Տարոն Մարգարյանի շտաբներից մեկում քննչական գործողություններ են ընթանում

18:44 - 14/մայիսի/2017

Ավան վարչական շրջանում Երևանի քաղաքապետ, քաղաքապետի թեկնածու Տարոն Մարգարյանի շտաբներից մեկում ոստիկանները քննչական գործողություններ են իրականացնում: Tert.am-ի՝ դեպքի վայրում գտնված ժամանակ շտաբի դռները փակ էին, ներսում աշխատում էին ոստիկանները: Դրսից ևս շտաբը հսկում էին ոստիկանները:

Հիշեցնենք, որ նույն շտաբում ընտրակեղծարարության նյութերի առկայության ահազանգով գտնվում էր «Երկիր Ծիրանի» կուսակցության ղեկավար, Երևանի ավագանու թեկնածու Զարուհի Փոստանջյանը:

Ըստ Փոստանջյանի ստացած ահազանգի ՝ ՀՀԿ շտաբի դարակներում կային պահված ցուցակներ, մինչդեռ շտաբի աշխատակիցներն ու Ավանի թաղապետ, ՀՀԿ-ի Ավանի տարածքային կազմակերպության ղեկավար Մանվել Ջավադյանը հրաժարվել էին ցույց տալ ցուցակները: Նոր Նորքի ոստիկանապետը, ով ժամանել էր դեպքի վայր, հրամայել էր բոլորին դուրս գալ, որովհետև հանցագործության մասին հաղորդում էին ստացել և պետք է համապատասխան աշխատանքներ իրականացնեին: Փոստանջյանն ու լրատվամիջոցների ներկայացուցիչները հրաժարվել էին դուրս գալ, ինչից հետո Նոր Նորքի ոստիկանապետը հրամայել էր բերման ենթարկել Փոստանջյանին ու նրա դստերը: Ոստիկանները, Փոստանջյանին քարշ տալով, գրկած տարել էին մինչև ոստիկանության ծառայողական մեքենան, սակայն Փոստանջյանը դիմադրել էր ու չէր նստել մեքենան: Փոստանջյանը հայտնել էր, որ այդ ցուցակներն իր ներկայությամբ չեն բացվել, իսկ իր աղջկան բերման են ենթարկել ոստիկանության բաժին: Զարուհի Փոստանջյանը լրագրողների հետ չի խոսել, դեպքի հետ կապված նախատեսում է մամուլի ասուլիսով հանդես գալ այսօր՝ ժամը 17:00-ին: