Իսկ Սերժ Սարգսյանն ո՞ւմ է սպասում

Ավարտվեց Վրաստանի պատվիրակության պաշտոնական այցն Ամերիկայի Միացյալ Նահանգներ: Գիորգի Կվիրիկաշվիլիի վերջին հանդիպումը եղել է ԱՄՆ առևտրի նախարար Ուիլբուր Ռոսի հետ: Կողմերը խոսել են առևտրատնտեսական հարաբերությունների և այդ ուղղությամբ համագործակցության զարգացման մասին: Հանդիպմանն ուշադրություն է դարձվել Անակլիայի նավահանգստի ծրագրի և դրան ամերիկյան ընկերությունների ներգրավմանը: Գիորգի Կվիրիկաշվիլիին Սպիտակ տանն ընդունել էր նաև ԱՄՆ նախագահ Դոնալդ Թրամփը: Վրաստանի պատվիրակությունը՝ վարչապետի գլխավորությամբ, եռօրյա պաշտոնական այցով ԱՄՆ էր մեկնել փոխնախագահ Մայք Պենսի հրավերով: Վրաստանի վարչապետ Գեորգի Կվիրիկաշվիլիին Սպիտակ տան Օվալաձև գրասենյակում ԱՄՆ նախագահի կողմից ընդունելը շատ լավ նշան է ոչ միայն Վրաստանի, այլև ողջ տարածաշրջանի համար՝ առ այն, որ Միացյալ Նահանգները չի պատրաստվում լքել Հարավային Կովկասը և տարածաշրջանի երկրները թողնել «մեն-մենակ» Ռուսաստանի հետ՝ «1in.am»-ի հետ զրույցում նշել է վրացի քաղաքագետ Գելա Վասաձեն: Ի դեպ, Վրաստանի վարչապետի հանդիպումը նախագահ Թրամփի հետ ծրագրված չի եղել օրակարգով: Նախատեսված էր հանդիպում միայն փոխնախագահ Մայք Փենսի հետ՝ փակ դռների հետևում: Սպիտակ տան ղեկավարը, սակայն, խախտել է արարողակարգը՝ Օվալաձև կաբինետում ընդունելով Կվիրիկաշվիլիին և Փենսին: Երկուշաբթի երեկոյան նա թվիթերյան իր միկրոբլոգում գրել է. «Մեծ պատիվ ունեի այսօր Սպիտակ տանը ողջունել Վրաստանի վարչապետ Գեորգի Կվիրիկաշվիլիին փոխնախագահ Մայք Փենսի հետ միասին»: Ի՞նչ նշանակություն կունենա Վրաստանի համար վարչապետ Կվիրիկաշվիլիի հանդիպումը ԱՄՆ նախագահ Դոնալդ Թրամփի հետ Սպիտակ տանը: Բանն այն է, որ մայիսի 9-ին տեղի ունեցավ պետքարտուղար Թիլերսոնի հանդիպումը Ռուսաստանի արտաքին գործերի նախարար Սերգեյ Լավրովի հետ: Այս փուլում ԱՄՆ նոր վարչակազմը ձևավորում է իր արտաքին քաղաքականությունը, և հատկանշական է, որ Թիլերսոն-Լավրով հանդիպումից առաջ տեղի ունեցավ նման հանդիպում Վրաստանի վարչապետի ու ԱՄՆ նախագահի միջև, ընդ որում` չնախատեսված հանդիպում: Սա թերևս, նշանակում է, որ այսօր տարածաշրջանը գտնվում է Միացյալ Նահանգների ուշադրության կենտրոնում, այսինքն, Հարավային Կովկասը չի մնա Ռուսաստանի ազդեցության գոտում: Կարելի է ենթադրել, որ վրաց-ամերիկյան վերջին հանդիպումներում քննարկվել է նաև ընդհանուր իրադրությունը Հարավային Կովկասում, հակամարտությունները կանխելու հարցը, իհարկե` Վրաստանի օկուպացված տարածքների շրջանակներում: Իհարկե, Վրաստանն այս առումով առաջատար դիրքերում է, խոսքը Վրաստանում ռազմական ուսումնական կենտրոնի կառուցման, ՆԱՏՕ-ի շրջանակներում համագործակցության մասին է: Դեռ ԱՄՆ նախկին նախագահ Բուշը նախագահի պաշտոնը լքելուց առաջ՝ 2009թ. հունվարին, ստորագրեց ԱՄՆ-ի և Վրաստանի միջև համագործակցության մասին հռչակագիրը: Օբամայի վարչակազմի շրջանում այս հռչակագիրը գրեթե չի գործել, բայց Վրաստանում հույս ունեն, որ այն կարող է կյանքի կոչվել Թրամփի վարչակազմի կողմից: Փաստացի, ստացվում է, որ ամերիկյան կողմը Ռուսաստանի հետ բանակցություններից առաջ ցանկացել է լսել Վրաստանի մտահոգությունները՝ կապված տարածաշրջանի և Ռուսաստանի հետ: Վրաստանը հետաքրքիր է որպես տարածք, որը կապում է Հյուսիսային Կովկասը Հարավային Կովկասի հետ, դա շատ կարևոր է տարածաշրջանի կայունության համար: Վրաստանը հետաքրքիր է որպես հետխորհրդային պետություն: Երրորդը՝ Վրաստանը հետաքրքիր է որպես երկիր, որը սահմանակցում է Մեծ Մերձավոր Արևելքի տարածաշրջանին, որտեղ իրադարձությունները շատ դինամիկ կերպով են զարգանում: Իսկ ի՞նչ են ծրագրում Հայաստանի դիվանագիտությունը` Վաշինգտոնի նոր վարչակազմի հետ իր փոխհարաբերություններում... Հակադրվել Կրեմլի քաղաքականությանը, կամ օրինակ ԵՏՄ-ից ու ՀԱՊԿ-ից դուրս գալու հարց դնել, իհարկե, չարժե, դա վտանգավոր է: Սակայն նվազագույնը` ԱՄՆ-ի հետ փոխհարաբերությունները` նոր մակարդակի վրա դնելու ի շահ Հայաստանի ու Արցախի` Հայաստանի իշխանությունները պարտավոր են անել: Մետաքսյա Շալունց