Հրանտ Բագրատյանն առաջարկում է

ԱԺ սոցիալական հարցերի մշտական հանձնաժողովի նիստում Հակոբ Հակոբյանի նախագահությամբ այսօր քննարկվել է Հրանտ Բագրատյանի հեղինակած «Պետական պաշտոններ զբաղեցրած անձանց սոցիալական երաշխիքների մասին» Հայաստանի Հանրապետության օրենքում լրացում և փոփոխություններ կատարելու մասին» օրենքի նախագիծը: ԱԺ-ից տեղեկացնում են, որ հիմնական զեկուցող Հրանտ Բագրատյանը ներկայացրել է օրենքի նախագծի լրամշակված տարբերակը, որի նպատակն է տարբեր ժամանակների ՀՀ վարչապետի կամ նախարարի համար ապահովել սոցիալական երաշխիքներ: Մասնավորապես՝ հեղինակն առաջարկում է առնվազն երեք օրացուցային տարի անընդմեջ Հայաստանի Հանրապետության վարչապետի կամ նախարարի պաշտոն զբաղեցրած անձի՝ 65 տարին լրանալու դեպքում, նրա համար սահմանել կենսաթոշակ: Օրենքի նախագծի վերաբերյալ ՀՀ կառավարության դրական եզրակացությունն է ներկայացրել ՀՀ աշխատանքի և սոցիալական հարցերի նախարար Արտեմ Ասատրյանը: Օրենքի նախագիծն ստացել է դրական եզրակացություն. այն կընդգրկվի ԱԺ հինգերորդ գումարման իններորդ նստաշրջանի օրակարգի և փետրվարի 22-25-ի քառօրյա նիստերի օրակարգերի նախագծերում: Հեղինակների առաջարկով մինչև մեկ տարի ժամկետով հետաձգվել է ԱԺ պատգամավորներ Վահրամ Բաղդասարյանի, Տաճատ Վարդապետյանի, Համլետ Հարությունյանի, Վազգեն Կարախանյանի, Կարինե Աճեմյանի և Արշակ Մխիթարյանի հեղինակած «Պետական պաշտոններ զբաղեցրած անձանց սոցիալական երաշխիքների մասին» ՀՀ օրենքում փոփոխություն կատարելու մասին» օրենքի նախագիծը: