Հրայր Թովմասյանի վարորդին չի կարելի, Աննա Հակոբյանի ազգականի հովանավորյալին կարելի՞ է

Իշխանությանը հանգիստ չի տալիս Հրայր Թովմասյանի գոյությունը։ Սահմանադրական դատարանի նախագահի պաշտոնից հեռացնելուց հետո էլ Թովմասյանի եւ մերձավորների նկատմամբ քաղաքական իշխանության հայտարարած պատերազմը շարունակվում է։ Ըստ էության հերթական հրահանգն է իջեցվել իրավապահներին։ ՀՔԾ-ն այսօր մի հաղորդագրություն է տարածել՝ հայտնելով, թե «ձեռք բերված բավարար ապացույցների հիման վրա» Թովմասյանի նախկին վարորդին մեղադրանք է առաջադրվել մոտ հինգ միլիոն դրամի հափշտակության համար։ Իբր նա «2011-2015 թվականներին օժանդակել է այդ ժամանակահատվածում ՀՀ ԱՆ դատական ակտերի հարկադիր կատարումն ապահովող ծառայության պետի պաշտոնը զբաղեցրած Միհրան Պողոսյանի կողմից պետական միջոցներից վատնման եղանակով առանձնապես խոշոր չափերով` 5.712.550 ՀՀ դրամի հափշտակությանը»։ Ըստ առաջադրված մեղադրանքի` վարորդը փաստացի կատարելով նախարարի պաշտոնը զբաղեցրած Հրայր Թովմասյանի վարորդի պարտականությունները, 2011 թվականին աշխատանքի ընդունման վերաբերյալ դիմում է ներկայացրել ԴԱՀԿ ապահովող ծառայության պետ Միհրան Պողոսյանին: Վերջինս, տեղեկացված լինելով, որ դիմումատուն փաստացի նախարարի վարորդն է, ներկայացված փաստաթղթերի հիման վրա համապատասխան աշխատանքային պայմանագրեր է կնքել նրա հետ՝ 2011-2015 թվականներն ընկած ժամանակահատվածում նրան աշխատանքի նշանակելով նախ ՀՀ ԱՆ ԴԱՀԿ ապահովող ծառայության անվտանգության աշխատակցի, այնուհետեւ` նույն կառույցի տեղեկատվական տեխնոլոգիաների ներդրման եւ համակարգի ավտոմատացման բաժնի առաջին կարգի խորհրդատուի, ապա` Երեւան քաղաքի Շենգավիթ բաժնի հարկադիր կատարողի պաշտոններում` միաժամանակ նրան գործուղելով հարկադիր կատարման օպերատիվ բաժին:
«Ա. Հ.-ն վերը նշված ժամանակահատվածում աշխատանքի չի հաճախել եւ առանց համապատասխան պաշտոններից բխող գործառութային պարտականությունները կատարելու ՀՀ պետական բյուջեի՝ ՀՀ ԱՆ ԴԱՀԿ ծառայությանը հատկացված միջոցներից աշխատավարձի եւ դրամական այլ բավարարման ձեւով ստացել է իր անվամբ հաշվարկված եւ պետական կառույցի բյուջեից ելքագրված 5.712.550 ՀՀ դրամ գումար եւ այդ կերպ օժանդակել Միհրան Պողոսյանի կողմից պաշտոնեական դիրքն օգտագործելով վատնման եղանակով պետական բյուջեի միջոցներից առանձնապես խոշոր չափերով գումարի հափշտակությանը»,- նշվում է ՀՔԾ հաղորդագրության մեջ։

Վարորդը առաջադրված մեղադրանքում իրեն մեղավոր չի ճանաչել, սակայն եթե անգամ ընդունենք, որ այս մեղադրանքը ճիշտ է, ապա ինչու է Հրայր Թովմասյանի արարքը հանցանք, իսկ իսկ վարչապետի կնոջ ազգական Ռաֆիկ Մաշադյանի ընկերոջ արարքը` ոչ: Իշխանությունները նմանօրինակ ապօրինությունների մասին մոռանում են կամ աչք են փակում դրանց վրա, երբ խոսքը վերաբերում է յուրայիններին: Շուրջ մեկ տարի առաջ հրապարակումներ եղան այն մասին, որ Շենգավիթի հարկային տեսչության պե­տի տեղակալ Արմեն Օհանյանը, ով նախկինում Արմավիրի օպերատիվ-հետախուզության բաժնի պետի ժամանա­կավոր պաշտոնակատարն էր, նշանակվել է Շենգավիթի հարկայինի պետ:
«Ուշագրավ է, որ Օհանյանը Շենգավիթի հարկայինի պետի տեղակալ էր նշանակվել ընդամենն այս տարվա մարտին, և, փաստո­րեն, 3 ամսում հնարավոր դարձավ տեղակալից դառնալ պետ: Արմեն Օհանյանի հաջո­ղության գաղտնիքն այն է, որ նրա հովանավորը, ըստ մամուլի հրապարակումների, ՊԵԿ փոխնախագահ Ռաֆիկ Մաշադյանն է, ում շնորհիվ Օհանյանը 2 տարի չհաճախե­լով աշխատանքի և ստանալով աշխատավարձ՝ սպասում էր հերթական բարձրացմանը:
Օհանյանին աշխատանքի չհաճախելու համար աշխա­տանքից ազատել էր ՊԵԿ նախկին նախագահ Վարդան Հարությունյանը, սակայն Ռաֆիկ Մաշադյանի՝ առաջին տե­ղակալ նշանակվելուց հետո Օհանյանի մոտ սկսվեց պաշ­տոնների առաջխաղացման շրջան»,- գրել էր թերթերից մեկը։
Փաստորեն, ինչպես հրապարակման մեջ է նշվում, Արմեն Օհանյանը երկու տարի չէր հաճախել աշխատանքի, բայց ստացել էր աշխատավարձ և պարգևավճարներ:
Չգիտես ինչու՝ իշխանություններն այս փաստին աչք փակեցին, որովհետև Արմեն Օհանյանը ըստ մամուլի՝ պաշտոնի իջեցում էր ունեցել ու դարձել տեսուչ ծայրահեղ կոռումպացված լինելու համար, բայց վայելելով Աննա Հակոբյանի ազգական Ռաֆիկ Մաշադյանի բարձր հովանավորությունը, բարձր պաշտոն էր ստացել։

Անի Սահակյան