Գալուստ Սահակյանն իր ոճում. «Իմ հարսը երբեք դպրոցի տնօրեն չի լինի, նա շատ լավ մանկապարտեզի վարիչ է»
ՀՀ ազգային ժողովի նախագահ Գալուստ Սահակյանն այսօր ևս մասնակցեց ընտրությանը, որից հետո լրագրողների հետ զրույցում ասաց, որ ԱԺ նախագահը պետք է լինի մեծ փորձ ունեցող անձ: Լրագրողների հարցին, թե ինչո՞վ էր պայմանավորված իր որդու` Արման Սահակյանի ինքնաբացարկը` ԱԺ պատգամավորական մանդատից, և արդյոք համաձայն է այն տեսակետի հետ, որ «մի տնից երկու հոգի չպետք է լինեն խորհրդարանում», Գալուստ Սահակյանը պատասխանեց. «Դա ոչ բարի տեսանելի միտք է, որովհետև ես ու իմ տղան եղել ենք Ազգային ժողովում և շատ լավ աշխատել ենք: Այնպես որ նման խնդիր չկա, պարզապես ինքը ավելի տրամադրված է գործադիրում աշխատելու, դրա համար էլ իր համար միևնույն է, երկու տեղում էլ կարող է աշխատել: Այսինքն գործադիր գնալը իր համար հավանական մոտեցում է»: Ընտրակաշառքների, ցուցակագրումների, Երևանի քաղաքապետի թեկնածու Նիկոլ Փաշինյանի հրապարակած ցուցակների մասին էլ նա նշեց, որ տարիներ կանցնեն, և բոլոր այդ խնդիրները ծիծաղելի կդառնան: Հարցին, թե ճի՞շտ են արդյոք տեղեկություններն այն մասին, որ իր հարսը պետք է դառնա դպրոցի տնօրեն, Գալուստ Սահակյանը հերքեց, ասելով, որ նման խնդիր չկա. «Իմ հարսը երբեք դպրոցի տնօրեն չի լինի, նա շատ լավ մանկապարտեզի վարիչ է»:
Հետևեք մեզ Viber-ում
