ:

«Թուրքիան կաջակցի Ադրբեջանին՝ օկուպացված տարածքներն ազատագրելու գործում», - Բաքվում նման հայտարարությամբ է հանդես եկել Թուրքիայի Ազգային պաշտպանության նախարար Հուլուսի Աքարը։

Թուրքիայի ռազմական գերատեսչության ղեկավարը Ադրբեջան է ժամանել երկկողմ զորավարժությունների ավարտական փուլի ընթացքին հետևելու նպատակով։ Թուրքական պատվիրակության կազմում են նաև Զինված ուժերի Գլխավոր շտաբի պետ Յաշար Գյուլերը, ինչպես նաև ցամաքային, ռազմաօդային և ռազմածովային ուժերի հրամանատարները։

Փաստորեն, պաշտոնական Բաքուն համարում է, որ իրենց բախտը բերել է, որ Ադրբեջանի ԶՈՒ-երը փորձի փոխանակում են իրականացնում այնպիսի ուժեղ բանակի հետ ինչպիսին թուրքականն է։ «Աստված տա, որ Թուրքիայի Զինված ուժերի աջակցությամբ Ադրբեջանի բանակը կատարի իր սրբազան պարտքը», նկատել է Ադրբեջանի պաշտպանության նախարար Զաքիր Հասանովը։

Սա ավելի քան՝ պատերազմի շանտաժ է, ընդ որում՝ ղարաբաղյան հնարավոր հաջորդ պատերազմում Թուրքիայի ներգրավման վերաբերյալ պաշտոնական արձանագրում:
Հայաստանի իշխանություններն, այս առումով, պետք է համարժեք քաղաքականություն իրագործեն. մի կողմից պաշտոնական Բաքուն է իր ռազմատենչ քաղաքականությամբ, այժմ էլ՝ Թուրքիան, որը տարիներ շարունակ Հայաստանը շրջափակման մեջ է պահում, ասել է թե՝ թշնամական քաղաքականություն է վարում:

Միջազգային ողջ հանրության ուշադրությունն անհապաղ պետք է հրավիրել թուրք-ադրբեջանական բացահայտ թշնամական գործողություններին ընդդեմ Հայաստանի, որն արդեն պաշտոնական Բաքուն «սրբազան պարտք» է անվանում:

Մետաքսյա Շալունց