Խոշոր ավտովթար. բախվել են BMW-ն, Renault Kangoo-ն, Opel Astra-ն և «ԶԻԼ»-երը
Երեկ՝ օգոստոսի 12-ին, խոշոր ու շղթայական ավտովթար է տեղի ունեցել Արարատի մարզում։ Ժամը 22։30-ի սահմաններում Երևան-Երասխ ավտոճանապարհի 35 կմ հատվածում՝ Տափերական գյուղի վարչական տարածքում. բախվել են Եղեգնաձոր քաղաքի բնակիչ՝ 30-ամյա Լյուդվիգ Հակոբյանի վարած «ԶԻԼ ՄՄԶ 45021» մակնիշի, Այգավան գյուղի բնակիչ՝ 27-ամյա Սարգիս Աղաջանյանի վարած Opel Astra մակնիշի, Երևանի բնակիչ՝ 40-ամյա Վահագն Հակոբյանի վարած BMW 318 մակնիշի, Արարատի մարզի բնակիչ՝ 28-ամյա Գևորգ Իսկանդարյանի վարած Renault Kangoo մակնիշի և Գետափ գյուղի բնակիչ՝ 43-ամյա Հովհաննես Եղոյանի վարած «ԶԻԼ ՄՄԶ 4509» մակնիշի ավտոմեքենաները։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Վ. Հակոբյանի ուղևոր՝ Վայոց Ձորի մարզի բնակիչ, 42-ամյա Ք. Ավագյանը մարմնական վնասվածքներով տեղափոխվել է «Էրեբունի» բժշկական կենտրոն։ Բախման հետևանքով ավտոմեքենաներից մեկի մեջ բարձված ձմերուկներն ամբողջովին թափվել, փակել են ճանապարհը։ Օպերատիվորեն դեպքի վայր են ժամանել Արտակարգ իրավիճակների նախարարության փրկարար ծառայության Արարատի մարզային փրկարարական վարչության հրշեջ-փրկարարական ջոկատը՝ 1 մարտական հաշվարկով։ Փրկարարները քաղաքացիների օգնությամբ ճանապարհից հավաքել են թափված ձմերուկները, հոսանքազրկել են ավտոմեքենաներն ու փակել գազաբալոնը։ Օպերատիվորեն ժամանել են նաև Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ծառայողները՝ դասակի հրամանատար Կարապետ Հարությունյանի, ավագ տեսուչ Արտյոմ Բեկլարյանի գլխավորությամբ։
Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Յուրա Հովհաննիսյանը տեղեկությունը փոխանցել է ոստիկանության Արարատի բաժին, որտեղից ժամանել է օպերատիվ խումբը՝ հերթապահ մասի պետ Հակոբյանի գլխավորությամբ։ Տեղում հետաքննչական աշխատանքները ղեկավարել է ՃՈ 2-րդ սպայական գումարտակի 1-ին վաշտի ավագ հետաքննիչ Գևորգ Պողոսյանը, ում կողմից փաստի առթիվ նյութեր են նախապատրաստվում։ Օպերատիվորեն ժամանել են նաև ապահովագրական ընկերությունների ներկայացուցիչները, ավտոմեքենաներն էլ դեպքի վայրից հեռացնելուց հետո հրշեջ-փրկարարները կատարել են ճանապարհի լվացման աշխատանքներ։ Գ. Շամշյանի տեղեկություններով՝ վարորդներից Վ. Հակոբյանը «Mobile centre»-ի տնօրեն է, իսկ Գ. Իսկանդարյանը՝ Շահումյան գյուղի արվեստի դպրոցի պահակը։