Փաշինյանի ձեռքին զենք է հայտնվել

Հայաստանում հերթական անգամ կերկարաձգեն կորոնավիրուսով պայմանավորված երկրում հաստատված արտակարգ դրությունը: Համաձայն իշխանության հավաստիացումների՝ վերացվելու են մի շարք կարեւոր սահմանափաումներ.
«Մասնավորապես վերանայվելու է օտարերկրյա քաղաքացիների մուտքի հարցը, ապրանքների արտահանման սահմանափակումները, հանրահավաքներ անցկացնելու, հանրային միջոցառումների անցկացման հարցը։ Հստակեցվելու են նաև ՀՀ քաղաքացիների արտագնա աշխատանքի մեկնելու իրավունքի հետ կապված հարցերը»,- նախօրեին հայտարարեց պարետ Տիգրան Ավինյանը։ Իհարկե, դեռեւս հարց է՝ կհանեն այս սահմանափակումները, թե մի քանի օր կոոնավիրուսի վարակման բարձր թվեր կցուցադրեն եւ կհայտարարեն, թե վտանգը մեծ է եւ մարդկային կուտակումներ, հավաքներ չեն թույլատրվելու: Սակայն փոխվարչապետը հույս հայտնեց, որ սա կլինի արտակարգ դրության վերջին երկարաձգումը, որի մասին որոշումը կկայացվի օգոստոսի 12-ին։ Դրանից հետո ԱԺ կներկայացվի արտակարգ իրավիճակներով պայմանավորված օրենքներում փոփոխություններ իրականացնելու հարցը:

Ինչ վերաբերում է կրթական համակարգին, կառավարությունն առայժմ մի քանի հնարավոր մոդելներ է քննարկում, բայց այս հարցի շուրջ վերջնական որոշում դեռ չկա

Հիշեցնենք` մարտի 16–ից Հայաստանում արտակարգ դրություն է, որն արդեն մի քանի անգամ երկարաձգվել է։ Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։
Իրավաբանները շարունակում են պնդել, որ այն սահմանափակումները, որ ներկայումս մնացել և պահպանվում են՝ հանգիստ կարող են կիրառվել բնականոն կյանքում՝ առանց արտակարգ դրությունը երկարացնելու եւ որ իշխանությունները չարաշահում են այս ինստիտուտը:

Ընդ որում,իշխանություների վրա թերեւս չի ազդում արտաքին գործոնը․ ողջ աշխարհը անցել է վերականգնման փուլ, արդեն ավիափոխադրումներն են բացում, զբոսաշրջությունն է ակտիվանում, իսկ Հայաստանը մնացել է բոլորի «սեւ ցուցակներում»։
Ըստ լուրերի՝ Նիկոլ Փաշինյանը սարսափած է արտակարգ դրությունը բացելու հետեւանքներից, մասնավորապես, որ ստիպված է լինելու ամենօրյա ռեժիմով գործ ունենալ տասնյակ մեծ ու փոքր բողոքի ակցիաների հետ, որը, ըստ իշխանական հաշվարկների, ձնագնդիի էֆեկտ են ունենալու։ Ուստիեւ, այս օրերին ակտիվ փնտրտուքի մեջ են՝ ի՞նչ հորինեն, որ արտակարգ դրությունը չեղյալ համարելով, այնուամենայնիվ մարդկային մեծ հավաքներն արգելեն։ Արտակարգ դրությունը իշխանությունների ձեռքին հասարակությանը ճնշելու հոգեբանական զենք է, քանզի լարվածության ու վախի մեջ պահվող հասարակությունը շատ ավելի հեշտ կառավարելի է և ավելի քիչ պահանջատեր իր իրավունքների հարցում, քան ազատ հասարակությունը:

Անի Սահակյան