Ալիևի մուննաթը Պուտինին. Որն է լինելու Պուտինի պատասխան քայլը
Ադրբեջանի նախագահ Իլհամ Ալիևը Ռուսաստանի նախագահ Վլադիմիր Պուտինի հետ երեկ երեկոյան կայացած հեռախոսազրույցի ընթացքում իր դժգոհությունն է արտահայտել վերջին շաբաթներին՝ Ռուսաստանի կողմից Հայաստան ռազմական նշանակության բեռների նոր խմբաքանակի առաքման առթիվ։
Այս մասին հաղորդում է Ադրբեջանի նախագահի մամուլի ծառայությունը՝ նշելով, որ հեռախոսազրույցը կայացել է Իլհամ Ալիևի նախաձեռնությամբ՝ Հայաստանին սպառազինության մատակարարումների հարցը քննարկելու նպատակով։
Պաշտոնական հաղորդագրության համաձայն, Պուտինի հետ հեռախոսազրույցից ընթացքում Իլհամ Ալիևը պնդել է, թե հուլիսի 17-ից սկսած «Մոսկվան Հայաստանին շուրջ 400 տոննա ռազմական նշանակության բեռ է մատակարարել»։
«Մատակարարումները իրականացվել են Ղազախստանի, Թուրքմենստանի և Իրանի Իսլամական Հանրապետության տարածքներով», - նշել է Ալիևը՝ հավելելով, որ ռազմական նշանակության բեռների մատակարարումները Հայաստան «Ադրբեջանական հանրության մոտ լուրջ մտահոգություն և հարցեր են առաջացնում»։
Կրեմլի մամուլի ծառայությունը ևս հաղորդագրություն է տարածել Պուտինի և Ալիևի հեռախոսազրույցի մասին, որում, սակայն, սպառազինության մատակարարումների շուրջ քննարկումները հիշատակված չեն։
«Հուլիսին հայ-ադրբեջանական սահմանին տեղի ունեցած լարման համատեքստում նախագահները քննարկել տարածաշրջանային խնդիրները։ Ռուսական կողմը ընդգծել է իրադրության սրմանը նպաստող ցանկացած գործողության անթույլատրելիությունը», - նշված է Կրեմլի հաղորդագրության մեջ։
Այսպես, ռուսական կողմը կարևորել է լարվածության սրմանը նպաստող ցանկացած գործողության կանխման կարևորությունը: Բայց Ալիևը, փաստորեն, Պուտինի հետ զրույցում բարձրացրել է Ռուսաստանից Հայաստան տեղափոխվող ռազմական բեռների հարցը։
Ալիևը, այնքան է հանդուգն դարձել՝ հուլիսյան իր իսկ սանձազերծած ռազմական գործողություններից հետո Մոսկվայից «պատիվ է պահանջում», թե ինչու՞ է Ռուսաստանը 400 տոննա ռազմական նշանակության բեռ է մատակարարել Հայաստանին, ու այս հարցով բացատրություն է պահանջում Մոսկվայից:
Սա այն քաղաքականության արդյունքն է, որը միջազգային հանրությունն ու Մոսկվան թույլ են տվել Ադրբեջանի նկատմամբ:
Ադրբեջանը տարիներ շարունակ տարբեր երկրների սպառազինություն է ձեռքբերել ու շարունակում է ձեռքբերել, սակայն՝ պահանջում է բացատրություն, երբ Հայաստանն է որևէ սպառազինություն ձեռքբերում: Վերջերս Սերբիայից էին բացատրություն պահանջել, այժմ էլ՝ Մոսկվայից:
Ալիևի պահվածքը հուշում է, որ Հայաստանը պետք է շարունակի նույն ոգով բոլոր երկրներից Ադրբեջանի՝ տարիներ շարունակ զինվելու քաղաքականության վերանայում պահանջել, իսկ սահմանային շարունակական լարվածություն հրահրելու համար՝ պատժամիջոցների կիրառում պաշտոնական Բաքվի նկատմամբ:
Իսկ թե ինչպիսին կլինի Պուտինի պատասխան քայլն Ալիևի պահանջներին ի պատասխան՝ ցույց կտա ժամանակը: Ըստ ամենայնի, Մոսկվան կշարունակի իր բիզնեսը երկու կողմերի հետ, այժմ էլ ադրբեջանական կողմի հետ որևէ շահավետ գործարք կնքելով:
Մետաքսյա Շալունց
Հետևեք մեզ Viber-ում
