Փաշինյանը բռնվեց․ հարսանիքներ կլինեն․ 5-րդ արտակարգի նրբությունները

Հայաստանում 5-րդ անգամ երկարաձգվեց արտակարգ դրության ռեժիմը, որը հայտարարվել էր ընթացիկ տարվա մարտի 16-ից։

Արտակարգ դրության կանոնների որոշակի վերանայումներ են եղել։ Մասնավորապես վերացվում է ՀՀ քաղաքացիություն չունեցող անձանց Հայաստան մուտքի արգելքը․
«Այսուհետ Հայաստանի Հանրապետության տարածք մուտք գործող անձը, եթե ախտանշաններ առկա չեն, և նա չի հոսպիտալացվել, կարող է իր ընտրությամբ կամ ինքնամեկուսանալ 14-օրյա ժամկետով, կամ էլ ինքնամեկուսացման ընթացքում անցնել ՊՇՌ հետազոտություն և թեստի բացասական պատասխան ստանալու դեպքում դուրս գալ ինքնամեկուսացումից։ Տվյալ անձանցից թեստավորման համար նմուշառումը կարող է իրականացվել բացառապես իրենց գտնվելու (ինքնամեկուսացման) վայրում՝ լաբորատորիայի աշխատակիցների այցելության միջոցով: Իսկ արտերկրում կատարված թեստավորման բացասական պատասխանի առկայությունը ՀՀ ժամանող անձանց չի ազատում ինքնամեկուսացման պահանջից»,- փոխվարչապետ, պարետ Տիգրան Ավինյանը այս մասին գրել է Ֆեյսբուքի իր էջում։

 Իրականում սա բավականին կարևոր փոփոխություն էր, քանի որ սրանով փաստացի լուծում է տրվում մի շարք խնդիրների։ Այս նոր կարգավորումը լավ հնարավորություն կլինի նաև օտարերկրացի և սփյուռքահայ դիմորդների համար, որոնց ընդունելությունը դեռ չի ավարտվել։ Նույն կերպ լուծում կստանա նաև գործնական նպատակով երկիր ժամանողների ազատ գործունեության հարցը։ Իշխանության ներկայացուցիչները հավաստիացնում են, որ նախկինում գործող մի շարք սահմանափակումներ հանվել են։ Մասնավորապես, այսուհետև կթույլատրվեն հավաքներ ու գործադուլներ անցկացնել, սակայն պարտադիր դիմակներով ու սոցիալական հեռավորության պահպանման պայմանով։ Իրականում սա անհասկանալի կանոն է, քանի որ իրականության մեջ դժվար է այն պահել։ Օրինակ, եթե հավաքին մասնակցում է 1000 մարդ, ինչպես է պահպանվելու երկու մետր սոցիալական հեռավորությունը։ Բացի այդ, դիմակի կրումը շարունակում է մնալ պարտադիր, սակայն վերանայվում են բացօթյա տարածքում դիմակ կրելու պահանջները։ Հանրային տրանսպորտում, տաքսիներում պարտադիր է դիմակի կրումը, սակայն անձնական մեքենաներում արդեն ուրբաթ օրվանից՝ օգոստոսի 14-ից, դիմակ կարող ենք չկրել։ Առաջիկա օրերին պարետն այս մասին կհրապարակի ուղեցույցը։

Կառավարության նիստում վարչապետ Նիկոլ Փաշինայնը կարևորել է ոստիկանության կոշտ աշխատանքը դիմակների պատշաճ կրման հետևելու գործում՝ ընգծելով, որ առանց կոշտ վերահսկողության դրական դինամիկա չէր լինի․«Գիտեմ, որ կան դժգոհություններ, որ քաղաքացիները տուգանվում են, այո, և դրա համար կա շատ պարզ ձև՝ կրել դիմակ և չտուգանվել: Այն ժամանակ ասում էինք՝ կրիր դիմակ, փրկիր կյանքեր, հիմա հույս ունեմ մահերը կզրոյանան և կասենք՝ կրիր դիմակ և մի տուգանվիր»,- հայտարարել է Փաշինյանը։

Մյուս կարևոր փոփոխությունը՝ այսուհետ բաց և փակ տարածքներում արդեն կարելի է անցկացնել ընտանեկան միջոցառումներ, սակայն մինչև 40 մարդու մասնակցությամբ: Այս առնչությամբ Ազգային ժողովում պատգամավոր Սասուն Միքայելյանը հարց բարձրացրեց՝ առաջարկելով ընտանեկան միջոցառումների համար թույալտրել մինչև 60 հոգու մասնակցություն․ <<Բազմաթիվ զույգեր կան, որ նշանվել են, բայց չեն կարողանում ամուսնանալ։ Թույլ տվեք, թող մարդիկ գոնե 60 հոգով հարսանիք անեն>>,- առաջարկել է պատգամավորը։

Ընդամենը նախօրեին լրատվամիջոցները բացահայտել էին, որ Նիկոլ Փաշինյանն ընտանյոք հանդերձ մասնակցել է իր քավորի դստեր հարսանեկան հավաքույթին։ Բռնվելուց հետո վարչապետին այլ ելք չէր մնում, քան թույլատրել փոքր շրջանակով խնջույքների կազմակերպումը։ Հայաստանը բացում է օդային սահմանները օտարերկրացիների համար, այդուհանդերձ յուրաքանչյուր երկիր ինքն է սահմանելու ճանապարհորդության կանոնները ՀՀ քաղաքացիների համար։ Ինչ վերաբերում է հարևան երկրներին, ապա Վրաստանի և Իրանի հետ ցամաքային սահմանների բացման հարցի վերաբերյալ դեռևս քննարկումներ չկան։

Հայկ Դավթյան