Ով իշխանություններին ծառայի, ով «քաղաքակիրթ» կաշառք առաջարկի, ով հաղթի

Երեւանի ավագանու ընտրությունների քարոզարշավը Հայաստանի քաղաքական դաշտի ու ընտրություն կոչվող գործընթացի ոչնչացման վերջին ակորդն են խփում։ Ընդդիմադիր կուսակցությունները իրար ոչնչացնելու գնով փորձում են նվաճել իշխանությանն ամենամոտը լինելու դափնին, դրանից բացի այնպիսի հայտարարություններ անում, որոնցից հետո երանի ես տալիս ՀՀԿ-ին։ Այսօր ասուլիսում «Երկիր ծիրանիի» ղեկավար Զարուհի Փոստանջյանը չուզենալով, բայց կրկին ջախջախել է «Ելք»-ին ասելով, որ այդ կուսակցությունը ճանաչեց ընտրությունների արդյունքները, այսինքն` լեգիտիմացրեց ընտրությունները, ուրեմն Փաշինյանի թիմն իշխանության հետ է: «Նրանք արդեն իսկ, երբ հայտարարեցին, որ ճանաչում են կեղծված խորհրդարանական ընտրությունները, իրենք հայտարարեցին, որ պատրաստ են շարունակել համագործակցությունը Սերժ Սարգսյանի հետ: Դա հայտարարել էին վաղուց, երբ կողմ էին արտահայտվել ապօրինի հավաքագրվող 1000 դրամ գումարներին»,- բացատրեց տիկին Փոստանջյանը։ Իհարկե, տիկին Փոստանջյանի պես փորձառու քաղաքական գործիչը պետք է նաեւ հասկանա, որ ընդդիմությանը հարվածելն ու քննադատելը ձեռնտու է միայն իշխանություններին, որ ընդդիմության ջլատումից ու թուլացումից ուժեղանալու է հենց իշխանությունը եւ իր ղեկավարած կուսակցությունը դաշնակիցներին քննադատելուց առանձնապես մեծ բան չի շահելու, հատկապես, երբ քննադատության առիթը այսպես կոչված «հին մեռելներն» են, անցած-գնացած խորհրդարանական ընտրությունները։ Այլ հարց է, երբ տիկին Փոստանջյանը խոսում է Փաշինյանի վերջին աղմկոտ հայտարարության մասին՝ արձանագրելով, որ «Ելք» դաշինքն ընտրակաշառքի դեմ մեկ այլ ընտրակաշառք է առաջարկում։ Օրերս «Ելք»-ի քաղաքապետի թեկնածու Նիկոլ Փաշինյանը հայտարարել էր, որ հաղթանակի դեպքում պատրաստ են Երևանի ավագանու ընտրություններում կաշառք չվերցրած քաղաքացիներին քաղաքային բյուջեից 15 հազարական դրամ վճարել, որպես սոցիալական աջակցություն։ «Դա ուղղակի քրեորեն հետապնդելի արարք է, մեր հանրային գումարներն իրենց նպատակայնությամբ պետք է ծախսվեն, և մենք պետք է իրականացնենք երկարաժամկետ ծրագիր, որի ներքո մարդիկ կարիք չուենան ընդհանրապես այդ 15 հազար դրամի»,- այսօր մամլո ասուլիսի ժամանակ ասաց Զարուհի Փոստանջյանը:«Երկիր Ծիրանի» կուսակցության կողմից Երևանի քաղաքապետի թեկնածու առաջադրված Փոստանջյանի համոզմամբ, Հանրապետականը վարչական ռեսուրսն է չարաշահում։ Սպառնում են քաղաքացիներին զրկել այս կամ այն սոցիալական օգնությունից, որը հատկացվում է քաղաքային բյուջեից։ «Ելք»-ի ու Հանրապետականի միջև Զարուհի Փոստանջյանն այս առումով նմանություն է տեսնում․ «Եթե մենք պետք է մեկի անունը փոխենք մեկ այլ անվանմամբ, որը պետք է գա նույն գործառույթներն իրականացնի, իհարկե դա փոփոխություն չէ, դա նշանակում է միայն անձանց փոփոխություն: Իսկ մենք առաջարկում ենք համակարգային փոփոխություն», ասում է նա ու խոստանում․ «Ես թույլ չեմ տա, որ որևէ մեկն այդպիսի արատավոր գործառույթ իրականացնի, այն էլ ընդդիմության անունից»։ Արժանապատիվ քաղաքացու համար Նիկոլ Փաշինյանի առաջարկը իսկական ապտակ է , ի վերջո՝ ինչ տարբերություն ընտրակաշառքը կլինի ընտրությունից առաջ, թե հետո, սա կարելի է «քաղաքակիրթ» կաշառք համարել։ Մինչդեռ տարիներ շարունակ իշխանությունը մի խումբ մարդիկ բռնազավթել են ընտրակաշառքի միջոցով, քանզի հայ ընտրողի ու քաղաքացու մեջ հնարավոր չի եղել հաղթահարել խաբելու, քցելու հոգեբանական բարդույթը, որպես կանոն ումից փող են վերցրել, նրան էլ տվել են իրենց քվեն։ Արդյունքում Հայաստանը դուրս են գցել զարգացման ուղուց։ Դրանից բացի Քաղաքի բյուջեն նպատակաուղղված, սահմանված բյուջե պետք է լինի, Երևանի միջոցների տնօրինման հարցը մեկ անձի կամ խմբի ցանկությամբ չի կատարվում: Իսկ այսպիսի սնանկ ընդդիմության գոյությունը կայուն իշխանության հաղթանակի գրավական է դառնում։ Անի Սահակյան