Ով սիրուն-սիրուն, ինչու հեռացար

ՀՀ վարչապետ Կարեն Կարապետյանն այսօր շնորհակալություն հայտնեց արդարադատության նախարար Արփինե Հովհաննիսյանին` համատեղ և արդյունավետ աշխատանքի համար: Ապրիլի 2-ին տեղի ունեցած խոհրդարանական ընտրություններից հետո Հովհաննիսյանը ՀՀԿ-ի համամասնական ցուցակով ընտրվել է ԱԺ պատգամավոր եւ վերցրել մանդատը։ «Ցանկանանք իրեն ամենայն բարիք և այն արդյունավետությունը, որ ցուցաբերել է կառավարությունում, նույնը ցուցաբերի Ազգային ժոովում: Շնորհակալություն Ձեզ չափազանց շատ»,- ասաց վարչապետը: Ով է Արփինե Հովհաննիսյանը, որտեղից ուր հասավ։Երիտասարդ մի աղջիկ, որը Հովիկ Աբրահամյանի օգնականից դարձավ ԱԺ պատգամավոր, պատգամավորության ընթացքում իր հարցի իրավունքը Ստրասբուրգում տվեց Զարուհի Փոստանջյանին, որն էլ խայտառակեց նախագահ Սարգսյանին` 70 մլն եվրո կազինոյում «կրվելու» մասին հարցով: Իսկ մինչ այդ՝ 2003–08 թթ. իրավաբանականն ավարտած Արփինե Հովհաննիսյանը Արդարադատության նախարարությունում աշխատել էր նաև որպես նախարարության աշխատակազմի դատաիրավական բարեփոխումների վարչության քրեակատարողական ծառայության բարեփոխումների բաժնի առաջին կարգի մասնագետ, այնուհետև՝ առաջատար մասնագետ, իսկ հետո էլ՝ նախարարության աշխատակազմի իրավական ակտերի փորձաքննության վարչության պետի տեղակալ; Հովհաննիսյանի փառքի կուլմինացիան եղավ այն ժամանակ, երբ Հովիկ Աբրահամյանը բազմեց վարչապետի աթոռին։ Դրանից ամիսներ հետո տեղի ունեցավ արդարադատության նախարար Հովհաննես Մանուկյանի աղմկոտ հրաժարականը, մինչ օրս էլ չբացահայտված է մնում այն, թե ում էր ձեռնտու Հովհաննես Մանուկյանի մասնակցությամբ սեքս-սկանդալային տեսագրության հանձնումը Սերժ Սարգսյանին, որը պատճառ դարձավ Մանուկյանի հրաժարականին։ Փաստն այն է, որ դրանից հետո Հովիկ Աբրահամյանը այդ պաշտոնին տարավ Արփինե Հովհաննիսյանին։ Իսկզբանե տարակուսանքի առիթ տվեց, թե ինչպես է երիտասարդ աղջիկը ղեկավարելու այդ խնդրահարույց ոլորտը՝ ՔԿՀ-ների հավերժական խնդիրներ, անարդարադատության համակարգ․․... Բայց Արփինե Հովհաննիսյանի շուրջ նշանակման առաջին իսկ օրից ստեղծվեց կանացի մթոնոլորտ, որտեղ շեշտը դրվեց նրա գեղեցկության, հմայքի վրա․։ Հիշենք արաբական հեղինակավոր լրատվամիջոցի անդրադարձը արդարադատության նախարարի պաշտոնում նշանակվելու կապակցությամբ։ 2015-ի սեպտեմբերին արաբական առաջատար թերթերից մեկը`«Ադդիար»-ը (Addiyar) անդրադառնալով Հայաստանի արդարադատության նախարար Արփինե Հովհաննիսյանի նշանակմանը` նրան անվանել էր աշխարհի ամենագեղեցիկ նախարարուհի: Ավելի ուշ՝ հոկտեմբերին, սիրիական «Շաամթայմս» անկախ համարվող կայքը ներկայացրել էր աշխարհի 10 ամենագեղեցիկ կին նախարարների ցանկը, որում առաջին տեղը զբաղեցնում է Հայաստանի արդարադատության նախարար Արփինե Հովհաննիսյանը: Ընդ որում տիկին Հովհաննիսյանը կոկետուհու իմիջը պահպանեց նաեւ Հովիկ Աբրահամյանից հետո, երբ եկավ հաջոդ վարչապետ Կարեն Կարապետյանը, նա կարճ ժամանակում դարձավ նրան յուրային, միակն էր, ով լայն ժպիտով կառավարության կաբինետում դիմավորեց նոր վարչապետին։ Այնուամենայնիվ գեղեցկուհի նախարարին չհաջողվեց իր տեսքին համապատասխանեցնել նաեւ իր ղեկավարած ոլորտը, կամ գոնե ձգտել նման գեղեցկության, համակարգի խնդիրները մնում են չլուծված։ Չնայած երիտասարդ նախարարուհին աչքերի բազմաբովանդալ ոլորումների ու անբովանդակ բառակույտի համադրությամբ ամեն անգամ մեզ փորձել է համոզել, որ ինքն աշխատում է, բարեփոխում համակարգը, որ իր ղեկավարած ոլորտում ամեն ինչ «օքեյ» է, այդուհանդերձ փաստն այն է, որ հենց իր պաշտոնավարման ընթացքում էր, որ տեղի ունեցան մի շարք աղմկոտ միջադեպեր, ՔԿՀ-ներում սպանություններ, եւ ի վերջո, Հաց բերող Արթուրը դարձավ անարդարադատության համակարգի զոհը։ Ինչեւէ, Արփինե Հովհաննիսյանին նորից հետ են տանում ԱԺ, ինչը նշանակում է, որ նրա անվերջ խոսող, բայց ոչինչ չասող գեղեցիկ տեսակի պահանջարկը իշխանությունում, այնուամենայնիվ, զգում են։ Անի Սահակյան