Ուսումնական տարին հետաձգել եք, որ ի՞նչ անեք

Ռուսաստանի դպրոցներում ու բուհերում դասերը մեկնարկելու են սեպտեմբերի 1-ին սովորական առկա ձևաչափով, բայց պահպանվելու են հակահամաճարակային անվտանգության բոլոր կանոնները։ ՌԻԱ Նովոստիի փոխանցմամբ՝ տեղեկությունը հայտնել է կրթության նախարար Սերգեյ Կրավցևը՝ ՌԴ նախագահ Վլադիմիր Պուտինի ու կառավարության անդամների հետ քննարկման ժամանակ։ «Արդեն 36 485 կրթական կազմակերպություն անցել են բոլոր ընթացակարգերն ու ամբողջովին պատրաստ են ուսումնական տարվան։ Աշխատանքն իր ռեժիմով ընթանում է»,- ասել է նախարարն ու ավելացրել, որ ուսումնական հաստատությունների տարածքում բժշկական դիմակ դնելը պարտադիր է լինելու։ Ֆիզկուլտուրայի դասերը բացօթյա են լինելու։
Ի տարբերություն աշակերտների և ուսանողների մեծ բանակ ունեցող Ռուսաստանի՝ հարյուրապատիկ քիչ ուսանող և աշակերտ ունոցող Հայաստանում դեռևս պատրաստ չեն նոր ուսումնական տարին սկսել սեպտեմբերի 1-ից։
Պաշտոնապես արդեն հայտարարվել է, որ Հայաստանում՝ հանրակրթական դպրոցներում, միջին մասնագիտական հաստատություններում դասերը կմեկնարկեն սեպտեմբերի 15-ից՝ առկա ուսուցմամբ և սանիտարահիգիենիկ կանոնների պահպանմամբ: Իսկ բուհերի համար որոշումը կկայացվի առանձին։ Հավանաբար բուհերին ինքնուրույն որոշում կայացնելու հնարավորություն կտրվի՝ ակադեմիական ազատության շրջանակներում։ Բուհերը պետական ավարտական քննությունների անցկացման ժամանակ ևս ինքնուրույնություն են ունեցել։ Այժմ նույնպես համալսարանները կարող են ինքնուրույն որոշել՝ երբ և ինչպես սկսել ուսումնական տարին։ Բարձր կուրսերում հեռավար կրթության մոդելը կարող է շարունակվել։ Առաջին կուրսեցիները կարող են ամենօրյա ռեժիմով դասի գալ։ Միջին կուրսերում կարող է կիրառվել ուսուցման խառը մեթոդ․ օրինակ՝ տեսական դասերը կարող են և հեռավար արվել, իսկ գործնական դասընթացները՝ առկա։
Ինչ վերաբերում է դպրոցներին, քոլեջներին և ուսումնարաններին, դասերը կսկվեն սեպտեմբերի 15-ից՝ համաճարակային անվտանգության կանոնների պահպանմամբ։ Թե որն էր ուսումնական տարին 15 օր ուշացումով սկսելու իմաստը, պարզ չէ։ Անվտանգության կանոնների պահպանումը կարելի էր ապահովել նաև սեպտեմբերի 1-ից։ Ընդ որում, եթե հիմք ընդունենք առողջապահության համաշխարհային կազմակերպության կանխատեսումը, ըստ որի աշնանը համավարակի նոր ալիք է սպասվում, ապա ուսումնական տարվա հետաձգումը միանգամայն սխալ որոշում է։ Այսպես թե այնպես, աշնանը և ձմռանը, հնարավոր է, ստիպված լինենք կրկին անցնել հեռավար կրթության։ Գոնե տավա այս ժամահատակվածում, երբ իրավիճակը համեմատաբար բարենպաստ է, կարելի էր բնականոն ուսումնական պրոցես կազմակերպել։ Հայասատանի համար ստեղծված իրավիճակը կրկնակի բարդ է, քանի որ ուսումնական պրոցեսի ընթացքում համավարակի կաննոների պահպանումը թանկ հաճույք է։ Պահպանել համավարակի կանոնները, նշանակում է դասերը կազմակերպել մինչև 20 հոգանոց դասարաններում՝ ապահովելով սոցիալական հեռավորություն։ Օրինակ՝ Երևանում դասարանների մեծ մասի ծանրաբեռնվածությունը 30 և ավել աշակերտի է հասնում։ Այսինքն՝ նույն դասարանում, մեկի փոխարեն, երկու ուսուցիչ ներգրավելու անհրաժեշտություն կառաջանա։ Բնականաբար, անհարաժեշտ կլինի նաև մեկի փոխարեն երկու մանկավարժի աշխատավարձ վճարել։ Նույն խնդիրն է լինելու նաև քոլեջ-ուսումնարանների դեպքում։ Բացի այդ՝ ուսումնական տարվա հետաձգումը ենթադրում է նաև ուսումնական ծրագրի խտացում, որը նույնպես լրացուցիչ բարդություն է առաջացնելու դպրոցների համար։ Սպասվում է, որ առաջիկայում հրապարակվելու են այն կանոնները, որոնց պարտադիր պահպանման դեպքում միայան կարող են դասերը մեկնարկել։ Թե ինչու այդ կաննոններն ավելի վաղ չեն մշակվել, հավանաբար գիտի ԿԳՄՍ բազմաղբաղ ու բազմաոլորտ նախարարը։ ԿԳՄՍՆ-ում այս ողջ ընթացքում զբաղված էին կրթական խայտառակ չափորոշիչները մեր հասարակության վզին փաթաթելու սուրբ գործով և ուստարվա մեկնարկով զբաղվելու ժամանակ չեն ունեցել։
Ինչևէ, սեպտեմբերը գալիս է՝ խնդիրներով հանդերձ։

Հայկ Դավթյան